Доколку Тодоров го повлече неговиот предлог од собраниска процедура и одреден период го стави во мирување, тогаш останува поканата за средба и дискусија помеѓу него и професорите, заклучи денеска Универзитетскиот Сенат на УКИМ на својата вонредна седница.  „Ако министерот се повлече од предлогот, односно го повлече од собраниска процедура, тогаш останува нашата покана за средба и дискусија за предложените измени во законот,“ рече за Макфакс, Владимир Петрушевски, професор на Природно-математички факултет и Сенатор во Универзитетскиот Сенат.Министерот Тодоров денеска директно не одговори дали ќе го одржи првичното ветување и ќе присуствува на Универзитетскиот Сенат закажан за овој петок и дали ќе го прифати предлогот на професорите да разговара со нив.„За мене не е битно дали поединци, па дури можеби и групи, сметаат или одбиваат да прифатат дека професорот треба да држи предавање, сметаат дека професорите не треба да се бават со наука, што е еден од основните услови за подигнување на квалитетот на образованието и сметаат дека јавните универзитети не треба да даваат отчет за тоа како се трошат средствата од студентите. За мене е битно каква Македонија ќе имаме за 10 години, за мене е битно дали мојата генерација ќе биде дел од таканаречената „загубена генерација“ на транзицијата или ќе успееме Македонија да стане развиена држава во која ќе има брз економски и општествен развој“, рече тој.За професорите пак ова се само изговори кои министерот ги прави за да одбегне директна средба со нив и да ги образложи најавените измени. „Тоа се глупости и изговори“, рече Петрушевски за Макфакс.Предложените измени на законот за високо образование беа прифатени од Владата и тие влегоа во законска процедура. Професорите повторно се изненадени од ваквата постапка на министерот, особено откако тој на нивниот протест ја прифати отворената покана од универзитетските професори да дојде оваа недела на закажаната седница на Сенатот и пред нив да го одбрани својот предлог. По усвојувањето на измените од страна на Владата, за предлогот треба да расправа и одлучува и Собранието.Голем дел од академската заедница влезе во отворен конфликт со Министерот за образование и наука, Никола Тодоров, поради неговиот предлог за измени во законот за високо образование, кои вклучуваат построги критериуми за станување доцент, асистент и професор, објавување на повисок број научни трудови, отчет на јавните универзитети пред Собранието и јавноста, самоевалуација на професорите итн. Дел од професорите измените ги сфатија како упад во автономијата на универзитетите. /крај/ко