Русија се најде на неславното прво место во светот според потрошувачката на хероин, се вели во извештајот на Обединетите нации во кој се прецизира дека во таа земја завршува 21 насто од вкупното светско производство на тој наркотик и пет насто опиум

Извештајот насловен „Наркоманија, криминал и бунтовнички движења: Опасност од транзитот на опиумот од Авганистан“, објавен во Виена, го изготвија експерти на ОН за наркотици и спречување криминал на основа на нивните истражувања и податоци добиени од службите задолжени за борба против наркоманијата.Годишното светско производство достигнува 3.700 тони опиумски наркотици (вклучувајќи и хероин), а во светот се регистрирани 15,4 милиони корисници на наркотици, со тоа што мнозинството (11,3 милиони) користат хероин.Русија има 1,5 милиони хероински зависници. Се смета дека годишно во светот се употребува 340 тони чист хероин, што е еквивалентно на количината од 2.600 тони сиров опиум. Петтина од оваа количина завршува во Русија, се укажува во извештајот на ОН. Русија по Европската унија е втор по големина пазар на опиумски наркотици, вклучувајќи го и хероинот, а на прво место меѓу поединечните земји.„Бројот на наркомани во Руската федерација се зголеми десет пати во последната деценија, при што употребената количина на авганистански хероин се движи од 75 до 80 тони годишно. Од наркотици во Русија умираат повеќе луѓе (според проценката на Владата меѓу 30.000 и 40.000), отколку што загинале руски војници за време на седумгодишната воена кампања во Авганистан“, нагласуваат експерти на ОН.„Побарувачката на авганистански хероин во Русија се зголеми, а таа земја веќе не е транзитна зона туку крајно одредиште. Во суштина тековите на хероинот од Русија во Европа се многу ограничени, се вели во документот. Во такви услови“, заклучуваат експертите на ОН, напорите на руските власти во борбата со наркотиците и натаму се неефикасни.Најголем успех во борбата против наркотиви од Авганистан остварија правосудните органи на Иран, кои спречуваат 20 насто од испораките, Кина – со 18 проценти и Пакистан со 17 насто. Авганистанските специјални служби спречуваат продажба на два насто иелгално произведени наркотици.Европа е најголем потрошувач на авганистански наркотици со учество од 19 проценти (во вредност од околу 20 милијарди долари), а следат Русија и Иран со по 15 проценти (13 милијарди), Кина со 12 проценти, Индија со седум, Пакистан, Африка, Северна и Јужна Америка со по шест насто.