Дебата за извештаите за условите за визна либерализација на балканските држави, од понеделник, ќе започне во државите-членки на Европската унија

Дебата за извештаите за условите за визна либерализација на балканските држави, од понеделник, ќе започне во државите-членки на Европската унија.

Ова денеска во Скопје го најави вицепремиерот за евроинтеграции Ивица Боцевски, кој додаде дека ЕК, во јуни, треба да препорача промена на регулативата за префрлање на државите што ги исполниле условите од “црна“ на “бела“ шенген листа.

Потоа следи советодавното мислење на Европскиот Парламент, како и одлуката на Советот на министри на ЕУ.

“Најоптимистичка варијанта за конечна одлука е септември, а најпесимистичка крај на ноември, годинава“, додаде Боцевски.

Според него, ова покажува дека почетокот на наредната година е “реален“ за целосно укинување на визите за влез во ЕУ на македонските граѓани.

Македонија доби највисоки оценки во исполнувањето на условите од останатите држави во регионот – Албанија, БиХ, Црна Гора и Србија, а извештаите веќе се пристигнати во државите од регионот, вклучително и Македонија.

“Исполнети услови“ има во две подрачја, и “генерално исполнети услови“ во уште две, објави денеска Европската иницијатива за стабилност.

Нелегалната имиграција, со реадмисија е пониско оценета поради довршување на националната база за странци, а Јавниот ред и безбедност поради нецелосна национална база за делови од јавна безбедност.

Сепак, во дури три области Македонија е прва на листата во регионот, а само во областа Безбедност на документи е изедначена со Црна Гора.

Според владини извори, ставот на Германија за визните прашања, најверојатно, ќе “омекне“ бидејќи ќе се “врзе“ со позитивните оценки во Извештајот.

“Македонија во историјата немала вака силна оценка“, додаваат истите извори.

Грција го поддржа процесот на визно олеснување со државите од регионот, но се уште е нејасно како технички ќе го регулира, ако македонските граѓани патуваат во ЕУ без визи, од 1 јануари наредната година./крај/ис