Европа
Челниците на десет земји во недела ќе разговараат за мигрантската криза по планот на Јункер
Претседателот на Европската комисија, Жан-Клод Јункер подготви план од 16 точки врз чијашто основа во неделата попладне ќе се водат разговорите на челниците на десетте земји кои се наоѓаат на ткн балканска бегалска рута.
Главната цел на оваа средба е да се засили соработката меѓу земјите од западен Балкан, без разлика дали станува збор за членки на Европската унија, кои се наоѓаат на мигрциската рута од Грција до Германија, за да може протокот бегалци да биде ставен под контрола.
На мини-самитот во недела ќе учествуваат македонскиот и романскиот претседател Ѓорге Иванов односно Клаус Јоханис, како и австрискиот канцелар Вернер Фејман, германската канцеларка Ангела Меркел, премиерите на Бугарија Бојко Борисов, на Грција Алексис Ципрас, на Унгарија Виктор Орбан, на Словенија Миро Церар, на Хрватска Зоран Милановиќ и на Србија Александар Вучиќ.
На состанокот ќе учествуваат и претседателите на Европскиот совет и на Европскиот парламент, Доналд Туск односно Мартин Шулц, министерот за надворешни работи на Луксембург Жан Аселборн, чија земја претседава со Советот на ЕУ, високиот комесар на ОН за бегалци Антониот Гутиерес, претставници на Фронтекс – европската агенција за граници, како и на Европското биро за азил.
Претседателот на Европската комисија, Жан-Клод Јункер ја подготви нацрт заедничката изјава, на чијашто основа би требало да биде водена денешната расправа. Но некои челници, веќе однапред во саботата овој нацрт го оценија како „несериозен и нереален“. Според документот, се предвидува покренување на операција на Фронтекс на границата меѓу Македонија и Грција.
Според повеќето европски медиуми кои имале увид во планот на Јункер, се предвидува учесниците на состанокот да се обврзат во рок од 24 часа да именуваат лица за контакти во своите кабинети за да се олесни размената на информациите и координацијата во управувањето со бегалската криза.
Овој документ бара челниците да се обврзат дека ќе ги зголемат капацитетите на своите земји за на бегалците да им биде пружен привремено засолниште, храна, вода и здравствена заштита, а доколку тоа не се во состојба да го сторат, треба да бараат покренување на Механизмот на ЕУ за цивилна заштита. Исто така, би требало да разменуваат информации за капацитетите за да се обезбеди нивна максимална искористеност. Од челниците, исто така, се бара да обезбедат капацитети за регистрација на бегалците и земање биометриски податоци.
Во нацртот на документот се вели и дека челниците се обврзуваат на размена на информациите за големината на бегалскиот бран кој минува низ нивната земја, а во тоа техничка помош можат да им пружат агенциите на ЕУ.
Имигрантите коишто не ги исполнуваат условите за азил би требало да бидат вратени. „Челниците се обврзуваат дека ќе ги забрзуваат своите национални и колективно координирани напори за враќање на имигрантите на коишто не им е потребна меѓународна заштита. Техничката помош ќе ја пружи Фронтекс“, е 10-та точка од планот на Јункер.
Тој бара од учесниците на средбата да се обврзат дека нема да го поттикнуваат доаѓањето на имигрантите на границите на други земји без нивна согласност. „Челниците се обврзуваат дела ќе се воздржат од олеснување на движењето на бегалците или имигрантите на границите на друга земја во регионот без согласност на таа земја. Политиката на насочување на бегалците кон соседна земја не е прифатлива“, се вели натаму во нацрт документот.
Челниците, меѓу другото, би требало да го потврдат принципот дека секоја земја може да одбие влегување на државјанин на трета земја, кој не сака да поднесе барање за меѓународна заштита, со тоа што претходно треба да биде проверено дека не се крши меѓународниот закон за невраќање на жртвите на нивните прогонувачи. Се бара и засилена борба против криумчарењето луѓе. Во нацрт документот се истакнува и дека спроведувањето на сите преземени мерки би требало да се проверува на неделна основа.
Пред самитот во саботата некои од челниците веќе реагираа на планот, па за хрватскиот премиер документот го правел некој кој „се разбудил по длабок сон“ и кој не ја познава фактичката состојба на теренот. Љубљана најави дека ќе бара распоредување на Фронтекс на границата меѓу Турција и Грција и на хрватско-српската граница.
Во Софија се состанаа премиерите на Бугарија, Србија и Романија, кои заземаа заеднички став за средбата во Брисел, односно дека трите земји нема да дозволат да станат тампон зона за бегалците, доколку Германија или некоја друга земја која е цел на мигрантскиот бран ја затвори својата граница./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Голем пожар во фабрика во Берлин, жителите предупредени да го избегнуваат подрачјето
Голем пожар во фабрика во Берлин-Лихтерфелд, која произведува системи за противвоздушна одбрана што се користат на бојното поле во Украина.
