Надворешна политика
Груевски – Соботка: Чешка го поддржува членството на Македонија во ЕУ и НАТО
Чешка целосно ја поддржува Македонија во нејзините подготовки за влез во ЕУ и НАТО, истакна во четвртокот чешкиот премиер Бохуслав Соботка по средбата со премиерот Никола Груевски во Прага.
Чешка цени кога се исполнети условите, и смета дека нема потреба да се ограничува членство во НАТО и преговорите со ЕУ, пренесува МИА.
„Ние и натаму ќе бидеме активни во поддршката на проширувањето на ЕУ и НАТО што се однесува на Македонија. Чешката Република долго време ја поддржува Република Македонија на нејзиниот пат кон европските и атлантските интеграции и имаме позитивни оценки за чекорите кон подготовка на Македонија за членство во овие организации“, нагласи Соботка.
Соботка додаде дека Чешка на Македонија ќе и’ го даде на располагање своето искуство за членството во ЕУ и имплементирањето на европското право и стандардите на Унијата.
Според него, пристапот кон евроинтеграциите на земјите од Западен Балкан и северноатлантските структури Чешка го гледа како пат кон стабилност и просперитет во цела Европа.
„Чешката Република жали што досегашниот став на Грција до некоја мера го блокира влезот на Република Македонија во ЕУ“, истакна Соботка, поздравувајќи ја добрата волја на Македонија да се најде политичко решение на оваа ситуација.
Премиерот Груевски рече дека Македонија високо ја цени принципиелната и конзистентна чешка поддршка за што поскоро и безусловно отпочнување на пристапните преговори за членство на Македонија во ЕУ, според веќе применетиот пристап на паралелно одвивање на преговори за членство во Унијата и на разговори за надминување на билатерална разлика со земја членка.
„Република Македонија високо ја цени и почитува и заложбата на Чешката Република за европската интеграција на сите земји од Западниот Балкан, и таа чешка заложба претставува потег на лидерство“, истакна Груевски.
Груевски, исто така, го информирал Соботка дека македонската Влада продолжува со силно темпо и посветеност на спроведување реформи кои значат унапредување на сите општествени сфери, со исполнување на европските стандарди, со натамошна трансформација и модернизација на македонското општество и држава и со политиката на добри односи со сите соседи, особено со проактивен пристап во разрешувањето на билатералната разлика со Грција, која покрај почетокот на пристапните преговори со ЕУ, како што рече, ја попречува и нашата покана за членство во НАТО веќе шест години.
Двајцата премиери се согласни дека има голем потенцијал за економска соработка во двете насоки, а недвосмислената политичка поддршка за Македонија од Прага, треба да се преточи и во економијата.
Соботка и Груевски позитивно ги оценија меѓусебните билатерални и мултилатерални односи кои, како што истакнаа, се развиваат во духот на пријателството и меѓусебното почитување. Изразија задоволство и од континуираниот дијалог кој се одвива помеѓу двете страни, за што, според нив, придонесуваат и големиот број средби на највисоко ниво. Тие присуствуваа и на потпишување Меморандум за разбирање меѓу Центарот за управување со кризи на Македонија и чешката Противпожарната служба.
Груевски заедно Соботка ќе го отворат и Бизнис форумот за трговски и инвестициски можности на чешките компании во Македонија, каде претставници на чешки компании ќе имаат можност да ги презентираат своите проекти пред претставници на македонското Министерство за економија и Агенцијата за странски инвестиции.
Во делегацијата предводена од македонскиот премиер се и минисерот за надворешни работи Никола Попоски, заменик министерот за економија Христијан Делев и заменик директорот на Агенцијата за странски инвестиции Климент Шекеровски./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.