Македонија
Македонското новинарство со страшен квантитет, а без квалитет
Новинарството во Македонија бележи страшен квантитет, кој наместо да води до квалитет оди кон девалвација на професијата, полесна манипулација,цензура и се поголемо намалување на професионалните стандарди.
Новинарството во Македонија бележи страшен квантитет, кој наместо да води до квалитет оди кон девалвација на професијата, полесна манипулација,цензура и се поголемо намалување на професионалните стандарди. Ова го заклучија учесниците на дебатата за состојбата со медиумите и нивната улога во општествениот живот: Роберт Поповски, Претседател на Здружението на новинари, Билјана Бејкова, НВО Инфо центар, Борјан Јовановски – А2 Телевизија, Бранко Тричковски, ГЛОБУС Магазин и Петрит Сарачини од МИМ, кои истакнаа дека вината за состојбата во новинарството кое презентира „испеглани и испрани информации кои не треба да предизвикаат никакви полемики во јавноста“ прво треба да се бара кај самите новинари. „Уредништвото во Македонија е пропаднато,“ вели Петрит Сарачини од МИМ. „Уредниците не успеваат да ги заштитат граѓаните од грешките на новинарите, со спремање на новинарите и нивно информирање пред одење на настани бидејќи тоа е нивната работа. За жал повеќето уредници во Македонија станаа само јадачи на бесплатни ручеци и пијачи на кафе по улица Македонија,“ рече тој. Според Роберт Поповски, Претседател на Здружението на новинари, во 2001-та новинарите се тешеле дека ако ништо друго бил избегнат говорот на омраза, што придонело ситуацијата да се реши на побезболен начин, за сега, девет години подоцна да се случуваат јавни линчови на личности. „Имаме луѓе кои се нарекуваат новинари, кои јавно повикуваат на линч на граѓани кои имаат различно мислење од нивното, си дозволуваат да се закануваат по животот на новинарите и ниту една институција во Македонија не презема мерки за да ги казни сторителите,“ рече Поповски и додаде дека неговата генерација, за жал, не препознала дека влегувајќи во дилови со сопствениците, всушност ја поткопува својата фела и професија. „Ситуацијата со медиумите во Македонија е апсурдна, шизофрена и трагична. Ние мораме да се сватиме дека медиумите се дел од граѓанското општество, а не продолжена рака на политичките структури,“ порачува Билјана Бејкова од НВО Инфо центарот. Борјан Јовановски од А2 Телевизија истакна пример од Република Чешка, кога во државната телевизија се обидуваат да стават уредник близок до владеачката гарнитура, новинарите организираат штрајк на кој успеваат да придобијат 100.000 граѓани на своја страна. „Ова што ни се случува на нас како новинари, го заслужуваме и се додека вака се поставуваме кон состојбата, работите ќе бидат такви какви што се,“ кажа Јовановски, додавајќи дека новинарството веројатно е единствена професија во земјата која нема свој синдикат. Поповски и Јовановски потсетија дека реформите во Здружението на новинарите на Македонија се започнати, направени се промени во Статутот на организацијата и во Собранието и начинот на бирање раководството, со што очекуваат истото да привлече и помлади новинари и да придонесе во подобрувањето на квалитетот на новинарската професија во земјата. Дебатата ја организираше Институтот за социјална демократија – Прогрес. /крај/ко
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николоски: Македонија не се откажува од идејата за квалитетно железничко поврзување со Бугарија
Влегуваме во силен инвестициски циклус во изградба и модернизација на патната и железничката мрежа во Македонија преку која ќе изградиме квалитетни транспортни мрежи во регионот и ќе допринесеме за побрза интеграција со Европската Унија, е ставот на заменик претседателот на Владата и министер за транспорт Александар Николоски кој денеска го пренесе на средби со министри за транспорт од земји на Европската Унија, средби со колегите министри од земјите на Западен Балкан како и со претставници од различни институции на Унијата во рамки на дводневниот состанок на министри за транспорт на ЕУ што се оддржува во Унгарија.
Министерот Николоски ја потенцира важноста на поддршка на земјите од Европската Унија за спроведување на овие проекти и како што нагласи, нивната реализација ќе значи економски развој и подобра комуникација за сите земји од регионот.
