Патувањето автостоп до дома, деветнаесет годишниот А.М. од Стар Дојран за малку ќе го чинело живот, јавува Лисица.

Тргнал од Скопје автостоп, но кај Сопот излегол и продолжил пеш. Кога стигнал во близина на местото викано Бабуна, сретнал овчари и побарал да му дадат телефон.

Додека разговарал со нив дошле педесет и шест годишниот Н.М. и дваесет и четири годишниот Т.М. Двајцата биле татко и син, од Скопје. Почнале да разговараат со момчето и му нуделе работа како овчар.

Потоа со нивниот автомобил марка Лада го однеле до млекарата „Енерго-Маркет“ каде таткото работел како менаџер. Физички го нападнале, а со пиштол вперен во главата му се заканиле дека ќе биде убиен.

По физичкото малтретирање и заканите го сместиле во трлото што се наоѓало во близина и на овчарите им наредиле да го чуваат да не избега. Откако таткото и синот заминале, еден од овчарите се смилувал и му дал телефон. Момчето се јавило кај неговиот чичко, кој случајот веднаш го пријавил во полиција.

„Истиот ден околу 23,30 часот од страна на полициски службеници од Секторот за внатрешни работи Велес излезено е на лице место во млекара „Енерго Маркет“. лоцирана во место викано Бабуна, лицето е ослободено, а сторителите на делото останале во објектот. Со наредба од истражен судија при Основен суд Велес извршен е претрес во млекарата и помошните простории, и при претресот пронајдени се еден пиштол марка ЦЗ 9мм , ловна пушка карабин, самострел и стрели за истиот, и неколку парчиња муниција за пиштолот и пушката. Предметите со потврда се одземени од лицата Н.М (56)-менаџер во млекарата, Т.М. (24) и двајцата од Скопје-татко и син, кои се затекнати во објектот, истите се приведени и задржани во просториите на Секторот, рече Анита Стојковска, портпарол на СВР Велес.

Таткото и синот во полициската станица не го признале делото. Против нив, СВР Велес до Основното јавно обвинителство поднесе кривична пријава поради сомнение дека сториле две кривични дела „Противправно лишување од слобода“ и Загрозување со опасно орудие при тепачка или караница“.

„За првото кривично дело можат да заработат парична казна и затвор во времетраење до една година, а за второто парична казна и затвор до шест месеци“, рече Анита Стојковска.

Педесет и четиригодишниот Н.М и претходно бил пријавуван за кривични дела од областа на имотот и злоупотреба на службената положба додека неговиот син, за кривични дела од областа на безбедност на сообраќајот./крај/лисица/фф