Претседателот Ѓорге Иванов по повод одбележувањето на 20 годишниот јубилеј од основањето на Армијата на Република Македонија донесе указ со кој се одликува Националната гарда на Вермонт, САД со Орден за воени заслуги.

Овој Орден Иванов го доделува за особен придонес за успешно остварување и за унапредување на односите и соработката меѓу вооружените сили на САД и вооружените сили на Македонија и нивно заедничко учество во меѓународните мисии.

Иванов испрати и писмо до генерал-полковник Мајкл Дуби, во кое му го честита неговото унапредување во генерал-полковник и преземањето на новата функција – заменик командант на Северната команда на Соединетите Американски Држави.

„Ја користам оваа пригода да ја изразам мојата искрена благодарност за Вашиот придонес во развојот на партнерството меѓу Армијата на Република Македонија и Националната гарда на Вермонт. Ова партнерство придонесе за зајакнување на врските меѓу народите на Република Македонија и Соединетите Американски Држави, врски кои постојано се прошируваат и во области како што се образованието, здравството и културата“. се вели во писмото коешто ќе биде прочитано и на свечената церемонија која ќе се одржи во вторник во Пентагон.

По повод 20-годишниот јубилеј од основањето на АРМ, Иванов донесе и три указа со кои со Орден за воени заслуги го одликува Полкот за специјални операции на Армијата на Република Македонија, за исклучителен придонес во јакнењето и развивањето на одбранбената способност на Република Македонија во зачувувањето на нејзината независност, безбедност и територијален интегритет.

Со Орден за воени заслуги е одликуван и генерал-потполковник Митре Арсовски, како и Воената акедемија на Турција, за постигнатите резултати во остварувањето на воената соработка, особено преку едукација на припадници на Армијата на Република Македонија, со што даде исклучителен придонес за  развојот на пријателските односи меѓу Република Македонија и Република Турција./крај/со/мф