Свет
Ватикан официјално го потврди обвинувањето за собарот на Папата

Ватиканскиот суд во саботата официјално потврди дека подигнал обвинение против собарот на папата Бенедикт Шеснаесетти, за неовластено поседување доверливи документ.
Како што пренесуваат италијанските медиуми повикувајќи се на соопштението на Светата столица, покрај обвинението за 46-годишниот Паоло Габриеле, судот во Ватикан ќе ја прошири истрагата за да се утврди дали настојникот на папските одаи имал соучесници коишто му помагале во пласирањето на доверливите материјали во медиумите, што се случуваше подолг период наназад.
Во писмената изјава на судот Габриеле е означен како „обвинетиот“ и се наведува дека прелиминарната истрага против него е со подигнато ниво – „официјална“, што значи дека собарот на папата Бенедикт Шеснаесетти и формално е обвинет за истекувањето на доверливите докумeнти од Ватикан, забележува Reuters.
Малку порано во саботата, и портпаролот на Светата столица, Фредерико Ломбарди, три дена по апсењето и еден ден откако италијанските медиуми го објавија идентитетот на „кртот“ во Ватикан, потврди дека Паоло Габриеле е обвинет.
„Можам да потврдам дека лицето приведено во средата, во чиј стан и кај него лично биле пронајдени доверливи документи, е Паоло Габриеле и дека се наоѓа во затвор“, пишува AFP.
„Габриеле избра два бранитела и веќе имаше можност да се сретне со нив. Ќе се состанува со нив и натаму во продолжение од постапката. Габриеле ги ужива сите права загарантирани со кривичниот законик и процедурите на Државата Градот Ватикан“, вели Лобарди.
Поголемиот дел од годинава Ватикан беше во центарот на скандалот поврзан со истекувањето на доверливи информации во медиумите. Дури беа споменувани и личните преписки на папата Бенедикт Шеснаесетти.
Во некои од документите се зборува за корупција, лошо раководење и ортачки врски во Ватикан, како и за внатрешното неединство во управувањето со Ватиканската банка.
Во четвртокот навечер беше објавено дека е сменет претседателот на Ватиканската банка Еторе Готи Тедески. Тој бил принуден да поднесе оставка, бидејќи „не успеал да ги извршува должностите од суштествена важност“, беше наведено во соопштението на Ватикан издадено во четвртокот навечер.
Според соопштението, Управниот совет на Ватиканската банка едногласно му изгласало недоверба на Тедески, верувајќи дека „овој потег е важен за банката да ја сочува својата виталност“.
Еторе Готи Тедески, стручњак за финансиска етика, ја презема челната функција во Ватиканската банка, позната и како Завод за религиозни дела (IOR) во 2009 година, во намерата на Светата столица од банката да ги исчисти дамките од скандалите. Меѓутоа, поранешниот прв човек на шпанската банка „Santander“ и самиот во 2010 година се најде под истрага на италијанските правосудни органи во рамките на пошироката истрага за перење пари.
Тедески ниту во петокот не ја коментираше својата смена, останувајќи на својот кус одговорен даден претходно дека „побрзо ништо не би изјавил, отколку во спротивно да изговори страшни работи“.
Управата на Ватиканската банка соопшти дека бара нов претседател кој би овозможил да се воспостават „ефикасни и сеопфатни односи со финансиската заедница темелени на меѓусебното почитување и прифатените банкарски стандарди“.
Во документите, исто така, често се споменува името на државниот секретар Тарцисио Бертоне. Некои од материјалите станаа дел од книгата на Џанлуиџи Нуци „Неговата Светост“ објавена минатата седмица во којашто се зборува за корупцијата и сплеткарењата во Ватикан.
Според медиумите, Папата бил шокиран и многу разочаран од истекувањето на документите и наредил спроведување неколку истраги, меѓу кои и една којашто ја води ватиканската полиција, а со друга кардиналска комисија. Пристап до неговите лични документи имал многу мал круг лица, покрај собарот уште четири чесни сестри и уште двајцата негови секретара, Георг Гаенсвејн и Алфред Ксуереб./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
ЕК: Секоја од нашите земји-членки може привремено да ја укине забраната за летови на авионот на Путин

