Тендерот за снабдување со топлинска енергија пропадна, но РКЕ, најверојатно, ќе и’ наложи на “Топлификација” да продолжи со снабдување на граѓаните со топлина

Меѓународниот тендер што го распиша Регулаторната комисија за енергетика за да ги снабдува граѓаните на Скопје со топлинска енергија остана без одглас, односно никој не се јави во предвидениот рок до 10.јуни. Тендерот беше распишан затоа што „Топлификација” лани ја врати лиценцата за снадбудање, затоа што од таа дејност бележеше загуби поради, како што тие тврдеа, лошата методологијата за пресметка на цената.Forum.com.mk вчера ја посети Регулаторната комисија за енергетика. Претседателот Димитар Петров и комесарот Бранко Брајковски ни’ потврдија дека не размислуваат за распишување нов тендер за ова јавна дејност, туку дека водат интензивни контакти со Министерството за економија и градските власти, со среиозна намера до крајот на овој месец да и’ наложат на „Топлификација” и понатаму да го снабдува градот со топлинска енергија, согласно чен 51 од Законот за енергетика. “Топлификација” вчера ги доставила пресметките за снабдување до Регулаторната комисија, која треба да донесе конечна одлука откако ќе ги разгледа.”Не знаеме како ќе постапиме се’ додека не се обработат сите податоци. Бидејќи се работи за компанија што врши јавна дејност, „Топлификација” треба да продолжи со снабдување се’ додека некој друг не се пријави за лиценцата. Разврската ќе се знае до крајот на август, но работиме на тоа граѓаните зимава да не останат без парно греење” – вели Димитар Петров, претседател на РКЕ.Forum.com.mk денеска не успеа да стапи во директен контакт со Топлификација за да биде пренесен и нивниот став, иако се свесни дека Регулаторната комисија има мандат за да им нареди да продолжат со снабдување на топлинска енергија.”Но тогаш, тој што издал таква наредба ќе мора да ни ги покрие загубите. Ако беше едноставно да се работи, ние се’ уште ќе го снабдувавме градот со топлинска енергија. Кога никој не се пријавува на јавен повик, кој е отворен и за странци, тоа значи дека пропишаните услови се лоши. Неколку години предупредуваме дека методологијата е неисправна, но никој не обрнуваше внимание. Ќе се пријавиме на јавниот повик само ако се сменат условите пропишани во него” – беше вчерашното објаснување од „Топлификација”до јавноста. Според пресметките на компанијата, со новиот начин на наплата на испорачаната топлинска енергија собрале 3,5 милиони евра помалку отколку кога наплаќале паушално. Незаинтересираноста за снабдувањето со топлинска енергија, според познавачите, се должи на загубите во наплатата, како и на фактот што новата фирма-снабдувач ќе треба да плаќа и за користењето на топлификациската мрежа, што е во државна сопственост. Истовремено, новиот снабдувач ќе треба да инвестира и во поставување на мерачите, а парите подоцна да си ги врати преку наплатата на сметките.Освен од лиценцата за снабдување, „Топлификација” се откажа и од лиценцата за дистрибуција на топлинска енергија. Со тоа, во новата грејна сезона единствено ќе има лиценца за производство на топлинска енергија. Се очекува есенва Регулаторната комисија да распише јавен повик и за нов дистрибутер на топлинска енергија.