Македонија
Реакција на МОН на пресот на СДСМ

Министерството за образование и наука (МОН) реплицирајќи на денешната прес-конференција на опозициската СДСМ на која беше побарана одоговорност од министерот Тодоров, одговара образложувајќи ја процедурата за зибор на автори и рецензенти за учебниците
Постапката за издавање на учебници е уредена со Законот за учебници за основно и средно образование. Согласно член 10 од Законот, автор на учебник е лице со високо образование, магистер и доктор на науки, чие образование е од областа или е соодветно на областа на која и припаѓа наставниот предмет за кој е наменет учебникот. Учебник се издава, доколку се направи измена на наставната програма за што министерството за образование и наука, односно Педагошката служба објавува конкурс за прибирање на ракописи на учебници. Директорот на Педагошката служба по предлог на Националната комисија за учебници, формира рецензентска комисија која врши стручно вреднување на ракописи за учебник за соодтевен предмет, а во согласност со методологијата која ја изготвува Бирото за развој на образованието. Рецензентите се определуваат од листата на рецензенти, која е формирана врз основа на јавен оглас за пријавување на рецензенти кои ги исполнуваат условите утврдени во Законот, а постапката за избор на рецензенти ја врши Националната комисија. Националната комисија е составена од 21 член, кои се стручни лица од областа на општествено-хуманистичките науки, природните науки, уметностите и вработени наставници од основните и средните училишта. Задачата на рецензентот е да изврши стручно вреднување на текстот во ракописот. Рецензентската комисија дава писмена изјава со која потврдува дека авторите постапиле по нејзините укажувања и дека учебникот може да се пушти во постапка на печатење. По комплетирањето на вака пропишаната законска процедура, Националната комисија за учебници доставува конечна листа на избрани ракописи на учебници до Министерот за образование и наука.Во случајот со учебникот по општество за петто одделение целосно е запазаена законската процедура од страна на Министерството, Педагошката служба и Националната комисија за учебници.Проблемот со учебниците за средно стручно образование е отворен сега, но постои повеќе од 20 години. Не можеме да не го прифатиме фактот дека се доцни со изработката, печатњето и дистрибуцијата на овие учебници, но исто така неспорен е и фактот дека доцењето е повеќе од 20 години. Факт е исто така дека за една година, како резултат на големо залагање и јасно манифестирана политичка волја, постои огромен прогрес во решавањето на овој проблем, бидејќи повеќе од половината учебници кои недостасувале повеќе децении се подготвени за една година. Министерството за образование и наука не може да печати учебници кои не постојат. Наша обврска е овој проблем целосно да го решиме и да се обидеме да ги охрабриме авторите да напишат учебници за учениците во средните стручни училишта. Тоа и ќе го сториме.Воедно, сакаме да потенцираме уште една неточност во делот на времето на објавување на тендерот за печатање и дистрибуција на учебниците. Тендерот е објавен на 11.01.2010 година под број 01/2010 и истиот може да се најде на сајтот на Бирото за јавни набавки. Проектот Компјутер за секое дете, покрај едукативниот ефект во себе содржи и социјален аспект. Размислете дали учениците чии родители се во лоша економска состојба, пред овој проект имале пристап до компјутер, и што ова ќе значи на среден и долг рок во поглед на квалитативното менувањето на матрицата во Република Македонија. Модерно образувана и прогресивно ориентирана младина е основниот постулат за модерно организирана и економски силна држава. Имаме обврска да потсетиме и да направиме едноставна компарација за нивото на инвестициите во образовната инфраструктура. Имено, во изминатиот четиригодишен период инвестициите во образовната инфраструктура изнесуваа над 1,5 милијарда денари, за разлика од претходниот четиригодишен период кога беа инвестирани само 500.000.000,оо денари, што претставува трикратно зголемување на инвестициите. Исто така, жалиме што на пресот на СДСМ беше објавена информација која е непроверена и неточна. Имено, учебниците по географија за седмо одделение се веќе отпечатени и нивната дистрибуција ќе започне во понеделник 16.08.2010 година. Како потврда на овој факт до СДСМ доставуваме по еден примерок од учебниците по географија за седмо одделение. Став на Министерот е дека ниту еден министер за образование не смее да учествува со свои лични ставови во процесот на пишувањер на учебник, ниту пак директно да интервенира во содржината на било кој учебник. Тоа во никој случај не може да биде карактеристика на едно демократско општество, напротив интервенирањето на министерот за образование во содржината на учебниците е карактеристика на тоталитарни и недемократски режими. Најпосле секоја добронамерна и позитивна критика е секогаш добредојдена, особено во сферата на образованието како најсензитивна, но истовремено и најважна област за економскиот и општествениот развој на државата. Се што е спротивно на ова е непродуктивно и штетно, се вели во итнегралната реакција на МОН.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: На спорното земјиште на улицата „Киро Крстевски-Платник“ ќе никне простор по мерка на граѓаните

