Свет
Инвалидска пензија не земаат само инвалидите
Од лажните инвалиди со вистински врски кај лекарите, и од "актерите" што социјалниот спас си го гледаат во инвалидската пензија и се прават неспособни за работа, вистинските трудови инвалиди не може да дојдат на ред за пензија.
МАНИПУЛАЦИИ
Од лажните инвалиди со вистински врски кај лекарите, и од "актерите" што социјалниот спас си го гледаат во инвалидската пензија и се прават неспособни за работа, вистинските трудови инвалиди не може да дојдат на ред за пензија.
Тоа е впечатокот што ќе се добие ако се погледнат и споредат списоците со 55.000 луѓе што земаат инвалидска пензија и луѓето што додека работеле во рудник или на фабричка машина останале без рака или без нога, а денес мака мачат да дојдат до каков било месечен паричен надоместок.
Дека ситуацијата во социјалата е таква, апсурдна и неправедна, потврдува и надлежниот министер Стевчо Јакимовски. Тој вели дека низ дупките на законите или на свеста на лекарските комисии, сеедно, досега се протнале многу здрави луѓе, способни за работа, кои сега го цедат пензискиот фонд и оневозможуваат вистинските трудови инвалиди да го добијат тоа што им следува. Јакимовски вели дека искуството го научило оти инвалидите на кои навистина им треба помош не се многу упорни и агресивни пред институциите, за разлика од манипулантите, кои тврдат дека се инвалиди, а имаат сила везден да висат по шалтери или со месеци штрајкуваат.
Како најдобар пример за тоа ја посочува лидерката на штрајкот на кумановските трудови инвалиди Вера Јовановска. Според Јакимовски, само 13 од 87 штрајкувачи што со полиција без избркани од Подрачната единица на Министерството имаа законска основа да бараат пензија.
– Јовановска не е една од нив. Таа жена воопшто не е трудов инвалид, туку е потенцијален трудов инвалид. Во стариот закон имаше три вида инвалидитет: со изгубена работна способност, со преостаната работна способност и со претпоставена опасност за губење на способноста. Ова последното, на кое се повикува Јовановска, е избришано од новиот закон затоа што се злоупотребуваше. Ако тргнеме по таа основа и јас сум потенцијален инвалид, зашто од работата постојано ме боли грбот, а и уште половина милион луѓе во земјава. Дури и според стариот закон, не се добиваше пензија за тоа, туку само за целосно изгубена работна способност. Штрајкувањата со глад и онесвестувањата пред Влада се театар со кој се сака да се привлече вниманието на јавноста и да се изврши притисок врз институциите – вели Јакимовски.
Кумановката Вера Јовановска е навистина интересен социјален феномен. Досега учествувала на половина дузина штрајкови, повеќето од нив со глад. Првпат во фабриката "ЧИК" во 1994 година – 19 дена, следната година во поранешниот зграда на Комитетот – 41 ден, по што била однесена во болница, каде што била 16 дена. Во 1997 година шест месеци непрекинато штрајкувала во Подрачната единица на Министерството, а во 1998 година штрајкот пред Владата во Скопје го прекинала зашто почнала предизборната кампања. Се вратила во Скопје, овој пат во Министерството за труд, кога конечно успеала да издејствува надоместок од 3.000 денари месечно. Според Јакимовски, надоместокот требало да го добива три години, а го добивала шест. Тој контактирал и со поранешни министри и сите му рекле оти си имале работа со нејзините писма, жалби, поплаки, штрајкови…
Педесет и петгодишната Јовановска ни изјави дека полициската интервенција нема да ја обесхрабри, таа продолжува со својата борба. Меѓу два штрајка се одмора во својот дом и најавува дека ќе ја истера својата правда со другите штрајкувачи. Живее со двајца синови од административната пензија на својот сопруг и со 450 денари додатокот за телесно оштетување. Таа вели дека боледува од ангина пекторис, заболени и се бубрезите, има висок крвен притисок и анемија, а пред 15 години и била извршена хистеротомија на репродуктивните органи.
– Уште еднаш му испративме писмо на премиерот Бучковски, во кое ги истакнавме нашите барања. Тие се за исплата на заостанатите пари од Министерството за труд укинати во 2003 година до денес, како и обезбедување пари за достоен живот до нашето пензионирање – вели Вера.
Таа додава дека ако Владата го одбие првото барање, ќе бараат да им се вратат сите пари што тие ги уплатиле во Фондот за пензиско и инвалидско осигурување, со што свесно се откажуваат од пензионирање.
