Владата на Република Македонија била спремна, спротивно на препораките на ММФ и на Светска банка, повторно да ја „подржави“ Поштенска банка за премиерот Бучковски да биде тој што ќе потпише договор за влегување на странскиот инвеститор ИНГ во Македонија

Владата на Република Македонија била спремна, спротивно на препораките на ММФ и на Светска банка, повторно да ја „подржави“ Поштенска банка за премиерот Бучковски да биде тој што ќе потпише договор за влегување на странскиот инвеститор ИНГ во Македонија. Според предложениот акциски план, Владата најпрво за 4 милиони евра требало да ги купи акциите на Еуростандард-банка (66 отсто) во Поштенската банка и потоа пакетот конечно да и го продаде на ИНГ-банка. Ваквиот владин план требало да се реализира за време на официјалната посета на премиерот Бучковски во Холандија, на 16 октомври. На 7 октомври акцискиот план требаше да биде на дневен ред на владината седница. Расправата за тоа е одложена по спротивставувањето на Еуростандард-банка за таква купопродажба, која е сосема спротивна на веќе договорената.

Политичките планови и спектакли се една работа, а веќе преземените договори и обврски се нешто сосема друго, велат упатени банкарски извори. Имено, Владата, односно Никола Поповски, како министер за финансии, веќе потпиша писмо на намери со ИНГ-банка (на 12 септември) за конечно завршување на влезот на оваа банка во Поштенска банка до 25 декември годинава. Ова значи дека Владата и Народната банка на Македонија се согласни ИНГ да ги купи акциите на Еуростандард-банка во Поштенска банка заедно со дел од државните акции во оваа банка (33 отсто). Претходниот таков обид за купување на акциите на Поштенска банка од страна на државата од претходните акционери („Европа ’92“ и НОЕЛ) министерот Поповски го одби. Неговото образложение тогаш беше дека ММФ и Светската банка препорачуваат државата да го отуѓува државниот капитал, а не да го зголемува. Тоа беше во април. Во октомври истата година истата влада има друг план.

Помеѓу Еуростандард банка, Поштенска банка, ИНГ-банка, НБМ и Министерството за финансии на Македонија веќе се потпишани неколку протоколи и писма на намери, според кои влегувањето на ИНГ-банка во Македонија би завршило на 25 декември. Како што дознаваме, управниот одбор на ИНГ-банка веќе е запознаен со ваквиот непредвиден тек на настаните и се очекува деновиве да го соопшти својот конечен став.

Според Статутот на Поштенска банка (член 18), прифатен од НБМ, акционерите на банката не се обврзани прво да ги понудат акциите за продажба на внатрешните акционери, а потоа на потенцијалните надворешни купувачи. Акционери на Поштенска банка се Еуростандард-банка (66,66 отсто) и ЈП „Македонски пошти“ (33,33 отсто). А.Д.