Центар ја расчисти спорната парцела зад зградата на улицата „Киро Крстевски – Платник“, каде што претходно беше лоцирана диво изградена конструкција, известуваат од Општината.
„Имавме неколку средби со жителите од околните згради и ќе излеземе во пресрет на нивните барања. Просторот ќе добие намена која ќе биде во функција на граѓаните и по нивна мерка“, изјави градоначалникот Горан Герасимовски.
„Станува збор за простор од приближно 500 м², кој по години неизвесност конечно премина во сопственост на Општина Центар. Благодарение на соработката со Комерцијална банка АД Скопје, која претходно ја имаше оваа парцела под хипотека, земјиштето беше донирано на локалната самоуправа.
Одлуката за прифаќање на донацијата беше едногласно изгласана од Советот на Општината. Со тоа се овозможи уривање на нелегално изградената градба, а Општината ги презеде сите активности за расчистување на теренот.
Следниот чекор е општинските служби, во соработка со локалните жители, да го дефинираат најдоброто решение за уредување на просторот. Целта е создавање похумана и уредена околина, со баланс меѓу зеленило и функционален јавен простор, без нови градби и во согласност со потребите на граѓаните“, соопшти Општината.
Македонија
Евроинтеграциите и трговската соработка во фокусот на работната посета на министерот Муцунски на Шведска

Министерот за надворешни работи и надворешна трговија, Тимчо Муцунски, во рамки на работната посета на Стокхолм, оствари средба со министерката за европски прашања на Шведска, Џесика Розенкранц. Во фокусот на разговорите беа евроинтеграцискиот процес на државата, поддршката од Шведска во овој процес, како и реформските процеси во земјата.
На средбата, министерот Муцунски изрази благодарност за континуираната и принципиелна шведска поддршка за процесот на проширување на Европската унија, со посебен акцент на заложбите за целосно пристапување на Северна Македонија и останатите земји од Западниот Балкан. Тој ја истакна шведската посветеност на политиката на проширување како клучен фактор за интеграцијата на регионот, извести Министерството.
Македонската интеграција во ЕУ и предизвиците на тој пат беа централна тема на разговорот. Од страна на министерот Муцунски уште еднаш беше повторена неопходноста билатералните прашања да не претставуваат пречка за напредокот, при што беше потенцирано дека процесот треба да се темели исклучиво на системот на заслуги и постигнувања. Се разговараше и за повеќе актуелни прашања од значење за Унијата.
Министерката Розенкранц нагласи дека Шведска останува силен поддржувач на проширувањето на Унијата и додаде дека и во иднина ќе продолжат да ги поддржуваат партнерските земји, како Република Северна Македонија, со која имаат одлични билатерални односи. Во контекст на силната поддршка за нашиот евроинтеграциски пат, таа ја истакна и важноста на реформската агенда и Планот за раст.
Во рамки на посетата, министерот Муцунски оствари и средба со државниот секретар за меѓународна развојна соработка и надворешна трговија на Шведска, Хакан Јеврел.
Фокусот на средбата беше ставен на унапредување на економската и трговската соработка меѓу двете земји, можностите за инвестирање во Република Северна Македонија, како и справување со актуелните економски предизвици. Министерот Муцунски ги нагласи поволностите за инвестирање во Северна Македонија, со посебен акцент на автомобилската, одбранбената и фармацевтската индустрија, претставувајќи ги како клучни сектори со сериозен инвестициски потенцијал. Се разговараше и за конкретни чекори што би придонеле кон привлекување нови шведски инвестиции, со акцент на потребата од заеднички напори за унапредување на трговската и економската соработка, соопшти Министерството.
Македонија
Муртезани и Суперти со заедничка заложба за напредок на реформите и отворање на првиот Кластер

Во рамките на дводневна работна посета на институциите на Европската Унија во Брисел, министерот за европски прашања Орхан Муртезани, денеска оствари средба и со Валентина Суперти, директорка во Генералниот директорат за проширување и источно соседство (ГД ЕНЕСТ) при Европската комисија.
Дискусиите се одвиваа во контекст на напреднатата фаза на подготовките за отворање на Кластерот 1 (Фундаментални вредности), при што посебен акцент беше ставен на исполнувањето на одредниците за отворање кои се предуслов за отворање на овој кластер, дефинирани во Преговарачката рамка. Министерот Муртезани информираше дека Владата на Северна Македонија веќе ги финализира суштинските стратешки документи: Патоказот за владеење на правото, како и придружниот Акциски план за заштита на правата на припадниците на малцинствата и заедниците и Патоказот за реформа на јавната администрација; со што практично се заокружува исполнувањето на условите и се отвора патот кон формално отпочнување на преговорите почнувајќи со отворање на првиот Кластер, известува Министерството.
Муртезани нагласи дека овие документи се резултат на темелна координација со Европската комисија и вклучување на релевантните чинители од институционалниот, граѓанскиот и експертскиот сектор, вклучително и јавни презентации пред надлежните собраниски тела. Финалната верзија на документите се усогласува со Европската комисија, пред нивното формално усвојување од Владата.
Дополнително, на средбата беа разгледани тековните активности поврзани со имплементацијата на Реформската агенда 2024–2027 и Планот за раст за Западен Балкан, вклучително и процесот на евалуација на првото Барање за исплата на средства, доставено до Европската комисија на 14 март годинава. Се разговараше и за реформите планирани за реализација до јуни 2025 година, особено во областа на енергетиката, дигиталната трансформација, деловното окружување и владеењето на правото.
Суперти ја поздрави посветеноста на Владата во исполнувањето на своите обврски и проактивниот пристап во градење функционална институционална структура за управување со евроинтегративниот процес. Соговорниците ја истакнаа важноста од редовна и отворена комуникација, како предуслов за кредибилна европска перспектива и остварување на јасни резултати во приближувањето кон ЕУ, се наведува во соопштението на Министерството.