Состојбата во МЖ се усложнува наспроти очекувањата работите да мрднат од мртвата точка.

Состојбата во МЖ се усложнува наспроти очекувањата работите да мрднат од мртвата точка

ВЕРЧЕ ГЕОРГИЕВСКА Трансформацијата на "Македонски железници" оди бавно, а тековното работење на јавното претпријатие сe повеќе се усложнува, наспроти очекувањата на менаџментот и на вработените работите да мрднат од мртвата точка. Претпријатието во континуитет бележи загуби. Приходите во август годинава се намалени за половина милион евра како последица на намалениот обем на транспорт дури за 45 отсто во однос на изминатите месеци. Месечните приходи на "Македонски железници" во просек се околу 1,6 милион евра, но во август годинава се намалени на 1,1 милион евра, средства со кои не можат да се покријат месечните трошоци на претпријатието. Од "Македонски железници" велат дека, имајќи ја предвид тешката економска состојба, претпријатието се соочува со проблем како да продолжи со работа.

За санација на лошите состојби во "Македонски железници", кое има акумулирано загуби од 143 милиони евра, Собранието ги донесе Законот за железници и Законот за трансформација на МЖ, со кои треба да се изврши поделба на јавното претпријатие на два дела: за транспорт и за инфраструктура. Но, за да се изврши практичната поделба на "Македонски железници", Владата треба да донесе одлука. Од Министерството за транспорт и врски објаснуваат дека одлуката за поделба се подготвува, но не се сигурни кога ќе биде усвоена од Владата. Дури и да се донесе одлуката до крајот на оваа година, сосем е извесно дека постапката на двоење на вработените, на сметките и на инвентарот на две претпријатија ќе се случи наредната година. По поделбата на транспортот, претпријатието, кое ќе функционира како акционерско друштво, ќе се најде на Македонската берза, со што се отвора можност за влез на странски капитал. Дури тогаш, односно кога практично ќе се одвојат транспортот и инфраструктурата, државата ќе може да го користи заемот што го одобри Светска банка во висина од 15 милиони евра откако претходно ќе донесе закон за гаранции за заемот.

Светска банка го одбори кредитот од 15 милиони евра за подобрување на продуктивноста и на ефективноста на железничкото претпријатие. Доколку не се трансформира МЖ, СБ предупреди дека долгот од 143 милиони евра ќе се зголеми за дополнителни 100 милиони во следните десет години. Парите од кредитот ќе се искористат за техничка помош, вклучувајќи го одвојувањето на операциите од инфраструктурата и подготовка за приватизација на транспортот. Со дел од средствата ќе се преквалификуваат вишокот вработени, а дел од парите ќе се наменат за набавка, инсталирање, опрема и реновирање на локомотивите, одржување на шините и за набавка на друга опрема за нормално функционирање на компанијата.