Македонија
Уставен суд : Фрчкоски доцна се пожали за тужбата од Груевски
Уставниот суд денеска соопшти дека нема да поведе постапка за утврдување на заштита на слободата и мислата поднесена од професорот Љубомир Фрчкоски, поради доцнење во процедурата
Професорот Љубомир Фрчкоски побарал од судот да ја разгледа пресудата со која е осуден за клевета и навреда, а го тужеше премиерот Груевски. Но професорот задоцнил повеќе од една година.Според законската регулатива барањето до Уставниот суд, проф. Љубомир Фрчкоски требало да го достави најдоцна два месеца по добивањето на правосилната пресуда од Апелациониот суд.Пресудата Фрчкоски ја добил во јули 2009, а жалбата до Уставен е доставена во декември 2010 г. Во барањето Фрчкоски навел дека бара заштита на слободата и мислата за што е надлежен Уставниот суд.По околу една година неуспешни обиди за вонсудско помирување, во јули 2008 г. почна судскиот процес во кој премиерот Никола Груевски го тужеше професорот Љубомир Фрчкоски за клевета, навреда и за омаловажување. Станува збор за колумна на Фрчкоски објавена во Дневник на 4-ти септември 2007 г. со наслов „ОКТА вис-а-ви Кољо дијамантот“, за делот во кој Фрчкоски прашува дали е склучен „штетен договор или договор од глупост и корупција или двете заедно“, обвинувајќи го Груевски за штетен договор како тогашен министер за финансии.Одбраната на Фрчкоски бараше да биде презентиран оригиналот од текстот, затоа што како што наведе одбраната на професорот „можно е да имало редакциски интервенции, односно дека може да недостасувале или да биле додадени неколку зборови“.Сепак правните застапници на Груевски го доставија оригиналот од текстот објавен во Дневник.Во судскиот процес Груевски против Фрчкоски, премиерот бараше надомест на штета од сто илјади евра, односно шест милиони денари, а судската пресуда, во која тој ќе биде огласен за виновен, да биде објавена во сите електронски и печатени медиуми на трошок на Фрчкоски. На крајот беше пресудена отштета во висина од 30 илјади евра, коишто премиерот Никола Груевски ги донира во хуманитерни цели. Тој минатат седмица при поделувањето на новогодишни пакетчиња во Домот за деца без родители „11 Октомври“ во Скопје, донираше и компјутери и 10 илјади евра кои тој ги доби како отштета во судскиот спор со Љубомир Фрчкоски. Покрај Домот за деца без родители, по 10 илајди евра ќе добијат и Центарот за деца со церебрална парализа и Домот за доенчиња во Битола.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Скопскиот булевар „Кочо Рацин“ во мрак, луѓето со блиц од мобилен минуваат на пешачки (ВИДЕО)
Скопскиот булевар „Кочо Рацин“, на кој се наоѓа автобуската станица „Југодрво“, веќе неколку денови е во мрак. Уличните светла долж булеварот не работат, а улиците околу булеварот исто така не се осветлени – единственото светло на него доаѓа од становите на соседните згради.
Мракот ја загрозува безбедноста на пешаците и велосипедистите кои ги преминуваат пешачките премини и кој светат со блиц од мобилните за да поминат.
Граѓанската иницијатива „Шанса за центар“ ги повикуваат Град Скопје и градоначалничката Данела Арсовска да го вратат осветлувањето на булеварот, но досега нема никаква реакција од нив.
Оттаму, „Шанса за центар“ синоќа постави трепкачи за велосипед кај пешачките премини на „Кочо Рацин“, за да привремено „малку од малку“ ја подобрат состојбата на улицата.
Македонија
Обвинителството истражува дали има кривична одговорност за затворените хируршки сали и смрдеата во „Клинички“
Министерството за здравство прати известување до Обвинителството за затворените хируршки сали во Клиничкиот центар „Мајка Тереза“, кое е примено и распоредено кај јавен обвинител. Ќе се преземат дејствија за да се провери дали во настанот воопшто има елементи на кривично дело, соопштуваат од ОЈО Скопје.
Од ОЈО посочуваат дека Обвинителството постапува и гони само доколку има кривично дело.
