Пародија е последниот комунистички министер да застане зад владиниот предлог за симнување на ѕвездата петокрака од грбот, рече Владо Бучковски од СДСМ на денешната собраниска Комисија за политички систем на која се разгледуваше владиниот предлог за државниот грб

Министерот за правда Михајло Маневски го бранеше владиниот предлог за грб кој претставува поле опкружено со житни класје кои се поврзуваат на врвот, испреплетено со плодови од афион и тутунови лисја, што се поврзани на дното со лента прошарена со народни мотиви, а во полето се оцртува планина во чие подножје тече река, а зад планината изгрева сонце.„Се симнува само ѕвездата петокрака како израз на идеолошката определба од претходниот период“, изјави Михајло Маневски, министер за правда.

Бучковски го поддржа ставот на неговата партија да се прифати предлогот, но го кажа своето мислење, и рече дека, ѕвездата не е симбол на комунизмот, туку српот и чеканот,. таа според него е симбол на нешто убаво, весело, светлина, радост и оптимизам.

„Ако сакавте да ја смените идеологијата, што не ја обоивте ѕвездата во жолто, па ќе бевте поблиску до Европа“, рече Бучковски.

Опозицијата смета дека не е време да се разговара за државниот грб сега, туку за Европа и економската криза, а не да се одвлекува вниманието на граѓаните од важните работи.„Барем ставете го и лавот и орелот наместо ѕвездата, и одбележете ја оваа ваша епоха, оваа ваша идеологија. Бидете барем мажи до крај“, рече Владо Бучковски од СДСМ.За Бучковски не е јасно како марксистите и ленинистите од ДУИ, како што рече, најдоа пречка во ѕвездата која ја има на многу знамиња и грбови и симболизира радост, оптимизам, љубов и слога.„Марксистите и ленинистите на ДУИ, мислам дека во секој политички субјекти имаше и марксисти и ленинисти, но и други“, рече Рафиз Алити од ДУИ.

За Силвана Бонева од владејачката ВМРО-ДПМНЕ можеби ова не е најсреќното решение, меѓутоа е резултат на максимално можна поддршка за која се обезбеди широк.

Граѓаните ќе имаат две години да ги сменат личните документи со новиот грб, а парите со старото решение ќе важат уште пет години.