Македонија
Во функција ќе биде ставен главниот транспортен систем за јаглен
Во сабота во РЕК Битола ќе биде пуштен во употреба Главниот транспортен систем за јаглен од површинскиот коп Брод – Гнеотино до површинскиот коп Суводол, во износ од 18,6 милиони евра, во присуство на премиерот Никола Груевски, кој е во посета на битолскиот регион.
Со овој проект на АД ЕЛЕМ се заокружува производниот процес во новиот површински коп Брод – Гнеотино, директно се зајакнувааат можностите и ефикасноста на трите рудници и се продолжува животниот век на РЕК Битола.
Транспортниот систем за јаглен има траса во должина од речиси десет километри, брзината на движење на гумената лента изнесува 4,8 метри во секунда, неговиот капацитет е 3.800 тони јаглен на час. Системот а го сочинуваат пет секции со пет погонски станици, како и комплетна инфраструктура од натпатници и испусти за одводнување.
Димензиониран е во иднина покрај транспорт на јагленот од рудникот Брод – Гнеотино, да го преземе и да го транспортира и јагленот кој би се експлоатирал од новото јагленово лежиште во Живојно. Така, како што најавуваат од АД ЕЛЕМ, се обезбедува долгорочен континуитет во испораката на јаглен за потребите на термоелектраните Битола.
Проект се реализира со финансиска поддршка од германската Deutsche Bank AG преку средства обезбедени со кредит во висина од 16 милиони евра со период на отплата од десет години, како и 2,6 милиони евра сопствени средства на АД Електрани на Македонија.
Производството и монтажата на системот ја изврши германската компанија ThyssenKrupp AG во соработка со повеќе фирми во својство на подизведувачи.
„Со реализација на овој капацитет наменет за континуиран, брз и ефикасен транспорт на јагленот од извозната рампа на усекот на новиот површински коп Брод – Гнеотино, до истоварното место на јагленовиот систем во рудникот Суводол, ќе се заокружи процесот на ископ, експлоатација и испорака на најмалку два милиона тони јаглен на годишно ниво од површинскиот коп Брод – Гнеотино. Овие количества јаглен, заедно со јагленот од постојниот рудник Суводол и од Подинската јагленова серија на рудникот Суводол, се очекува да го исполни потребниот минимум од шест милиони тони јаглен годишно, потребни за непречено производство на електрична енергија од ТЕ Битола“, се вели во најавата од АД ЕЛЕМ./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајот непречено по наместа влажни коловози
Сообраќајот на државните патишта се одвива непречено, по наместа влажни коловози. Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата, соопшти АМСМ.
Се препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Патниот правец Охрид – Ресен, преку националниот парк Галичица од 01.04.2024 е пуштен за сообраќај за сите видови возила со вкупна тежина до 3.5 тони.
Времена измена на режим на сообраќај на регионален пат Р1101 делница Прилеп – Битола заради интезивирање на градежни активности во врска со проект “Санација на трупот на патот кај мост на река Шемница на Државен пат Р1101 км 85+903, делница Прилеп – Битола”, и тоа од 27.03.2024 ќе има целосно затворање на делницата.
На 26.03.2024 година од 14.15 часот извршена е времена измена на режимот на сообраќајот на делницата од автопатот 300м после надвозник „Маџари“ до клучка „Белви“ за време на поправка и рехабилитација на државен пат А1/А2 делница Скопје-Куманово (десна коловозна лента) каде што со ветикална сообраќајна сигнализација во должина од 200м сообраќајот се канализира и успорува од левата (за претекнување) сообраќајна лента во средната (за возење) сообраќајна лента за да потоа во должина од 1500м целиот сообраќај ќе се одвива по сообраќајната лента за претекнување (левата), а средната и сообраќајната лента за принудно запирање ќе бидат затворени за сообраќај.
Од 18.03.2024 г. има измена на режимот на сообраќај на државниот пат Р1101, делница Прилеп – Битола, заради интезивирање на градежните активности во врска со проект Санација на патот, кај мост на река Шемница.
Македонија
Г.г. Стефан: Да ги зацврстиме единството и слогата, да ги надминеме разногласијата и меѓусебните поделби
Ариепископот Охридски и македонски заедно со Светиот архиерејски Синод, по повод велигденските празнувања, испраќа мир и благослов од Бога до свештенослужителите, монаштвото и до сите чеда на МПЦ-ОА.
– Христовото воскресение е смислата на нашето севкупно постоење. Тоа е стожерот околу којшто се одвива сиот наш живот и камен-темелникот врз којшто се гради сиот наш подвиг на верата, на надежта и на љубовта во Бога. Тајната на Христовото воскресение го преобразува и го вообличува севкупниот наш поглед кон светот и човекот, кон времето и вечноста. Зашто, токму ова спасоносно собитие е најголемата вистина којашто му беше објавена на човековиот род и токму оваа Тајна над тајните е најрадосното благовестие со коешто велегласно беше возвестена конечната победа на животот над смртта, на доброто над злото и на љубовта над омразата, вели г.г. Стефан меѓу другото во обраќањето.
Македонија
Времето денеска сончево и потопло
Времето денеска во земјава ќе биде претежно сончево и потопло, попладне во планинските подрачја со услови за краткотраен пороен дожд и ретки грмежи. Ќе дува слаб ветер од јужен правец. Минималната температура ќе биде во интервал од 3 до 10, а максималната ќе достигне од 18 до 25 степени.
Во Скопје претежно сончево и тивко. Минималната температура ќе се спушти до 7, а максималната ќе достигне до 24 степен.
Утре времето ќе биде претежно сончево и топло, попладне во планинските подрачја со услови за краткотраен пороен дожд и ретки грмежи. Во вторник попладне ќе има локална појава на нестабилност, а во среда и четврток под влијание на нов влажен бран во поголем дел од земјава ќе има пороен дожд и грмежи, локално во форма на невреме со пообилни врнежи и засилен ветер.