Како што вчера објавивме, само во три сали во комплексот клиники „Мајка Тереза„ во моментов се извршуваат исклучително итни операции. Останатите сали веќе 7-ми ден се затворени, поради ширеење на непријатна миризба.
За состојбите на клинички центар вчера на прес-конференција реагираше портпарол на ВМРО-ДПМНЕ, Наум Стоилковски, кој рече дека цела недела, од минатата сабота трае проблемот со системот односно цевководот за кислород до операциски сали, цела недела нема испитување што е, што мириса, дали е загадено, дали навистина има јаглерод диоксид, како и дека во меѓувреме, со потпис со лична согласност, луѓе се оперираат на сопствен ризик.
Македонија
Детали за ноќната спасувачка мисија: Го лепеле чамецот и им фрлале вода на заглавените пред да ги извлечат живи (ФОТО+ВИДЕО)
Четирите лица, меѓу кои и седумгодишно дете се лоцирани и најдени, соопштија утрово од ЦУК. Ноќната спасувачка акција не била лесна бидејќи се работело за исклучително стрмен и опасен за движење, па тие биле извлечени со чамец.
„Тие по исклучително стрмниот терен успеале да се спуштат на десниот брег на реката Пчиња на непристапно место над – пред манастирот ‘Мала Богородица’, во клисурата на реката Пчиња, под автопатот Скопје – Велес, од каде што по земјен пат не можеле да се извлечат во текот на ноќта. Тим спасители со пловење со чамец по Пчиња, од Катланово, па сѐ до локацијата на изгубените во клисурата на реката под самиот автопат, со голем напор и несебично залагање безбедно ги пронајдоа и ги извлекоа од десниот речен брег на левиот, а потоа безбедно ги качија на автопатот“, информираат од ЦУК.
По добиената информација преку 112 во ЦУК, Регионалниот ЦУК Велес веднаш комуникациски координирал за пронаоѓање со СВР Велес, ДЗС Велес и Општина (ЕЛС) Велес, по што од Велес дојде од општината и Тим спасители на вода од доброволното друштво „Македонски спасител безбедност на вода и планина Велес“ со специјален спасувачки чамец.
„Тимот спасители на вода од Велес, а со поддршка и на тим од припадници на САЕ ‘Тигар’, тргнаа од Катланово пловејќи по Пчиња во обид да се пробијат до местото каде што се наоѓаат лицата за да ги префрлат од другата страна на реката, околу 300 до 500 метри над манастирот ‘Мала Богородица’ којшто се наоѓа во клисурата на Пчиња под самиот автопат. Во реката, спасителите наидоа на многу препреки коишто мораа да ги преминат буквално пренесувајќи го на раце чамецот, на некои места, а на едно место дупнатиот чамец и на терен го лепеа, по што продолжија. Студенилото, мракот и влажноста дополнително отежнуваа, но и залутаните лица, исто така, беа изложени на студенилото на ноќта бидејќи имале само лесна дневна облека, маички на кратки ракави. Таквите услови ја диктираа континуираната динамика што спасителите ја реализираа со голем напор, но и со голема волја да се помогне оптимално брзо, а безбедно за сите“, соопштија од ЦУК.
На местото на настанот, долу во длабоката и опасно стрмна клисура, се спуштил и директорот на ЦУК, Стојанче Ангелов, заедно со таткото, еден од родителите на дел од лицата.
Во заедничка комуникација преку реката, со залутаните лица, тие биле успокоени и дека е прашање само на време кога ќе бидат извлечени. За тоа време, како што информираат од ЦУК, имало обиди да им се фрлат шишиња со вода за да не дихидрираат бидејќи нивната вода завршила.
Во време нешто по 02.00 по полноќ, лицата се безбедно префрлени преку реката Пчиња и извлечени горе на автопатот, од каде што со возила се превезоа во нивните домови во Скопје.
Директорот на ЦУК, Ангелов изразува голема благодарност на сите ангажирани во спасителната акција за безбедно пронаоѓање и префрлање преку реката со чамец и извлекување на лицата што беше многу специфична, но успешно се реализираше од страна на сите присутни на терен, а и дежурни во Системот за управување со кризи.