Свет
Објавен договорот за ракетниот штит на САД со држави од Персискиот залив
Американскиот весник The New York Times во четвртокот ја објави листата земји од Персискиот залив со коишто Пентагон склучил договор за снабдување со оружје за изградба на системот за ракетна одбрана.
Во април, министерот за надворешни работи на Бахреин, Калид бин Ахмед Ал Калифа изјави дека САД и земјите од Советот за соработка на земјите во Заливот (GCC), во принцип постигнале договор за воспоставување систем за ракетна одбрана во регионот во случај на зголемување на тензиите во Иран.
Весникот особено внимание му посветува на извештајот на Пентагон во кој се наведува дека САД ќе му продадат оружје на Кувајт во износ од 4,2 милијарди долари, вклучително и 60 противавионски ракетни системи од типот „Patriot“, 20 лансери и четири локациски радарски системи. Во моментов, Кувајт веќе поседува 350 системи „Patriot“, коишто земјата ги купила во периодот од 2007 до 2010 година.
Во декември минатата година, Пентагон го објави потпишувањето на договорот со Обединетите Арапски Емирати за испорака на надградени лансери за ракетниот одбранбен систем THAAD (Terminal High Altitude Area Defense) во вредност од 2 милијарди долари. Дополнително беше склучен договорот за набавка на ракети пресретнувачи, исто така, за сума од 2 милијарди долари. Вкупно, во текот на изминатите четири години, САД на Емиратите им доставиле оружје во вредност од околу 12 милијарди долари.
Покрај тоа, ракетните системи „Pаtriot“ и’ се доставени и на Саудиска Арабија. Сумата на последниот договор изнесува околу 1,7 милијарди долари.
Во моментов, во регионот на Персискиот залив противвоздушни одбранбени ракетни системи „Patriot“ се инсталирани и во Саудиска Арабија и во Обединетите Арапски Емирати. САД се стремат да изградат мрежа на ракетната одбрана и размена на информации во шест земји на Заливот, со цел да ги заштитат овие земји од ирански проектили во случај на ескалација на состојбите околу Иран и за обезбедување непречено транспортирање на нафтата од регионот.
САД, другите западни земји и Израел се сомневаат дека Иран развива нуклеарно оружје под маската на мирнодопска нуклеарна програма. Техеран ги негира овие обвиненија, тврдејќи дека неговата нуклеарна програма е насочена кон задоволување на потребите од електрична енергија во земјата. Во моментов, на сила се четири санкции за Иран донесени од Советот за безбедност на Обединетите нации./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Злосторство во Тузла: мајка со чекан си ја убила ќерката, оставила две проштални писма
Незаборавно злосторство се случи во Босна и Херцеговина, пренесуваат локалните медиуми.
64-годишен маж, утринава, околу 1.15 часот во полициската станица ПС Центар пријавил дека во семејниот дом во Тузла го пронашол безживотното тело на 31-годишната ќерка.
Полицијата излегла на самото место и ги потврдила наводите од пријавата за што веднаш било известено Кантоналното обвинителство на Тузланскиот кантон, извести МУП ТК, пренесе „Аваз“.
„Во текот на истрагата е констатирано дека жената имала повреда во задниот дел на главата. Денеска ќе биде наредена обдукција за да се утврди точната причина за смртта“, изјави Адмир Арнаутовиќ, портпарол на Обвинителството ТК.
Според последните информации, како што пренесуваат тамошните медиуми, станува збор за кривично дело, кое, според првите индиции, најверојатно, го извршила мајката на 31-годишна девојка. На самото место истражителите пронашле две проштални писма, како и предметот со кој, сметаат истражителите, е извршено делото. Очигледно се работи за чекан.
Девојката која е убиена наводно била тешко болна.
Свет
Борел: Без поддршката на Западот, војната во Украина ќе завршеше за 15 дена
Високиот претставник на Европската Унија за надворешна политика и безбедност, Жосеп Борел денеска изјави дека војната во Украина ќе заврши за 15 дена доколку западните сојузници престанат да ја поддржуваат таа земја.
„Многу луѓе сакаат војната да заврши што е можно побргу. За почеток, самите Украинци. Но, важно е како. Ако престанеме да ја поддржуваме Украина, за петнаесет дена војната ќе заврши и рускиот претседател Владимир Путин ќе ги постигне своите цели, но дали тоа е она што го сакаме за Украинците и за безбедноста на нас Европејците?, изјави шефот на европската дипломатија во интервју за шпанскиот весник „20 минути“.
Тој повтори дека сојузниците мора да направат сè што е во нивна моќ за кога ќе дојде време за преговори со Русија, Украина да ги води „под услови поволни за суверенитетот и територијалниот интегритет“.
Свет
Шолц: Германија стои до Израел, мора да се спротивставиме на терористите на Хамас
Германскиот канцелар Олаф Шолц денеска изјави дека Германија стои на страната на Израел нагласувајќи дека мора да се спротивстави на терористите на Хамас.
Тој ова го рече на отворањето на меѓународната конференција за одржливост, што се одржува во Хамбург, и посочи дека официјален Берлин ги поддржува прекинот на огнот, ослободувањето на заложниците и почетокот на политичкиот процес, дури и ако тоа изгледа потешко од кога било.
„Решението со две држави може да биде единствена цел за секој политички процес“, рече Шолц.
Според него, изминатата година на војна му донесе незамисливо страдање на палестинското население во Појасот Газа.
„Хезболах и Иран мора веднаш да ги запрат нападите врз Израел“, рече Шолц и предупреди дека овие напади претставуваат уште една ескалација во инаку тензичната ситуација на Блискиот Исток.
Израел денеска ја одбележува првата годишнина од нападот на палестинската милитантна група Хамас, а израелскиот претседател Исак Херцог го почна денот со едноминутно молчење во кибуцот Реим.
Во нападот на Хамас на 7 октомври 2023 година загинаа најмалку 370 луѓе, а во војната што тогаш избувна и сè уште трае до крајот на септември годинава загинаа повеќе од 43.000 луѓе, од кои 41.431 Палестинци, најмногу во Појасот Газа.
Повеќе од половина од зградите во Појасот Газа се уништени, а речиси целото население на Газа е раселено – приближно 2,3 милиона луѓе.