Товарниот брод на кој според западот се руските борбени хеликоптери за Сирија, е запрен во близина на брегот на Шкотска, откако осигурителната компанија му ја откажала полисата за осигурување, јавија лондонските медиуми.

Запирањето на товарниот брод „Alead“ на руската бродска компанија „Фемко“ доаѓа во периодот на зголемените тензии меѓу Западот и Русија околу ситуацијата во Сирија. Западните сили ја разгледуваат можноста за воена интервенција во Сирија и ја обвинуваат Москва дека го поддржува режимот на сирискиот претседател Башар ал-Асад, чие заминување од власта го бараат. Кремљ, пак, останува на ставот дека ситуацијата во Сирија не може да се реши со барањето за заминување на Асад, туку за тоа да решаваат сириските граѓани по институционален пат.

Во однос на ткн „хеликоптерска криза“, Русија тврди дека го почитува договорот на Советот за безбедност на Обединетите нации и дека во случај испораката на хеликоптерите за Сирија всушност станува збор за ремонт на сириски борбени хеликоптери од руско производство, според договор што бил потпишан многу пред да започне 15-месечната криза во Сирија.

Крајната дестинација на бродот „Аlaed“ којшто испловил од руското пристаниште Калининград на Балтикот, наводно ги превезува борбените хеликоптери од типот Ми-25, е пристаништето Тартус, каде што се наоѓа единствената руска морнаричка база во Средоземјето.

Руската компанија „Фемко“ ги осигурува своите пловила во британската компанија „Standard Club“, којашто во вторникот соопшти дека ги укинала сите осигурителни полиси за бродовите коишто се во сопственост на „Фемко“.

Интернет изданието на весникот The Daily Telegraph пренесува дека британската влада ја известила компанијата за осигурување дека давањето осигурување за таа пратка најверојатно претставува кршење на санкциите на Европската унија воведени против режимот во Сирија“, и оти барала укинување на полиците за осигурување.

Меѓутоа, како што наведува весникот The Huffington Post UK, повикувајќи се на портпаролот на осигурителната компанија, „Standard Club“ самата решила да ги укине осигурителните полиси за осумте бродови на руската компанија.

Против слободното пловење на рускиот брод „Alaеd“ минатата седница се залагаше американската државна секретарка Хиалри Клинтон, која тврдеше дека на него се наоѓа оружје коешто сириската армија на претседателот Асад има намера да го употреби во задушувањето на бунтот./крај/мф/сн