Европа
Уапсен Наџим Лахрауи – третиот осомничен за терористичките напади во Брисел
Третото лице осомничено за терористичките напади кои се случија вторникот утрото во Брисел на аеродромот Завентем, Наџим Лахрауи е уапсен во средата во белгискиот главен град, пренесува Reuters.
Лахрауи, роден на 18-ти мај 1991-та година, бил уапсен во бриселската населба Андерлехт. Според белгиските медиуми тој живеел во населбата Шарбек. Полицијата по него трагала уште претходно, откако неговата ДНК била пронајдена во куќите кои минатата година беа користени од страна на лицата инволвирани во нападите во Париз, соопштило белгиското обвинителство.
Лахрауи со септември минатата година патувал во Унгарија заедно со главниот осомничен за нападите во Париз, Салах Абдеслам. Претходно белгиските медиуми јавија дека двајцата бомбаши самоубици, кои ги изведоа нападите на бриселскиот аеродром, биле идентификувани како браќата Халид и Брахим Ел Бакрауи, кои уште од порано и биле познати на полицијата.
Белгиската телевизија RTBF, повикувајќи се на анонимни извори, навела дека тие биле жители на Брисел. Халид Ел Бакрауи под лажно име изнајмил стан во белгиската престолнина, во делот каде што белгиската полиција за време на минатонеделната рација уби еден напаѓач, додава телевизијата.
За време на рацијата, полицајците пронашле знаме на Исламска држава, автоматска пушка, детонатори и отисоци од прстите на главниот осомничен за нападите во Париз, Салах Абдеслам, кој беше уапсен три дена подоцна, потсетува Reuters.
Браќата Ел Бакрауи имале кривични досиеја но досега не биле поврзани со тероризам, наведуваат белгиските медиуми. Белгискиот државен обвинител во вторникот вечерта соопштила дека третиот напаѓач е во бегство, оценувајќи дека се уште е рано нападите да се поврзат со оние во Париз минатата година.
Полицијата веднаш издала и потерница по третиот осомничен, а сликата од безбедносните камери покажува човек со очила и брада во светла јакна и црн шешир, кој турка количка на која има голема црна торба. Според официјалните информации, во терористичките напади во Брисел загинаа најмалку 34 лица, а 250 беа ранети./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.