Пензии поголеми за 10 отсто, лекови без партиципација за пензионерите и бесплатно доставување на пензиите од „Македонски пошти“, вети лидерот на СДСМ Владо Бучковски, на завчерашната трибина во Кичево

Бучковски вети пензии поголеми за 10 отсто

Пензии поголеми за 10 отсто, лекови без партиципација за пензионерите и бесплатно доставување на пензиите од „Македонски пошти“, вети лидерот на СДСМ Владо Бучковски, на завчерашната трибина во Кичево, на која промовира дел од партиската програма. Тој најави дека со новата влада ќе го исполни ветувањето за вработување по еден член од секое семејство.

– Изминативе четири години ветивме и успеавме да ги зголемиме платите во јавната администрација, во здравството и во образованието. Продолжуваме со проект за подобрување на социјалната положба на граѓаните. Пензионерите се тие што ќе препознаат дека во програмата на СДСМ има реален дел за нив за зголемување на пензиите. Со зголемување на економскиот развој ќе се зголеми и бруто-домашниот производ, а пензиите ќе го следат тој развој. Во следните четири години пензиите ќе се зголемат до 10 проценти – вети Бучковски.

Тој вети и бесплатни лекови за пензионерите, како и бесплатно доставување на пензиите.

Премиерот најави и нов проект „Здравствена заштита за сите“, со кој ќе се намалел притисокот кон Агенцијата за вработување и ќе се дојде до вистинската бројка колку невработени во државава навистина бараат работа, а колку се пријавуваат заради здравствено осигурување.

– Проект за аграрот е дел од програмата и адутите на коалицијата „За Македонија заедно“. Израел е стратегиски партнер на Македонија во земјоделството. Ќе обезбедиме сигурен извоз земјоделските производи, да не зависиме само од домашните фирми. Ќе ги намалиме на нула проценти царините и даноците за репроматеријалите и за увоз на механизација за земјоделството – рече Бучковски во Кичево.

Тој ја обвини ВМРО-ДПМНЕ дека со неа тешко може да се разговара за стратегиските национални прашања и евентуално партиско обединување за нив.

– Не ми е јасно зошто Никола Груевски како претседател на ВМРО-ДПМНЕ го одби последниот предлог на Метју Нимиц за решавање на спорот за името со Грција. Ние сме подготвени да се обединиме околу проектот европска Македонија, но дефинитивно ВМРО-ДПМНЕ работи на друга оска. Немаат расчистено за стратешките прашања за судбината на земјата и застапуваат интереси на некои други. Јас се залагам за обединување на сите партии во Македонија околу стратешките интереси и интеграцијата во НАТО и ЕУ – додаде премиерот.

(Т.П.)