Голема воена вежба „Македонски блесок 05“ започнува во понеделник и ќе се одвива во касарните Илинден во Скопје, Јане Сандански во Штип и на Криволак

Голема воена вежба „Македонски блесок 05“ започнува во понеделник, а до 28. октомври ќе се одвива во касарните „Илинден“ во Скопје, „Јане Сандански“ во Штип и на полигонот „Криволак“.

На вежбата единиците на АРМ ќе бидат оценувани според НАТО стандардите – Самооценување Ниво 2 CREVAL, со што ќе се знае дали одредена единица е оспособена за извршување мисија.

На вежбата „Македонски блесок 05“ ќе учествуваат околу 1.000 припадници на АРМ, од кои 730 ќе бидат оценувани, додека останатите ќе пружаат логистичка поддршка.

Главни учесници на вежбата ќе бидат декларираниот среден пешадиски баталјон од 1.механизирана пешадиска бригада, како и декларираната чета на воена полиција од баталјонот на воена полиција.

Освен македонските оценувачи, на вежбата ќе присуствуваат и претставници на НАТО од Командите во Неапол и Мадрид, кои ќе ја контролираат работата на оценувачите.

„На крајот на вежбата единиците добиваат оценка ’Подготвена’ или ’Неподготвена’. Ако се добие позитивна оценка, тоа значи дека единицата е целосно пополнета со персонал, обучена, опремена и обезбедена со потребните ресурси и резерви во организациска смисла“, изјави потполковник Ѓоко Максимов, кој е главен на оценувањето.

Ова е прва вежба од ваков поголем формат, бидејќи како што најавуваат од АРМ, ќе земат учество поголем број војници, опрема и вооружување, а на полигонот „Криволак“ ќе се употребува и боева муниција.

Доколку единиците на АРМ успешно ја завршат вежбата, се стекнуваат со оспособеност која ја немаат и некои армии членки на НАТО. /крај/ст/мп