Според грчки дипломатски извори, Папандреу на средбата му порачал на Груевски дека Грција посакува да има водечка ролја за интеграција на Балканот во Европската Унија до 2014-та, кога се одбележува сто годишнината од балканските војни

Неформална средба на премиерите на Македонија и Грција, по долги години замрзнати контакти на највисоко ниво. Премиерите Никола Груевски и Јоргос Папандреу, денеска во Брисел имаа 15 минутна средба на која станало збор за решавање на долгогодишниот спор околу името.По средбата македонската влада соопшти дека изнаоѓањето заемно прифатливо решение за името останува есенцијално и за Македонија и за Грција, како и тоа дека двете земји ја потврдуваат нивната заложба за европска иднина на Балканот. Според грчки дипломатски извори, Папандреу на средбата му порачал на Груевски дека Грција посакува да има водечка ролја за интеграција на Балканот во Европската Унија до 2014-та година, кога се одбележува 100 годишнината од балканските војни. Грција, според извори во кабинетот на грчкиот премиер, посакува и Македонија да се приклучи на Унијата до 2014 та, но како што рекол Папандреу прв и основен услов за тоа е решение на спорот со името. Решавањето на билатералниот проблем е неопходно за Македонија да добие датум за почеток на преговори со името, а решението треба да биде име со географска одредница кое ќе важи за севкупна употреба. Истовремено, Папандреу порачал дека ако се реши проблемот со името двете земји може да развијат исклучително блиска соработка.  На средбата Груевски – Папандреу не биле спомнувани подробности во врска со преговорите, ниту пак станало збор за евентуален референдум. Било заклучено преговорите да продолжат во Обединетите Нации, а од кабинетот на грчкиот премиер информираат дека нема никаква причина, ниту повод, двете земји директно да преговараат. Иницијативата на Папандреу за директна средба со Груевски, наспроти досегашниот ригиден став на Караманлис и неговата влада придонесуваат за подобра клима во преговорите и шанса тие да се решат без идеолошката оптовареност на грчката десница. Но и покрај иницијативата на Папандреу за европска иднина на Балканот и добрата волја за тет-а-тет средба, судејќи според информациите од кабинетот на грчкиот премиер, владата на ПАСОК не се повлекува ниту за милиметар од таканаречената црвена линија на Атина во преговорите, а тоа е едно име со географска одредница кое ќе важи ерга омнес, и блокада на евроатлантската интеграција на Македонија се додека не се изнајде решение за името. Сепак, влијателни колумнисти во грчкиот печат порачуваат дека не постојат преговори со црвени линии, што укажува дека опсегот на употребата на името кое би ја заменила референцата ФИРОМ ќе биде предмет на преговори со медијаторство на посредникот Метју Нимиц.