Самитот на организацијата на ОН за одржлив развој Рио+20 во петокот заврши со усвојување на изјавата која треба да создаде услови за ткн зелен раст на планетата, повеќе еколошки и социјално насочено, но без конкретни задачи.

По тридневниот состанок на врвот на кој учествуваа 86 претседатели на држави и влади и други високи политички претставници од околу 188 земји со консензусот го одобрија текстот напишан на 56 страници под наслов „Иднина каква што сакаме“.

Изјавата ја поздравија Обединетите нации и САД, но невладините граѓански здруженија остро ја критикуваа поради недостигот од амбиции.

Повеќе илјади активисти го изразија своето големо незадоволство во текот на одржувањето на самитот, предупредувајќи на неуспех на Рио+20.

„Се распоредуваат лежалки на палубата на Титаник додека тој тоне“, оцени Куми Наидо, главен директор на светската еколошка организација Greenpeace International.

Самитот Рио+20 сепак утврди некои насоки за натамошна борба со несреќите што ја зафатија планетата, како што се сиромаштијата, гладот, климатските промени, ширењето на пустините и исцрпувањето на природните богатства.

Најважната одлука на самитот се смета поставувањето на „Целите за одржливиот развој – ОDD“, според урнекот на Милениумскиот самит од 2000 година на Обединетите нации. Меѓутоа, нивното дефинирање е препуштено на работна група којашто своите предлози ќе ги изнесе во 2013 година, а ќе почне да ги спроведува во 2015 година/.

Според заедничката декларација, Рио+20 се залага за ткн „зелена економија“, модел на развој помалку погубен за планетата којашто до 2050 година ќе има 9,5 милијарди жители, а денес има 7 милијарди.

Меѓутоа, поради загриженоста на сиромашните земји, одредувањето на „политиките на зелената економија“ е препуштено на секоја земај поединечно, а во завршната изјава се истакнува дека тие не смеат да бидат изговор за „прикриеното ограничување на меѓународната трговија“.

Прашањето на финансирањето, исто така, остана нерешено. Имено во период во кој трае финансиската криза и со испразнети каси, богатите земји веќе не знаат од каде да изнајдат средства. Предлогот на земјите во развој за фонд со 30 милијарди долари остана без одговор. /крај/афп/сн