Додека двете конфронтирани страни во источна Украина ги разменуваат заробениците, одделот за здравство на самопрогласената Народна Република Донецк извести дека во артилериски напади во градовите Зугрес и во Донецк се регистрирани вкупно 17 нови жртви меѓу цивилите, од кои три се деца.
 

Во воените дејствија во градот Зугрес, во Донецката област на Украина, покрај загинатите 15 луѓе, ранети се уште и 19 лица, потврди регионалната државна администрација.

Според извештаите на локалните медиуми, украинската армија и проруските бунтовници целата ноќ кон четвртокот разменувале артилериски оган, а најмногу борби се воделе во околините на градовите Зугрес и Снежное на исток од Донецк, најголемиот град и центарот на бунтот на локалното население против властите во Киев. Според извори на РИА Новости од редовите на ткн народни милиции за самоодбрана на Донецката област, Зугрес во гранатирањето на Зугрес било погодено училиште, детско игралиште на река, градскиот стадиони и електрична централа.

„На самото место загинаа 14 луѓе, од кои две деца. Подоцна во болницата почина уште едно дете. Така, вкупниот број загинати изнесува 15 лица, од кои три се деца. Покрај тоа, 19 луѓе се здобија со повреди од разна тежина“, се наведува во соопштението на локалните власти.

Подоцна во четвртокот, во гранатирањето на центарот на градот Донецк загинале уште два цивила, соопштија бунтовниците на интернет страницата на Градскиот совет. Гранатите паднале во дворот на Првата градска болница и на приватни имоти. „Според прецизираните податоци, двајца цивили загинаа на улицата Артемовам а уште три лица се ранети“, се наведува во соопштението.

Претходно во четвртокот AFP повикувајќи се на претставник на локалните власти пренесе дека 22 цивили се убиени во последните 24 часа во минофрлачки оган на украинската армија врз источниот град Луганск кој повеќе од четири месеци е под контрола на ткн народни милиции на самоодбраната на самопрогласената Народна Република Луганс.

Канцеларијата на Обединетите нации за човекови права во Женева соопшти во средата дека бројот на мртвите во украинскиот судир во првите две седмици од август двојно се зголемил во однос на бројот на жртвите од крајот на јули. Заклучно со 10-ти август во Украина животите ги загубиле 2.086 луѓе. Кон крајот на јули оваа бројка изнесуваше 1.129. „Тоа соодветствува на трендот на јакнење на судирите“, изјави за Reuters портпаролката на ОН, Сесил Пуији.

Во просек, секој ден повеќе од 60 луѓе се убиени или ранети откако започна вооружениот судир во источна Украина, околу почетокот на април. Со првите денови на август, овој просек се зголемил на 70, се додава во процената на ОН. Бројот на жртвите ги вклучува припадниците на украинските војска и на проруските бунтовници, како и цивилните жртви. Бројот на ранетите е околу пет илјади, но Поуји додава дека овие бројки се многу конзервативни, односно немаат конечни потврди.

Истовремено е објавено дека на територијата на ткн Донецка Народна Република била извршена размена на заробеници меѓу бунтовниците и украинската армија. Притоа биле разменети 26 бунтовници, кои биле испратени во нивните домови, за 26 украинските војници./крај/мф/сн

Извор: Макфакс