ВМРО-ДПМНЕ обвини за заговор на СДСМ и на ВМРО-Народна при донесувањето на измените на законот за службената злоупотреба

ВМРО-ДПМНЕ обвини за заговор на СДСМ и на ВМРО-Народна при донесувањето на измените на законот за службената злоупотреба

Претседателот затечен од одлуката на пратениците

ОЛИВЕРА ВОЈНОВСКА

ВМРО-ДПМНЕ вчера обвини дека СДСМ и ВМРО-Народна во петокот во сенка на законските измени во функција на изборите и пред гласањето за законот за судови, го протуркале и амандманот за бришење на казната за пречекорување на службеното овластување. Оваа партија тврди дека од медиумите дознала оти парламентот изгласал ваква законска измена.

Во ВМРО-ДПМНЕ ваквата постапка ја оквалификуваат како упад во системот на гласање, бидејќи иако листингот  покажува дека нивни пратеници го поддржале амандманот поднесен од Жарко Караџоски, тие воопшто и не биле во салата.

Затечени беа и во Кабинетот на претседателот Бранко Црвенковски каде  што,исто така, не знаеја дека се направени вакви измени во Кривичниот законик и напомнуваат дека во времето кога тие биле направени, Црвенковски бил во Солун. Од Кабинетот велат дека го виделе само образложението на предлогот од Владата, "каде што нема ниту збор" за злоупотребата на службената должност.

Црвенковски вчера почнал консултации со правни експерти околу направената измена на Кривичниот законик и во овој дел, по што ќе го изгради ставот дали ќе го потпише законот.

Во политичките кругови ваквото решение се толкува како отворање пат за амнестирање на функционерите од поранешната власт кои ги злоупотребиле позициите, меѓу кои беа  Војо Михајловски, Ламбе Арнаудов, Драган Даравелски и други. Исто така, се тврди, дека на ваков начин се затвораат можностите и за  повикување на кривична одговорност и на сегашните функционери,  доколку ги пречекориле овластувањата. Премиерот Владо Бучковски, пак, тврди дека измената погрешно се толкува и оти казнивото дело не се укинува, туку само се преформулира. Тој ги отфрла обвинувањата за сојузништво и договор со ВМРО-Народна и вели: "Нема никаков договор со ВМРО-Народна, тоа не е вовед во коалиција, бидејќи за амандманот гласале сите пратеници, освен ДУИ".

Инаку, според листингот, контроверзниот амандман  добил 61 глас. За него покрај љупчовистите, позитивно гласале и пратениците од СДСМ, ЛДП, НСДП, ДОМ, ЗНП, ВМРО-ДПМНЕ и ДПА, а против биле само петмина пратеници од ДУИ.

Интересно е што корекцијата на Кривичниот законик е направена експресно и без никаква расправа. Откако министерката за правда, Мери Младеновска-Ѓорѓиевска, го одбила амандманот на ВМРО-Народна, за збор не се јавил никој, дури ни предлагачот, односно, пратеникот Жарко Караџоски. Немало никаква дискусија и пратениците веднаш гласале.

Шефицата на пратеничката група на ВМРО-ДПМНЕ, Силвана Бонева, вели дека во случајов е направен упад во Кривичниот законик и во процедурата. Таа потсетува дека ВМРО-Народна уште во март  има побарано измена на Кривичниот законик во делот на злоупотребата на службената должност, но таа е на дневен ред на друга собраниска седница. Според неа, во петокот намерно е направена ваква забуна за да се доведат пратениците во заблуда. "Амандманот на Караџоски е буквално протнат и тоа спротивно на Деловникот: амандмани  да се поднесуваат само на членот што е предмет на предлогот од Владата, а не на целиот текст на законот. За амандманот немаше  никакво образложение, тој е протуркан  низ мала врата. Сметаме дека ваквото решение што се донесе е резултат на договор меѓу ВМРО-Народна и СДСМ. Не станува збор само за амнестија на луѓето од опозицијата, туку најмногу за оние од актуелната власт  во иднина да бидат заштитени од кривично гонење", вели Бонева.  Караџоски вчера одбегна да даде каков било коментар во врска со неговиот амандман.