Македонија
Отворен Ромски информативен центар во Берово
Министерот за труд и социјална политика, Диме Спасов, заменик министерот за труд и социјална политика Ибрахим Ибрахими и градоначалникот на општина Берово, Драги Наџински го отворија Ромскиот информативен центар во Општина Берово.
„Ромските информативни центри имаат за задача планирано и структурирано да информираат за имплементацијата на Стратегијата за Ромите и Акциските планови на Декадата за вклучување на Ромите 2005-2015 на локално ниво. Основна цел за функционирањето на Ромските Информативни Центри е информирање на Ромската заедница, како и на Министерството за труд и социјална политика, Единиците на локална самоуправа, службите на министерствата и институциите на локално ниво за целите и активностите коишто произлегуваат од Стратегијата за Ромите и Акциските планови за спроведување на Декадата за вклучување на Ромите и да им помогнат на припадниците на Ромската заедница во остварување на правата коишто произлегуваат од истите“ рече Спасов.
Тој истакна дека целта на овој информативен центар е навремено ги информираат граѓаните, упатуваат и даваат логистичка поддршка на граѓаните заради остварување на своите права и обврски од областите на социјалната заштита, вработување, здравство, домување и образование, вадење на лични документи.
„Во рамките на овој проект на Министерството за труд и социјална политика функционираат 12 Ромски информативни центри “ истакна Спасов.
Министерот за труд и социјална политка, посетата на општина Берово ја искористи и да го посети малиот групен дом во кој се сместени пет деца без родители и родителска грижа како успешен пример за вонинституционална заштита на деца без родители и родителска грижа, пример кој што треба да го следат и другите општини.
Воедно, при посетата на Берово го посети и семејството Глинчурски во село Двориште кое што се наоѓа во социјален ризик и му додели еднократна парична помош наменета за лекување на двегодишната Вецка. Претставници на Црвениот крст на Град Скопје им доделија пакети со храна, облека и препарати за лична хигиена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Воведена нова процедура на Клиниката за кардиологија, пациентите со сложени срцеви аритмии повеќе нема да бидат упатувани во странство
Министерот за здравство, Азир Алиу денеска ја посети Универзитетската клиника за кардиологија, по повод извршената прва аблација за коморна тахикардија во нашата држава.
„Со воведувањето на новата процедура на Клиниката за кардиологија, овозможуваме пациентите со сложени срцеви аритмии да бидат згрижени и соодветно третирани во оваа врвна терциерна установа, без да има потреба да бидат упатувани во странство. Тимот од оваа клиника покажа дека во македонското здравство постои знаење, храброст и визија за врвни резултати. Ова е голем чекор напред за нашето здравство и потврда дека инвестицијата во знаење, технологија и човечки потенцијал овозможува врвни резултати“, истакна министерот Алиу при посетата.
Директорката на Клиниката за кардиологија, Даница Петкоска Спирова изрази благодарност до целиот тим за посветеноста во работата и грижата за пациентите со кардиолошки заболувања.
„Министерството за здравство продолжува со поддршка на иницијативите за воведување нови процедури и методи во јавните здравствени установи, со цел унапредување на третманот на пациентите на сите нивоа на здравствена заштита“, порача министерот Алиу.
Македонија
Љутков ќе се обрати на 43 сесија на Генералната конференција на УНЕСКО
Министерот за култура и туризам Зоран Љутков ја предводи македонската делегација на 43. сесија на Генералната конференција на УНЕСКО што од 30 октомври до 13 ноември се одржува во Самарканд, Република Узбекистан.
Љутков утре (5 ноември) во Конгресниот центар „Патот на свилата“ во Самарканд ќе се обрати на дебатата посветена на генералните политики на Организацијата, на која учествуваат министри и претставници од земјите членки на УНЕСКО.
На Генералната конференција учествуваат претставници од над 200 земји и меѓународни организации. За време на двонеделното заседание ќе бидат усвоени значајни документи што ги одредуваат буџетот и програмата за работа на УНЕСКО за следниот период, а државите членки ќе изберат и членови на извршниот одбор. Се очекува во текот на Конференцијата да биде именуван и нов директор на Организацијата.
Одржувањето на Конференцијата во Самарканд е од особено значење бидејќи за првпат по повеќе од четири децении Генералната конференција на УНЕСКО се одржува надвор од седиштето на Организацијата во Париз.
Учеството на овој меѓународен собир, во кој Република Македонија е полноправна членка од 28 јуни 1993 година, ја потврдува континуираната посветеност на земјава кон целите и вредностите на УНЕСКО, а претставува и можност за унапредување на видливоста на македонската култура на глобално ниво.
Македонија
Утре без вода дел од скопски Центар
Од ЈП Водовод и Канализација известуваат дека утре ( среда ) поради дефект во шахта од ф – ¾ на ул. Ацо Караманов бр. 10, во периодот од 09.00 часот па се до отстранување на дефектот без вода ќе останат дел од корисниците од ул. Ацо Караманов, како и објектот на Американската Резиденција. ( општина Центар )