(Екипа на "Дневник")
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
(Видео) Пукано во канцеларијата на Камала Харис
Американската полиција објави дека пукале во предизборната канцеларија на американската потпретседателка и кандидат на демократите Камала Харис во Аризона, само една недела по вториот обид за атентат врз Доналд Трамп.
Штетата предизвикана од неколку истрели од огнено оружје е откриена во канцеларијата на Демократскиот национален комитет во населбата Темпи во градот Феникс, соопшти локалната полиција, а пренесува „Њујорк пост“.
Shots fired into Kamala Harris Arizona campaign office pic.twitter.com/9Vxpxx9Y0S
— Breaking News (@TheNewsTrending) September 25, 2024
„Никој не беше во канцелариите во текот на ноќта, но тоа предизвикува загриженост за безбедноста на оние кои работат во таа зграда, како и на оние кои се во близина“, изјави полицискиот претставник Раџан Кук.
Тој потврди дека полициските инспектори ги анализираат доказите собрани на местото на настанот, како и дека се преземени дополнителни мерки за подобрување на безбедноста на персоналот и другите луѓе кои работат и живеат на тој простор.
Според него, засега никој не е уапсен во врска со овој инцидент, но властите ги истражуваат сите можни мотиви.
Инцидентот уследи по вториот обид за атентат врз Трамп на неговиот терен за голф во Вест Палм Бич на 15 септември.
Камала Харис закажа посета на Аризона како дел од нејзината кампања за петок, а тоа треба да биде нејзина втора посета на оваа важна американска држава откако беше номинирана за кандидат за претседателските избори на Демократската национална конвенција во август.
Свет
Британски лекари тргнале четиргодишно момче од апарати, предвидувајќи му смрт: тоа преживеало
Предвидувањата на британските лекари дека четиригодишно момче ќе почине набргу откако ќе го симнат од апарати не се остварија, пишува „Sky News“.
Момчето, познато по иницијалите Н.Р., било родено со тешка мозочна малформација и поминало со месеци на интензивна нега по два срцеви застоји. Во април, судијата Најџел Пул одлучил дека останувањето на апарати за одржување во живот не е во најдобар интерес на детето, откако болницата Кингс колеџ побарала од Високиот суд да ја направи својата проценка.
Сепак, момчето „не само што преживеа, туку и напредуваше“ откако беше тргнато од вентилаторот пред повеќе од четири месеци, рече судијата Пул. Тој додаде дека Н.Р. сега сам дише. „Не се исполнија очекувањата дека Н.Р. нема да може да се згрижи дома и дека нема да живее долго по екстубацијата“, истакна тој.
Тој објасни дека некои одлуки за лекување биле донесени во јануари оваа година, кога Н.Р „страдал многу повеќе“ и дека имало „малку или никакви докази дека можел да најде некакво задоволство, освен утешниот допир на неговите родители“.
„Сега може да биде изведен надвор, на пример во парк. Може да ужива во сонцето и чувството на ветрот во косата. Живее во дом со љубов“, додаде судијата. Тој нагласи дека му било „задоволство“ да гледа фотографии од момчето дома со неговите родители.
Мајката на момчето во изјавата пред Високиот суд рече дека волјата за живот на нејзиниот син е „силна“ и дека има добар живот. „Н.Р. преживеа кога лекарите и медицинските сестри кои се грижеа за него со месеци мислеа дека не може. Заслужи нов почеток“, заклучила таа.
Свет
Во Тајланд се убиени 125 крокодили за да се спречат да избегаат за време на поплавите
Фарма за крокодили во Тајланд уби 125 влекачи поради страв дека ќе избегаат за време на поплавите во земјата и ќе го загрозат населението, изјави нејзиниот сопственик.
„Дождот ги еродираше ѕидовите на фармата и за жал моравме да убиеме 125 крокодили кои ги одгледуваме 17 години“, потврдил за АФП Натапак Хумкад, фармер во провинцијата Ламфун.
Одгледувачот рече дека тој и неговите вработени ги убиле сијамските крокодили со струја за да ги спречат да избегаат и да талкаат по селата, слободно да ги напаѓаат селаните и добитокот.
Сијамскиот крокодил, кој може да порасне и до три метри, е ендемичен вид на Југоисточна Азија кој е критично загрозен во дивината.
Одгледувачот рече дека контактирал со властите за да ги смести неговите влекачи во привремено засолниште додека поплавата не се смири, но неговото барање било одбиено бидејќи животните биле преголеми.