Акционерското друштво „Макпетрол“ вчера енергично демантираше дека во 1998 година извезувало нафтени деривати во која било земја.

„МАКПЕТРОЛ“ ТВРДИ

Емил Зафировски

Акционерското друштво „Макпетрол“ вчера енергично демантираше дека во 1998 година извезувало нафтени деривати во која било земја. Според соопштението што стаса во „Време“, компанијата воопшто не извезувала нафтени деривати и ги нарекува „злонамерно извртување на фактите“ царинските документи што ги поседува нашиот весник. Од Царинската управа ни шепнаа дека е можно некој да ги злоупотребил имињата на фирмите што се заведени како извозници, а раководствата на тие фирми воопшто да не знаеле за тоа.

„Категорички ги демантираме наодите подвлекувајќи дека во тој период ‘Макпетрол’ не извезувал нафтени деривати на ниту еден пазар во светот. Споменувањето на ‘Макпетрол’ во контекст на матни извозни зделки го сметаме за плод на нечија болна фантазија и за злонамерно извртување на фактите. Истовремено ‘Макпетрол’ го подвлекува својот интерес до крај да се разоткријат сите сомнителни зделки во нафтениот бизнис во Македонија“, пишува во соопштението.

„Време“ минатата недела објави дека во 1998 година, според податоци заведени во извештај на Царинската управа под број 4200, кој се однесува за период од 1.1.1997 до 31.12.1998 година, Македонија била најголем извозник на нафта во светот. Според истиот извештај, Македонија извезувала големи количества нафта во САД, Русија, Кувајт, Саудиска Арабија, Германија, Грција, Хрватска, Франција, Холандија и уште во стотина други држави. Во тој извештај како извозници на нафтени деривати се заведени рафинеријата „Окта“ и „Макпетрол“.

Извори од Царинската управа нагласуваат дека станува збор за фиктивен извоз на нафта што потоа се шверцувала во Македонија, Србија и на Косово. Изворите не ја исклучуваат и можноста оној кој ги подготвувал царинските декларации да ги злоупотребил имињата на фирмите што се заведени како извозници на нафтените деривати, односно тие воопшто да не знаеле за тоа.

Станува збор за царински декларации според кои Македонија, во 1997 и 1998 година, периодот на ембаргото кон Југославија, извезла 980 илјади тони нафта во вредност од 1,13 милијарди долари, пари што воопшто не поминале преку Народна банка на Македонија.

– Доколку Македонија извезувала нафта во други земји, наплатата задолжително оди преку НБМ – велат изворите од Царинската управа.

НБМ завчера соопшти дека во 1998 година не била извршена ниту една наплата за извоз на нафтени деривати.

Во Царинската управа вчера изјавија дека ги проверуваат информациите и дека наскоро ќе излезат со официјален став.

Македонија важи за земја што е директно зависна од увоз на нафта и на нафтени деривати.