Противпожарната бригада предупредува на отровен чад, пренесува „Билд“.
‼️ A defense-industrial company factory is on fire in Berlin
According to media reports, a fire with toxic smoke occurred at a metallurgical plant of the defense-industrial company Diehl. The company is the main contractor of the IRIS-T production program and ammunition for this… pic.twitter.com/jZBBXTEdSm
— NEXTA (@nexta_tv) May 3, 2024
Адријан Венцел, портпарол на берлинската противпожарна бригада, изјави за Билд:
„Целосно изгореа четири ката од зградата. Дел од неа е веќе урнат, а ја гаснеме однадвор. Пожарот повеќе не може да се стави под контрола однатре.
Дежураат околу 160 пожарникари. Спасувачите носат заштитни одела.
Можеме да потврдиме дека во зградата биле запалени и хемикалии. Таму биле складирани сулфурна киселина и бакар цијанид. Постои ризик да се формира водород цијанид и да се издигне во воздухот со чад“, додаде портпаролот.
Противпожарната бригада го информираше населението преку апликации за предупредување.
Feuer mit Explosionen in Berlin Lichterfelde am 03.05.2024 #Feuerwehr #brand pic.twitter.com/4hZG5XekU0
— Niko (@nl_an) May 3, 2024
Станува збор за фирма „Diehl Metal Applications“ која има сопствен систем за доработка на метални површини во објектот.
По проценка на временските услови и соодветниот правец на ветерот, чадот од фабриката се пресели на север. Противпожарната бригада советува избегнување на просторот околу претпријатието, затворање на прозорците и вратите и исклучување на вентилацијата и климатизацијата.
Сојузната држава Берлин издаде официјално предупредување за опасност, советувајќи ги луѓето да ја избегнуваат областа.
Учениците и наставниците од околните училишта беа испратени дома.
Во е-пошта до родителите, една гимназија испратила порака во која ги замолува учениците да останат дома.
Засега нема информации за причината за пожарот, но соопштено е дека нема повредени.
Европа
Борис Џонсон го вратија од гласање, дојде без лична карта: се обиде да го заобиколи сопствениот закон
Борис Џонсон (59), поранешниот британски премиер, во четвртокот бил вратен од избирачкото место, откако се обидел да гласа без лична карта, односно документ со фотографија. Како што пренесува „Гардијан“, Џонсон се обидел да го измами сопствениот закон, бидејќи токму за време на неговиот мандат во Велика Британија била донесена одредба со која се барал документ со фотографија за гласање.
Џонсон, кој поднесе оставка во 2022 година по мандатот обележан со бројни скандали, беше предупреден на избирачко место во Оксфордшир (Јужна Англија) дека мора да го има потребниот документ за докажување на неговиот идентитет. На гласачкото место му дозволија да гласа на локалните избори кои се одржаа низ цела Англија.
Портпаролот на поранешниот премиер изјави дека Џонсон гласал за конзервативците. Тој не ги демантираше пишувањата на медиумите дека поранешниот премиер немал лични документи со фотографија. Минатата година на изборите по промената на законот, околу четири отсто од испитаниците се изјасниле дека не гласале токму затоа што немаат документ со фотографија. Тоа е нешто помалку од околу 800.000 гласачи.
Владата на Џонсон го промени изборниот закон за да ја ограничи можноста за изборен фалсификат, а опозицијата остро ги критикуваше властите за потенцијално обесправување на делови од гласачкото тело. Претходно, гласачите требаше да го дадат само своето име и адреса за да гласаат.
„Мислам дека не е неразумно да се бара од оние што гласаат да покажат некаков доказ за идентитетот“, рече Џонсон во 2021 година за новите правила.
Ова е само последниот инцидент во неговата шарена политичка кариера. Како премиер беше снимен како се крие во фрижидер додека новинарска екипа го бараше за интервју, пренесува медиумот.
Истражувањето спроведено од „YouGov“ покажало дека 14 отсто од Британците пред локалните избори не знаеле дека постои правило за идентификација на гласачите со помош на лични документи.
Европа
Захарова: Секоја агресија врз Крим ќе биде проследена со силна одмазда
Портпаролката на руското Министерство за надворешни работи Марија Захарова денеска ги предупреди Вашингтон, Лондон и Брисел дека сите агресивни дејствија против Крим и мостот на Крим се осудени на неуспех и ќе бидат одговорени со силна одмазда.
„Би сакала повторно да ги предупредам Вашингтон, Лондон и Брисел дека сите агресивни дејства против Крим не само што се осудени на неуспех, туку и ќе бидат одговорени со силна одмазда“, рече Захарова на прес-конференцијата, пренесе ТАСС.
Крим е полуостров со оспорен статус, тој е под де факто контрола на Русија и е поделен на два субјекта на Руската Федерација, Република Крим и град со федерален статус Севастопол, пренесува медиумот.
Украина го смета Крим за дел од својата територија и не ја признава неговата анексија кон Русија.