Најавената средба меѓу претседателите на САД и Русија во Будимпешта е добредојдена ако може да доведе до праведен и траен мир во Украина, изјави денес портпаролот на Европската Комисија.
„Ја поздравуваме оваа средба ако помогне во постигнувањето на траен и праведен мир во Украина“, изјави портпаролот на Комисијата, Олоф Гил.
Претседателот на САД, Доналд Трамп, по телефонскиот разговор со рускиот претседател Владимир Путин објави дека двајцата ќе се сретнат во Будимпешта во следните две недели.
Во врска со логистичките прашања околу пристигнувањето на рускиот претседател во Будимпешта, Комисијата објасни дека секоја земја-членка може по исклучок да одобри отстапување од забраната за влез во европскиот воздушен простор за руски авиони.
Портпаролката на Комисијата, Анита Хипер, изјави дека како дел од санкциите против рускиот претседател Путин и министерот за надворешни работи Сергеј Лавров, средствата во ЕУ се замрзнати, но нема и забрана за влез на територијата на ЕУ.
Меѓународниот кривичен суд (МКС) издаде налог за апсење на Путин во 2023 година за воени злосторства поврзани со нелегалната депортација на украински деца.
Унгарија веќе беше домаќин на израелскиот премиер Бенјамин Нетанјаху во април оваа година, за кого МКС исто така издаде налог за апсење. После тоа, унгарската влада информираше дека се повлекува од тој суд.
Сепак, според статутот на МКС, Унгарија сè уште е должна да го уапси Путин бидејќи повлекувањето од судот стапува на сила една година откако генералниот секретар на ОН беше известен.
Во унгарскиот случај, тоа е јуни 2026 година.
Шефот на унгарската дипломатија, Петер Сијарто, денес изјави дека Будимпешта ќе обезбеди Путин непречено да влезе на нејзина територија со цел средба со Трамп и дека успешно ќе се врати во Русија.
фото:принтскрин
Свет
ОН: Потребно е време за да се намали гладот во Појасот Газа

Обединетите нации во петокот објавија дека ќе биде потребно време за да се намали гладот во Појасот Газа и повикаа на отворање на сите премини кон воено разурнатата палестинска територија.
– Ќе биде потребно извесно време за да се намали гладот - изјави портпаролката на Светската програма за храна на ОН (WFP) Абер Етефа на прес-конференција во Женева.
Светската програма за храна на ОН испорачуваше просечно 560 тони храна во Газа дневно од почетокот на прекинот на огнот, но ова е сè уште под она што е потребно, рече Абер Етефа.
– Сè уште сме под она што ни треба, но стигнуваме до таму. Прекинот на огнот отвори тесен прозорец на можности, а WFP се движи многу брзо и успешно кон зголемување на помошта за храна – изјави Етефа за новинарите, пренесува Ројтерс.
Фото: принтскрин
Свет
Песков: Многу работи треба да се договорат пред самитот Путин-Трамп

Кремљ во петокот соопшти дека самитот меѓу претседателот Владимир Путин и Доналд Трамп би можел да се одржи во рок од две недели или малку подоцна, но дека има многу работи што треба да се договорат пред да се одреди датум.
Трамп и Путин во четвртокот се согласија да одржат втор самит за војната во Украина, привремено закажан во Будимпешта, по состанокот на 15 август во Алјаска кој не донесе напредок.
Изненадувачката најава дојде пред состанокот меѓу Трамп и украинскиот претседател Володимир Зеленски, и во време кога Вашингтон размислува да го снабдува Киев со крстосувачки ракети Томахавк.
Портпаролот на Кремљ, Дмитриј Песков, им изјави на новинарите дека рускиот министер за надворешни работи Сергеј Лавров и американскиот државен секретар Марко Рубио ќе мора да договорат меѓусебен состанок за да решат голем број прашања пред самитот.
– Има многу прашања, треба да се утврдат преговарачките тимови и така натаму. Затоа, сè ќе се прави во фази, но, се разбира, волјата на претседателот е тука – рече Песков.
– (Самитот) навистина би можел да се одржи во рок од две недели или малку подоцна. Постои општо разбирање дека ништо не треба да се одложува – рече тој.
Песков нагласи дека Русија останува отворена за мирно решение за ставање крај на војната во Украина.
Русија ги обвинува Киев и неговите европски сојузници за одложување на мировните преговори. Тие, пак, ја обвинуваат дека поставува неприфатливи барања и изјавија дека не веруваат дека Путин е сериозен во врска со постигнувањето мир.
Кремљ одделно соопшти дека Путин и унгарскиот премиер Виктор Орбан разговарале по телефон во петокот за претстојниот самит и дека Орбан рекол дека Унгарија е подготвена да биде домаќин на настанот, пренесува Ројтерс.
Фото: принтскрин