Македонија
Хелсиншки комитет загрижен за насилните протести во Ѓорче Петров
Хелсиншкиот комитет за човекови права изрази сериозна загриженост за ескалацијата на омразата на етничка основа која настана по убиството на младиот Ангел Петковски.
„Омразата која беше забележана на протестите е еднакво застапена и кај младата и кај постарата популација, но беа забележани и сериозни повици за насилство врз албанската заедница што може да претставува основа за влошување на и онака кревките меѓуетнички односи”, велат од Хелсиншки.
Од таму истакнуваат дека изминативе две години постојано предупредувале дека насилството помеѓу младите и омразата ескалираат и не се забележуваат тенденции на опаѓање и додаваат дека бројот на инциденти, насилство и телесни повреди помеѓу младите од албанската и македонската етничка заедница се во пораст.
Комитетот потсетува дека малкуте апели за смирување на тензиите од страна на носителите на извршната власт очигледно не придонесуваат за спречување на меѓуетничкото насилство.
„Република Македонија не се справи соодветно со последиците од конфликтот во 2001 година и не презема активности за помирување и зближување на двете заедници, а особено кога станува збор за младите и нивното воспитување и образование во духот на соживот и толеранција, наспроти изразениот национализам и пропаганда што се провлекува во училиштата, јавниот простор и семејството”, се вели во соопштението на комитетот.
Од таму додаваат дека помирувањето нема да се случи сè додека носителите на јавни функции без оглед на нивната етничка припадност одбиваат заеднички да се издигнат над своите партиски интереси и продолжуваат со националистичката пропаганда која единствено резултира со постигнување на краткорочни политички цели.
„Хелсиншкиот комитет ги набљудуваше насилните протести во текот на вчерашниот ден и констатира дека и во оваа прилика иницијатори за овие настани се младите луѓе меѓу кои и малолетни лица. Иако полицијата во најголем дел соодветно се справуваше со разгневената толпа, од страна на неколкумина новинари комитетот беше известен за одземање на фото и видео материјал направен за време на протестите. Ваквото постапување е флагрантно прекршување на членот 16 од Уставот на РМ преку кој се гарантира слободата на јавното информирање, примање и пренесување на информации и се забранува цензурата”, се вели во соопштението до медиумите од Хелсиншкиот комитет.
Од таму додаваат дека во конкретниот случај станува збор за своеволно уништување на лична сопственост без за тоа да постои судска одлука./крај/мф/ап
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.