Свет
Ерван Фуере ги искара суетните судии
Евроамбасадорот Ерван Фуере ги искарал првите луѓе на правосудните институции затоа што „поради различните мислења и суетите“ доцни проработувањето на Академијата за обука на судии и обвинители, дознава „Време“.
АКАДЕМИЈАТА ЗА СУДИИ НЕ ПРОРАБОТЕ
Мери Јордановска
Евроамбасадорот Ерван Фуере ги искарал првите луѓе на правосудните институции затоа што „поради различните мислења и суетите“ доцни проработувањето на Академијата за обука на судии и обвинители, дознава „Време“. Академијата беше свечено отворена во март годинава, Европската агенција за реконструкција и развој (ЕАР) за неа одвои околу 1,5 милион евра, но таа остана на мртва точка.
Фуере испратил писмо до Дане Илиев, претседателот на Врховниот суд, до јавниот обвинител Александар Прчевски, до министерот за правда Михајло Маневски и до претседателката на Републичкиот судски совет Ленче Софрониевска. Во писмото се вели дека поради суетите на раководните луѓе во правосудството, Академијата за судии и обвинители не може да профункционира. Од Европската комисија ги потврдија овие информации.
– Точно е, такво писмо е испратено. Примената на Законот за академија доцни, што е во спротивност со реформите. Од друга страна, отворањето на Академијата беше еден од клучните аспекти од европското партнерство – велат во Европската комисија.
Според нашите информации, писмо со слична содржина завчера стигнало и од ОБСЕ до сите правосудни институции, каде што се изразува загриженост за нефункционирањето на Академијата. Неофицијално, станува збор за недоразбирања за тоа кој да стане директор на оваа институција. Поради тоа што не бил запазен рокот, на последниот состанок на управниот одбор пред три дена бил поништен конкурсот за избор на директор.
– Доцневме со изборот поради објективни причини, со оглед на тоа што не затекнаа изборите. На седницата одлучивме дека следната недела ќе биде распишан нов конкурс за директор и за извршен директор на академијата. Потоа ќе следува регистрација на новата фирма и се надевам дека до почетокот на октомври ќе се избере директорот – вели врховниот судија Агим Мифтари, претседател на управниот одбор.
Поради внатрешната поделеност управниот одбор не можел да одлучи дали директор ќе стане заменик-обвинителот Коста Петровски или врховниот судија Зирап Лимани. Обвинителот Прчевски сметал дека директор треба да биде обвинител, затоа што претседател на управниот одбор бил врховен судија. Освен тоа, состаноците на управниот одбор најчесто се одложувале поради немање кворум, со оглед на тоа што поранешната министерка за правда Мери Младеновска-Ѓорѓиевска и врховните судии отсуствуваа неколку пати.
– Црвенееме пред Европската комисија. Ни дадоа пари, а ние не можеме да ја пуштиме во работа – велат нашите извори.
Академијата не може да се регистрира без избран директор, ниту да ги користи парите од буџетот за годинава.
Академијата беше посочувана како еден од клучните реформски проекти во судството. Според законот, идни судии и обвинители ќе можат да станат само кандидатите што ќе ја завршат обуката во оваа институција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бројот на бегалци во Германија годинава достигна нов врв
Бројот на бегалци кои живеат во Германија годинава достигна нов врв, покажуваат денешните владини податоци, пренесува Дојче веле.
Околу 3,48 милиони бегалци со различни видови дозволи за престој живееле во Германија на крајот на јуни 2024 година, што е за приближно 60.000 повеќе отколку на крајот на 2023 година.
Една третина од овие бегалци дошле од Украина.
Бројката вклучува и некои поединци кои се обврзани да ја напуштат Германија, но остануваат во земјата под политика на толеранција која опфаќа низа ситуации, како што се болест, недостаток на документи за идентификација или луѓе чии деца имаат дозвола за престој.
Статистиката беше дадена како одговор на барањето на партијата Социјалистичка левица во парламентот и првпат беше објавена од Ној Оснабрикер Цајтунг.
Свет
Лавров: Русија не сака ескалација, но западните политичари се однесуваат како деца
Рускиот министер за надворешни работи Сергеј Лавров денеска изјави дека Русија не сака да ги ескалира тензиите со западните земји, но дека, како што наведе, „политичарите на овие земји се однесуваат како деца“.
„Не сакаме ескалација. Се чини дека западните политичари навистина имаат менталитет на дете, иако како возрасни заземаат одговорни позиции: министри, премиери, канцелари, претседатели“, рече Лавров.
Лавров нагласи дека неколку месеци во светот се разговара за тоа како Русија наводно само се заканува и зборува за „црвени линии“.
Свет
Израелска армија: Убиени околу десет високи команданти на Хезболах
Портпаролот на израелската армија, контраадмирал Даниел Хагари, изјави дека заедно со Ибрахим Акил, во денешниот израелски воздушен напад врз јужен Бејрут биле убиени околу десет високи команданти на либански Хезболах.
Хагари на прес-конференција рече дека Акил и другите членови на елитната единица Радван на Хезболах се собрале во подрумот на една зграда кога биле мета и убиени.
Весникот „Тајмс оф Израел“ наведува дека Хагари рекол дека тоа биле „командантите кои го подготвиле и го воделе планот на терористичката организација Хезболах за напад на северната територија на државата Израел.
Портпаролот на израелската војска тврди дека како дел од таа инвазија, Хезболах планирал упад на израелска територија сличен на нападот на Хамас од Газа на јужна израелска територија на 7 октомври минатата година. Тогаш започна војната меѓу Израел и таа палестинска исламистичка организација.
Во меѓувреме, израелскиот министер за одбрана Јоав Галант на платформата X објави дека ќе продолжи „секвенцата на акции во новата фаза“ од конфликтот со Хезболах додека не се постигне целта за безбедно враќање на Израелците раселени поради прекуграничниот конфликт во нивните домови.