Одговорот на асиметричните и неконвенционални закани, предизвиците на кибернетичка безбедноста, енергетската сигурност и предизвиците на енергетската ефикасност бараат многу поголема вклученост отколку само воена акција, рече државниот секретар во министерството за одбрана Сашо Стефаноски во средата на отворањето на дводневната работна средба во Скопје меѓу експерти од Македонија и Албанија на темата примена на Меѓународното хуманитарно право при операции на НАТО

По тој повод, државниот секретар во Министерството за одбрана, Сашо Стефаноски, истакна дека заштитата на цивилите и ширењето на хуманоста, при постигнување на оперативен успех, како и заштитата на воениот и цивилниот персонал се од суштинско значење, истовремено додавајќи дека научените лекции укажуваат на фактот дека оперативниот успех произлегува од оперативната легитимност која се поврзува со почитувањето на базичните принципи на меѓународното право.

„Одговорот на асиметричните и неконвенционални закани, предизвиците на кибернетичка безбедноста, енергетската сигурност и предизвиците на енергетската ефикасност бараат многу поголема вклученост отколку само воена акција“, посочи државниот секретар Стефаноски, укажувајќи на тоа дека сојузниците и земјите-партнери мора да ги имаат дипломатијата, информациите и економијата како инструменти за одговор на предизвиците и неутрализација на непосредните закани за граѓаните.

Во тој контекст, координаторот на активноста, доц. д-р Методи Хаџи Јанев, додаде дека оваа работилница ќе се осврне на повеќе значајни и сензитивни теми како кибернетичка и енергетската безбедност, употребата на беспилотните летала и асиметричните закани.

Дводневната обука има за цел на учесниците да им ги долови современите предизвици кои се исправаат за време на НАТО водените операции со особен акцент на предизвиците од меѓународното хуманитарно право. Воедно, предавачите во текот на предавањата ќе стимулираат и развијат дискусија за наведената проблематика со цел преку критичко размислување да придонесат кон размена на најдобрите практики и научени лекции, но и да придонесат кон изнаоѓање на практични решенија.

Оваа обука е значајна и поради тоа што покрај интерресорската соработка на Министерството за одбрана со другите органи на државната управа, Министерствата за внатрешни, надворешни работи, Центарот за управување со кризи, Дирекцијата за заштита и спасување, Агенцијата за разузнавање, Управа за финансиско разузнавање, на истата присуствуваат и претставници од НАТО советодавниот тим и од Евроатлантскиот совет на Македонија. Таа е прва ваква иницијатива на регионално ниво и со неа се прави чекор напред во прилагодување на современите трендови во безбедноста и одбраната, со што Министерството за одбрана активно продолжува со напорите за јакнење на регионалната соработка, но и со напорите за достигнување на стратешката цел – интеграција во евроатлантски структури./крај/мф/сн