Злоупотребата на ветото е антиисториски и антиевропски чин што може да предизвика опасна верижна реакција на вета кој ќе го вратат регионот во 19-от век.

Злоупотребата на ветото е антиисториски и антиевропски чин што може да предизвика опасна верижна реакција на вета кој ќе го вратат регионот во  19-от век. Ова, во денешната колумна „Дозволете и на Македонија да се интегрира во Европската Унија“ во угледниот француски весник „LeMonde” го пишува Претседателот Ѓорге Иванов. „Секоја нова злоупотреба на ветото, како принцип на функционирање меѓу Европските, вклучително и Балканските држави е антиисториски и антиевропски чин. Блокадите на Република Грција за влез на Република Македонија во Европската Унија и во НАТО, доколку бидат прифатени како нова практика, ќе предизвикаат опасна верижна реакција на вета кои повторно може да не вовлечат во вртлогот на политичките анахронизми на 19-от век“, пишува Иванов. Според него, условот што и е наметнат на Македонија за евро-атлантска интеграција, не бара одрекување од името на државата, туку и од индивидуалните човекови права на граѓаните. „Ниедна земја не смее да дозволи да се кршат правата на нејзините граѓани, од ниедна страна, ниту од внатре, ниту од надвор. Никој не смее, а и не може, да дозволи со акт на јавното право да се задира во доменот на приватноста, во доменот на индивидуалните човекови права. Едноставно, невозможно е да се прифати а уште помалку да се имплементира решение кое ќе има такво дејство“, се вели во колумната на Иванов. Во својата колумна, Иванов констатира дека европската интеграција е единствениот пат кон траен мир на Балканот. „На Балканот му е потребна Европската Унија во нејзината изворна идеја- како мировен проект кој обединува поранешни непријатели“, потенцира Иванов. Колумната на Иванов е објавена на воведното место во едиторијалните страници на „LeMonde”, каде што свои текстови објавува целата светска интелектуална политичка елита. Ова е прв пат да биде објавен текст на еден македонски претседател. /крај/со/ач