Американскиот претседател ќе допатува во негова прва посета на Москва, при што ќе се сретне со претседателот и со премиерот на Русија, Дмитриј Медведев и Владимир Путин

Од посетата на американскиот претседател Барак Обама се очекува најавеното „ресетирање на односите“ да добие конкретни резултати.Помошникот на рускиот претседател Сергеј Прихотко потврдил дека Обама доаѓа во дводневна работна посета на Русија, а договорот за таквиот карактер на посетата го постигнале двајцата претседатели со намера да се осврнат на суштински прашања, а да го запостават протоколот.Вниманието на двајцата претседатели ќе бидат билатералните односи меѓу двете велесили, новиот договор за стратешкото нуклеарно вооружување и зачленувањето на Русија во Светската трговска организација. Како што е најавено, ќе се зборува и за антиракетниот штит кој САД планираат да го постават на територијата на Чешка и Полска, како и ситуацијата во Авганистан, Северна Кореја, Иран и на Блискиот Исток.Според медиумите, двајцата претседатели очекуваат дека оваа средба ќе биде можност за дијалог на рамноправна основа и изразување подготвеност за изградба на поефикасни, подоверливи и помодерни односи.Лидерите на САД и Русија ќе се осврнат и на ситуацијата во Грузија по минатогодишните воени дејствија на руските сили, кои Вашингтон ги осуди и кои многу придонесоа за влошување на односите на Москва со НАТО и САД.Американските медиуми објавија дека американскиот државен секретар Хилари Клинтон, иако било планирано, нема да допатува во Москва во придружба на Обама, поради здравствени причини.По завршувањето на состанокот меѓу двајцата претседатели ќе следи и потпишување на повеќе документи – рамковен документ за намалување на стратешкото нуклеарно оружување, заедничка изјава за соработка во нуклеарната сфера, договор за воен транзит во Авганистан, рамковен документ за развој на соработката на оружените сили на САД и Русија, меморандум за соработка во областа на здравството, медицината и науката.На вториот ден од престојот, Обама ќе се сретне со рускиот премиер Владимир Путин и тоа ќе биде нивна прва средба, која се смета за многу значајна. Американскиот претседател неколку дена пред неговото заминување за Москва го окарактеризира Путин како некој кој се уште, барем делумно, „води студеновоена политика“ и не може да го остави минатото зад себе, за разлика од неговиот наследник на местото шеф на државата.Медведев и Обама, исто така, ќе учествуваат и на американско-рускиот деловен самит, на кој ќе се соберат најистакнати претставници од светот на бизнисот во двете држави.За посетата на Обама, кој во Москва ќе допатува заедно со своето семејство, се предвидени незапаметени мерки за безбедност, како и интересирање на медиумите. За заедничката прес-конференција на Медведев и Обама се акредитирани 855 новинари.Американскиот претседател ја завршува посетата на Москва в среда, кога ќе замине за Италија на состанокот на Г-8, на кој ќе учествува и Медведев.