Македонија
Бесими во посета на Воздухопловната бригада и Центарот за обука на пилоти
Обука на пилоти на домашен терен, намалени трошоци за одржување на воените воздухоплови и зголемена подготвеност на армиските пилоти.
Ова се дел од придобивките што Армијата на Република Македонија ќе ги има од функционирањето на Центарот за обука на пилоти, што во петокот го посетија министерот за одбрана Фатмир Бесими и началникот на Генералштабот на АРМ, генерал-мајор Горанчо Котески. Двајцата беа информирани за работата на Воздухопловната бригада, единица во која согласно новата формациска поставеност на армијата влегоа воздухопловниот ВИНГ, Баталјонот за противвоздушна одбрана и Баталјонот за воздушно јавување и наведување. Обуката ќе ја врши израелската компанија ЕЛБИТ.
„Моделот според кој ќе функционира овој центар е јавно-приватно партнерство. Се користи знаењето, како и воспоставувањето и отворањето на овој центар. Се користат дел од нашите капацитети, од Армијата на Република Македонија. Ќе биде во тесна координација со воздухопловната бригада и Воената Академија на Република Македонија и по осум години станува државна сопственост, односно на Министерството за одбрана и АРМ“, рече Бесими.
„Предност е што го подобруваме командувањето над воздухопловната бригада, односно во состав на поранешниот ВИНГ влегува и баталјонот за противвоздушна одбрана и баталјонот за воздушно јавување и наведување. Исто така, се зголемуваат капацитетите во однос на борбената поддршка на единиците и транспортот на единиците и подобрена е состојбата со капацитетите за одржување на хеликоптерите и воздухопловите воопшто што армијата ги поседува, а исто така и осонченоста на пилотите“, рече Котески.
Управното ниво на центарот ќе биде со луѓе од ЕЛБИТ, а другите експерти ќе бидат на локално ниво, односно пилотите, инструкторите и техничарите.
„Опремата која ќе ја користиме ги вклучува адаптираните 5 Злин воздухоплови, елементарната обука ќе се извршува на хеликоптерите Бел-206 и М4. Исто така, во моментов се работи на нова модерна симулациска опрема за МИ-17 и МИ-24, на којшто работиме и тие ќе бидат достапни за 18 месеци“, изјави Швага Јари, директор на центарот за обука на пилоти.
Ресурсите на центарот ќе може да ги користат и други институции како што се Министерството за внатрешни работи и Дирекцијата за заштита и спасување, како и земјите од регионот. /крај/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ не ја прифаќа понудата на Максим Димитриевски
Граѓаните и гласачите на СДСМ веќе ја препознаваат измамата која им е сервирана од страна на ЗНАМ и непринципиелните коалиции. За разлика од субјектите како ЗНАМ, кои се човек-партија СДСМ е државничка партија со длабоки и силни корени, се вели во одговорот на социјалдемократите на вчерашната понуда на ЗНАМ.
Вчера Максим Димитриевски, претседателот на ЗНМ рече дека единствен услов за евентуална соработка со СДСМ е оставка на раководството на партијата во рок од 24 часа, а носителите и ко-носителите на кандидатските листи на нотар да изјават дека нема да прифатат пратенички мандати.
Македонија
Силјановска Давкова: Посебно ми беше убаво кога видов дека сме победиле и во Муртино
Гордана Силјановска-Давкова порача од Струмица дека ќе се вивне политичкиот вулкан како отпор на феудалните енклави на замислените европјани.
„Во Струмица се чувствувам особено добро бидејќи знам дека оттука ќе тргне тој политички вулкан што ќе стави крај на последната феудална енклава во Македонија. Таа енклава ја нареков феудот на Заеви што ќе се распадне! Замислете, „заколнати“ самонаречени европјани мислат дека со рефудализација ќе стигнат во ЕУ. Неверојатно нешто! Посебно ми беше убаво кога видов дека сме победиле и во Муртино“, вели Силјановска-Давкова.
Како што цели, во дебата, квази дебата на давеник што се фаќа за сламка, била прашана како може да не го употребува името „северна“, и дека го кршела Уставот.
„ Му објаснив дека правото на самоопределување е колективно право и дека Македонија истото го искористи уште на АСНОМ. Но и дека секој од нас има право на индивидуално самоопределување и дека никој, никогаш ниту мене, ниту вам не може да ни забрани да го употребуваме името Македонија. Замислете, во една емисија, во еден изборен циклус, не знаете кој е кој, не знаете со кого разговарате, бидејќи господинот Пендаровски неколку пати го негира она што го кажал. Во една изјава сум одличен професор, меѓународно признат експерт, дека сум имала висока морална вертикала. Па после вика не, јас мислев на висока морална вертикала во однос на Уставниот суд. Пазете, луѓево имаат по десет морални вертикали. Еднаш за Уставниот суд, еднаш за Собрание, еднаш за претседател… Неверојатен конгломерат. Како тогаш очекувате став од ваквите луѓе? Како очекувате да опстојат?“, додава Силјановска-Давкова.
Македонија
Милионерот Каевски ја злоупотребил позицијата како директор на АМС, со распределбата на ваучерите направен милионски криминал, велат од ВМРО-ДПМНЕ
Милионерот Дарко Каевски ја злоупотребил позицијата како директор на Агенциојата за млади и спорт, АМС, со распределбата на ваучерите направен е милионски криминал, велат од ВМРО-ДПМНЕ.
„Каевски како директор на АМС, неговиот наследник Наумче Мојсовски и Даниел Димевски од МОК се гонат заради сомнежи дека како директори на Агенцијата, но и членовите на Централната комисија во 2020, 2021 и 2022 година, по пат на искористување на службената положба и несовесно работење, заобиколувајќи ги законските процедури, извршиле распределба на пари, со што го оштетиле Буџетот на државата, но и луѓето што имале законско право на тие пари, а не им биле доделени“, дополнуваат од ВМРО-ДПМНЕ.
Според нив, во предметот на Државната комисија за спречување на корупцијата, врз основа на кој, како што известија медиумите, е поднесена пријавата и отпочната постапката се присутни сомневања дека спортските федерации, клубовите и спортистите добиваа ваучери, а одредена фирма ги реализирала под услов дел од парите да ги добие назад преку даночно ослободување.
„Сега е повеќе од јасно зошти Каевски беше најжесток гласноговорник на СДС, повеќе од очигледно е дека интересот му бил голем. По оваа афера станува јасно зошто спортот во Македонија во последните 7 години е на историско најниско ниво. Наместо за развој на спортот, парите наменети за истиот се пренасочувани во криминални шеми, додаваат од партијата.