Сите досега преземени обврски и ветувања од страна на Министерството за здравство кон Лекарската комора се исполнети. Лекарската комора е вклучена во сите клучни фази од реализацијата на проектите на Министерството за здравство.

Вака реагираат од МЗ по денешниот став на Лекарската Комора  на Македонија дека не им се озаконети барањата и дека не се информирани за промените и одлуките во здравствениот систем.

„Во насока на натамошно унапредување на дијалогот и соработката, МЗ предлага ЛКМ да определи свој официјален претставник на којшто Министерството е подготвено да му понуди соодветна канцеларија во зградата на Министерството со што ќе се обезбеди тековно информирање и вклученост на дневна основа на ЛКМ во сите проекти“, се вели во соопштението од Министерството.

Од Министерството за здравство информираат дека меѓу другото, барањето на комората да се формира координативна тело во коешто ќе учествуваат претставници на ЛКМ, МЗ и ФЗОМ  е исто така прифатено и е предложено како законско решение во последната измена на Законот за здравствена заштита (законот е во владина процедура).

„Министерството за здравство и министерот д-р Бујар Османи ја сметаат и се однесуваат кон Лекарската комора како кон рамноправен партнер со кој се усогласуваат сите решенија кои се однесуваат на лекарската фела, но и на функционирањето на здравствениот систем“ се вели во соопштението од МЗ./крај/со/ми