Унгарија го обезбедува преминот на мигрантите до Австрија преку својата територија, но тоа не може вечно да го прави, бидејќи „приливот на бегалци е непресушлив“, изјави унгарскиот премиер Виктор Орбан кој во саботата говореше на собирот на неговата владејачка партија Фидес во градот Кечкемет.

„Го обезбедивме нивното минување, бидејќи се случи вонредна ситуација и затоа што за тоа се договоривме со челниците на Германија и на Австрија. Но тоа не значи дека така ќе биде цело време“, изјави Орбан, пренесува агенцијата MTI.

Според унгарскиот конзервативен премиер, „потокот бегалци е непресушлив, така што кај нас може да дојдат милиони бегалци“. „Должни сме да се заштитиме, тоа повеќе да не се повтори. Доколку државата нема граници, таа не може да се смета за држава“, додаде Орбан.

Истакна и дека Унгарија во заштитата на своите граници смета и не Европската унија. Претходно Орбан соопшти дека од почетокот на годинава низ земјата минале над 150.000 бегалци, а само во саботата пристигнале нови 3.300 мигранти.

Од почетокот на 2015 година во ЕУ пристигнаа околу 350.000 луѓе од субсахарска Африка, Блискиот и Далечниот исток, кои бегаат пред сиромаштијата и војните во нивните земји, меѓутоа оваа бројка секојдневно се обновува со илјадници нови мигранти. Први на удар на мигрантскиот бран се Италија и Грција од која бегалците преку Македонија и Србија се упатуваат кон Унгарија од каде имаат намера да влезат во богатите западни земји од Европската унија./крај/мф/сн

Извор: Макфакс