Македонија
Марш: Македонија на почетокот од долгиот пат кон толеранцијата
Македонија е на почетокот од долгата битка за правда, еднаквост, слобода и толеранција за сите граѓани во земјата, коментираа денеска повеќето учесници на вториот Марш на толеранција кој беше посветен на политичката (не) толеранција.
Стотината граѓани кои беа дел од маршот се собраа пред Музејот на Град Скопје, и преку плоштадот „Македонија“ и камениот мост се упатија кон платото на стоковната куќа „Илинден“.
Маршот имаше видливо полициско обезбедување, и на него присуствуваа повеќе претставници на меѓународната заедница во земјата, неколку пратеници, претставници на граѓанскиот сектор, активисти за човекови права итн. Освен неколкуте довикувања од страна на некои граѓани поради знамето со виножитото кое е симбол на геј правата во светот и се вееше на маршот, тој помина мирно.
„Ова е марш на граѓаните на Македонија, на секој оној кој мисли малку поинаку, на секој оној кој е отворен за различностите што владеат насекаде. Пораката е пратена и до граѓаните и до политичките партии и до сите тие кои сакаат да се приклучат,“ порача Гордана Несторовска извршен директор на Хелсиншкиот Комитет за човекови права.
Еден од ретките политичари кои го подржаа штрајкот беше и Стојан Андов кој рече дека како член и претседател на постојаната анкетна комисија за заштитата на слободите и правата на граѓанинот, констатирал безброј мали и големи невидливи неправди и дискриминации кон луѓето во земјата
„Затоа овој протест го подржувам, мислам оти луѓето не треба да бидат свесни за неправдите само кога ќе им тропнат на вратата, и ќе им дојдат во нивниот двор. Ние настојуваме да донесеме закони, но и законите често пати ни се инвалидни, а и спроведувањето на законите е далеку од тоа што го заслужуваат нашите граѓани,“ рече Андов и додаде дека повеќето пратеници би требало да се придружат на маршот.
Славчо Димитров од Коалицијата за сексуални и здравствени права на маргинализирани заедници, ја изрази својата загриженост за институционалната дискриминација врз одредени групи на граѓани.
„Дури и на овој ден добиваме изјава од институција, од министерството за труд и социјала, во која јасно се излегува со став кој вели дека хомосексуалноста нема да биде прифатена како нормална појава. Овој апел беше упатен од институцијата, која всушност треба да брани од дискриминација, и која треба да го спроведува законот за заштита од дискриминација“, рече Димитров.
Маршот го поздрави и Амбасадорката на Кралството Холандија, Симоне Филипини, а свое обраќање имаше и Евроамбасадорот Ерван Фуере
„Големо задоволство е да се види како главниот град на Македонија им се придружува на многу други земји низ Европа, на овој ден кога промовираме толеранција. Еден познат ирски писател има кажано дека толеранцијата е една прекрасна земја но патот кон неа е долг и тежок, но вреди да се оди по тој пат. Вие почнувате да одите на тој пат, и ние ќе бидеме со вас до крајот,“ порача Фуере.
Според сознанијата на Хелсиншки, во земјата најчеста е политичката дискриминација и затоа овој марш за нив претставува апел за поголема соработка помеѓу политичките партии кои треба да внимаваат како меѓу себе се однесуваат и која порака ќе ја пратат на граѓаните./крај/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.