Во одвоени средби со министерот за градежништво и инвестиции на Унгарија Јанош Лазар, со заменик претседателката на Владата и министерка за инфраструктура на Албанија, Белинда Балоку како и претседателот на Заедницата на европски железници Алберто Мацола, информираше дека Македонија ги засилува инвестициите во изградба и модернизација на европските транспортни коридори 8 и 10, поврзувајќи ја оската Исток-Запад, како и брзо поврзување со југ со Атина и на север со земјите од Централна Европа.
Тој ги потенцираше силните заложби на македонската влада за изградба на модерни автопати на западниот дел на коридор 8 кои треба да обезбедат квалитетно регионално поврзување, притоа нагласувајќи дека до крај на оваа година источниот дел од овој коридор ќе биде завршен.
Во однос на железничкото поврзување приоритет е изградба на двоколосечна брза пруга на Коридор 10, проект кој ќе даде дополнителна вредност на целокупната економија во регионот. Во однос на пругата на коридор 8, тој нагласи дека Македонија не се откажува од идејата за квалитетно железничко поврзување со Бугарија.
Изградбата на брза пруга на Коридор 10 како и квалитетно патно и железничко поврзување со Албанија и Бугарија се проекти кои ќе донесат големи придобивки за сите земји од регионот и ќе овозможат сигурен и брз транспорт на производи и патници. Затоа мора заеднички да настапиме со добри развојни програми и планови и да побараме силна поддршка од нашите партнери од Европа, истакна министерот за транспорт Александар Николоски.
Тој исто така информираше дека Македонија започна и со модернизација на неколку гранични премини како дел од проектот за олеснување на трговијата и транспортот меѓу земјите од Западен Блакан.
Состанокот на министри на земјите од Европската унија е одлична можност да ги презентираме нашите планови и активности за развој и модернизација на инфраструктурата во Македонија и да дадеме сериозен придонес за регионалниот развој и интеграцијата на цел регион, посочи министерот Николоски по средбите.
На средбите тој ја истакна цврстата заложба на Владата за остварување на зацртаните цели на земјата кои се однесуваат на пристапниот процес за членство во Европската Унија.
Македонија
СДСМ: Намалувавме цени на 500 производи, Мицкоски замрзна маржа на 73, дебакл на Владата
„Мерките на владата на Мицкоски освен што се задоцнети, тие нема да имаат ефект врз цените и стандардот на граѓаните. За жал, по најавената мерка на Владата дека се замрзнуваат маржите на само 73 производи, граѓаните не треба да очекуваат некаков ефект“, велат од СДСМ.
„Оваа мерка е калкулантска политика на Владата колку да замачкаат очи дека нешто направиле под притисок на јавноста. Сега е повеќе од јасно зошто со недели Мицкоски чекаше со намалување на цените на производите. Целта била да се најде решение колку да го има и тоа е во интерес на трговците, а не во интерес на граѓаните ниту нешто посебно ќе им помогне“, посочуваат од партијата и потсетуваат дека Владата на СДСМ минатиот септември 2023 година донесе мерки за намалување на над 500 производи во 25 различни категории и реализираше антикризен пакет за помош на граѓаните вреден 662 милиони евра.
„Во соседна Србија поевтинија 700 производи, слично е во Црна Гора. Ова што го донесе како мерка Владата на Мицкоски граѓаните нема ни да го осетат и тоа е доказ дека тој нема никаков интерес да се грижи за стандардот на граѓаните. За прв пат денес стигна и информацијата дека просечната плата за јули бележи пад од речиси 1000 денари по пет години постојан раст. Се намалуваат платите, цените остануваат високи. Граѓаните заслужуваат фер третман и вистинска грижа“, завршуваат од СДСМ.
Македонија
Укината забраната за движење во шуми
По извршената процена за намален ризик за појава на шумски пожари на површините под шума и шумско земјиште од страна на ЈП „Национални шуми“ – Скопје и на нивно барање, Министерство за земјоделство, шумарство и водостопанство донесе согласност за отповикување на целосната забрана за движење во шума и на шумско земјиште.