Македонија ќе стане членка на НАТО, таа го заслужува тоа“, изјави денеска норвешкиот амбасадор Кјeтил Паулсен, пред почетокот на регионалната конференција „Новиот НАТО: Градејќи го новиот стратешки концепт“ во организација на Евро-атланскиот Совет

Паулсен рече дека Македонија придонесува за мисиите на НАТО и заслужува да биде дел од алијансата.

Претседателот на Евро-атлантскиот Совет на Македонија, Лазар Еленовски, рече дека Македонија која е цврсто решена да продолжи по патот за полноправно членство, ќе треба да ги сподели сите обврски со земјите – членки на НАТО како во однос на новите партнерства, така и за колективната одбрана.

Потпретседателот на Евро-атланскиот совет на Македонија, Исмет Рамадани рече дека единствениот проблем кој Македонија го има за влез во НАТО е спорот со името.

„Името и понатаму ни е проблем, тоа е така во сите одговори што ги добиваме од компетентните луѓе. Но како и да е во кондиција сме со фактот дека има еден висок процент про-НАТО декларирање во Република Македонија“, рече Рамадани.

Рамадани изјави дека поканата за Македонија за членство во НАТО е во Брисел, но како што рече мора да се најде компромис за името за земјата да стане полноправна членка.

Заменик- министерот за одбрана Емил Димитриев рече дека се надева дека НАТО и понатаму ќе ја држи отворена вратата за европските демократии кои ги споделуваат нејзините вредности, но и ги преземаат одговорностите и обврските кои произлегуваат од членството. Според него, се уште не е завршена работата на НАТО и на ЕУ на Балканот.

„Брзиот прием на Македонија во НАТО е дополнителен придонес за стабилноста на Балканот. Пролонгирањето на приемот на Македонија може да влијае на кредибилитетот на Алијансата, што верувам дека никој не го посакува“, рече Димитриев.

Главна цел на НАТО во новата програма ќе биде продолжување на процесот на намалување на нуклеарното оружје.

На конференцијата се дебатираше и за операциите и партнерствата на НАТО.