Европската комисија негираше дека се обидела да ја прикрие здравствената состојба на претседателката Урсула фон дер Лајен, која беше хоспитализирана поради тешка пневмонија, пренесува Радио Слободна Европа.

Фон дер Лајен (66) во септември го започна својот втор петгодишен мандат на чело на Европската комисија.

На 3 јануари, комисијата изјави дека Фон дер Лајен има „тешка пневмонија“ и дека нејзините активности во следните две недели се откажани.

Детали за нејзината состојба или како се разболе не се објавени, иако германската новинска агенција dpa подоцна објави дека таа била примена во болница. Ова, според написите покрена прашања за транспарентноста во моќната извршна власт на ЕУ.

На прашањето на новинарите зошто се сокриени вестите за нејзината хоспитализација, портпаролката на Европската комисија Пола Пињо изјави: „Рековме дека претседателката има тешка пневмонија“.

Пињо рече дека медиумите биле информирани дека Фон дер Лајен ги откажала своите состаноци на почетокот на јануари, но дека добила важни телефонски повици, вклучително и од италијанската премиерка Џорџа Мелони и дека можела да ги извршува своите должности.

„Затоа ви дадовме критични информации за здравствената состојба на претседателката, кажувајќи каква болест има и колку е сериозна“, рече Пињо одговарајќи на новинарски прашања, без да објасни зошто се сокриени детали за болницата. „Нејзината способност да дејствува никогаш не била доведена во прашање“.

Пињо рече дека претседателката „добро закрепнува“ и дека кон крајот на оваа недела треба да се врати во Брисел во својата канцеларија во Комисијата.

Според написите на медиумите во светот, Фон дер Лајен обично има напорен распоред на патувањата. Таа следната недела треба да присуствува на седницата на Европскиот парламент во Стразбур, Франција и ќе оди на Светскиот економски форум во Давос, Швајцарија.

Силни ветрови се очекува да продолжат да дуваат низ Лос Анџелес денеска, што потенцијално ќе ги загрозат напорите за гаснење на двата шумски пожари кои опустошија цели населби и убија најмалку дваесет луѓе. Сувите ветрови од Санта Ана со брзина од 80 до 112 километри на час се очекува да продолжат да дуваат до среда, соопшти Националната метеоролошка служба, издавајќи црвено предупредување за „особено опасна ситуација“.

Гувернерот на Калифорнија, Гевин Њусом, изјави дека во текот на викендот државата претходно распоредила пожарникари во најзагрозените области, вклучувајќи ги и оние околу пожарите Палисадес и Итон, два од најголемите што избувнале во Јужна Калифорнија. Најмалку 24 лица загинаа во пожарите што избувнаа минатиот вторник.

Пожарот претвори цели населби во урнатини кои тлееа, оставајќи зад себе апокалиптичен пејзаж. Официјални лица тврдат дека најмалку 12.300 згради биле уништени или оштетени. Њусом рече дека огнената бура може да биде најразорната природна катастрофа во американската историја, имајќи предвид дека уништи илјадници домови и доведе до евакуација на десетици илјади жители. AccuWeather, приватна метеоролошка организација, ја процени штетата меѓу 135 и 150 милијарди американски долари.

Враќањето на силниот ветер го загрозува тешко постигнатиот напредок на противпожарните бригади во локализирањето на пожарот. Во текот на викендот, пожарникарите на земја и од воздух успеаја да го задржат пожарот Палисадес додека се приближуваше до луксузната населба Брентвуд и напредуваше кон густо населената долина Сан Фернандо на север.

Во пожарот во Итон во подножјето источно од Лос Анџелес изгореа 57 квадратни километри, но пожарникарите контролираа 33 отсто од пожарот.

Северно од градот, пожарникарите го ставија пожарот во Херст 89 отсто под контрола и целосно задржаа три други пожари што ги погодија другите делови на државата, соопшти Калифорниското биро за шумарство и противпожарна заштита.

Очекувајќи враќање на силните ветрови, властите го предупредија целото население на округот Лос Анџелес од речиси 10 милиони да биде подготвено за евакуација. Повеќе од 100.000 луѓе беа под наредба за евакуација од неделата попладне, што е помалку од 150.000 претходно.

Припадниците на вооружените сили се подготвени да помогнат во борбата против пожарот, рече Дин Крисвел од Федералната агенција за управување со катастрофи (ФЕМА) во серија телевизиски интервјуа во неделата, повикувајќи ги жителите да почнат да аплицираат за помош при катастрофи.

Пожарникарите од седум држави, Канада и Мексико веќе пристигнаа во областа на Лос Анџелес за да им помогнат на противпожарните станици во Калифорнија.

Финскиот јавен сервис Yle пронашол остатоци од дрога во три различни тоалети во финскиот парламент, пренесуваат медиумите во регионот.

Врз основа на резултатите од тестирањето на тоалетот за време на традиционалната годишна божиќна забава, биле пронајдени траги од амфетамин, екстази или МДМА и кокаин.

Покрај пратениците, меѓу гостите имало и вработени во пратеничките групи, помошници на министри и новинари, меѓу кои и новинари од Yle, според написите во медиумите од регионот.

Кале Лагерблом, оперативен директор на лабораторијата Мезурлабс, кој ги толкуваше резултатите, процени дека количината на остатоци од дрога е мала.

„Резултатите може да се сметаат за сосема безбедни. Остатоците се навистина мали, но очигледно има остатоци“, посочи тој.

Остатоци од дрога биле пронајдени само во тоалетите, на подот каде се одржувала божиќната веселба, додека во двата тоалета на третиот кат немало остатоци.

Со оглед на тоа што употребата на дрога е се почеста појава во Финска, јавниот сервис сакаше да открие дали трагите од употреба на дрога во Финска стигнуваат до просториите на парламентот, односно таму каде што пратениците донесуваат закони за дроги.

Според анкетите во Финска, се повеќе луѓе имаат пробано дрога.

Процентот на луѓе кои пробале и користеле дроги континуирано се зголемува од 1990-тите до 2020-тите, според извештаите од Институтот за здравје и благосостојба (THL), пренесуваат медиумите.

Околу милион луѓе во Финска пробале канабис, додека во 2023 година од оваа дрога починале рекорден број луѓе, вкупно 310 лица.