Маршот на толеранција кој оваа година се одржува по втор пат, ќе биде посветен на политичката (не) толеранција, односно на зголемувањето на политичката култура и дијалогот кои отсуствуваат во земјата, изјавија организаторите на маршот.

„Видовме дека има потреба од различни групи на граѓани, кои се обраќаат до нас посебно заради процесот на донесување на законот за заштита од дискриминација, и сакаме да покажеме дека и во Македонија има група на граѓани кои се отворени и ги прифаќаат различностите и сакаат да живеат во општество кое е демократско и толерантно“, рече Гордана Несторовска, извршен директор на Хелсиншкиот Комитет за човекови права и додаде дека оваа година имајќи ги предвид случувањата во земјата решиле апелот на маршот на толеранција да биде за политичката толеранција.

Таа рече дека според сознанијата на Хелсиншки, во земјата најчеста е политичката дискриминација и затоа овој марш ќе претставува апел за поголема соработка помеѓу политичките партии, кои треба да внимаваат како меѓу себе се однесуваат и која порака ќе ја пратат до граѓаните.

„Политичката нетолеранција, отсуството на политичка култура и дијалог во земјата битно влијаат на сите други сектори во животот на граѓаните на Македонија. Меѓуетничките односи, односите меѓу луѓето воопшто, развојот во земјата на сите нивоа е страшно загрозен заради отсуството на политичката култура и дијалогот, дијалогот по сите основи е запрен или е забавен“, рече Џабир М. Дерала, Претседател на НВО „Цивил“.

Тој вели дека секојдневно има флагрантни кршења на човековите права, но никој сериозно не се занимава со таа ситуација.

„Веруваме дека ние како граѓанско општество каде припаѓааат и медиумите, ако кажеме што е можно погласно не, за  нетолеранцијата, што е можно погласно не за насилството кое го има на различни основи, како на пример кога политиката врши насилство врз медиумите, а тоа се рефлектира на целата јавност, сметаме дека можеби нешто ќе се промени во позитивна насока во земјава“, рече Дерала.

Маршот под мотото „Правда, Слобода, Еднаквост!“ ќе започне утре на пладне од пред Музејот на Град Скопје, а ќе заврши пред платото на стоковната куќа „Илинден“, со диџеј и забава./крај/ко