Апел за превземање на итни мерки за спас на економијата упати ССК, алармирајќи дека голем дел од реалниот сектор нема да го преживее летото

Апел за превземање на итни мерки за спас на економијата упати Сојузот на стопански комори, алармирајќи дека голем дел од реалниот сектор нема да го преживее летото.

Претседателот на Сојузот на стопански комори (ССК) Златко Калеников упати писмо до премиерот Никола Груевски во кое му укажува дека условите за водење бизнис секојдневно се менуваат и се повеќе се стега обрачот околу стопанствениците.

Најпрво се стегна обрачот со секнување на извори за кредитирање, па се намали работата, се воведе Бруто плата со непроверени матрици во реалниот сектор, а згора на сето тоа, Управата за јавни приходи и Министерствата немајќи идеа како да обезбедат приходи во Буџетот ги зајакнуваат Инспекциските служби на терен, се вели во апелот.

Калеников алармира дека во реалниот сектор доведена е во прашање исплатата на даноците, исплатата на платите, а се прават и сценарија за отпуштање.

„Оттаму со овој допис сакам да Ви ги претставам потребите и предлозите од ССК, кои сметаме дека покрај донесениот трет пакет на антикризни мерки, а со оглед на новонастаната состојба, се потребни за спас на стопанството во оваа економска криза кај нас“, се вели во писмото упатено до премиерот Груевски.

Според ССК, веднаш е потребен свеж капитал однадвор од најевтиниот извор, во голем износ од 700 милиони до една милијарда евра.

Стопанствениците бараат надополнети измени во буџетот со цел истиот да има развојна (инфраструктурна) и социјална компонента кои се клучни во услови на криза.

Истовремено, се бара и поддршка за зголемување на извозот, како и директна помош во стопанството.

Сите овие предлози се со една единствена цел, задвижување на економијата. Ние мора да ја задвижиме потрошувачката преку релаксирана и стабилна монетарна политика. Сметаме дека сите други економски теории за нас, како држава се некомпатибилни. Сега ни е потребен Домино ефектот, но во насока на раздвижување на економијата, се вели во апелот упатен до Владата. /крај/со/ап/