Македонија
Спасеновски испрати писмо до европарламентарците
Во пресрет на објавувањето на Извештајот na EK шефот на Делегацијата во мешовитиот парламентарен комитет, Александар Спасеновски ,со писмо се обрати до европратениците посочувајќи дека Македонија има постигнато голем напредок и дека треба да добие датум за отпочнување на преговори за членство во ЕУ.
Во писмо упатено до европратениците, членови на Делегацијата во МПК- РМ и ЕУ кои ги следат состојбите во земјава, како и до Координаторите на политичките групи во Комитетот за надворешни работи (АФЕТ) на Европскиот парламент и до известителот за Македонија, Зоран Талер, Спасеновски наведува дека Македонија, како земја кандидат, за која ЕК препорача отпочнување на преговори, вложи значителни напори за исполнување на копенхашките критериуми, а особено за спроведување на клучните приоритети од Претпристапното партнерство.
“Македонија постигна добри резултати во делот на политичкиот дијалог, почитувањето на фундаменталните човекови права, спроведувањето на Охридскиот рамковен договор, реформите во полицијата и судството, како и на полето на економските критериуми. Друга област со неоспорен успех каде Македонија е целосно посветена е процесот на стабилизација и асоцијација и споредено со другите земји во регионот, Македонија беше првата која успешно ги заврши преговорите за Договорот за стабилизација и асоцијација и беше најбрзата земја, која во само три и пол месеци, го пополни прашалникот на ЕУ. Денес Македонија го изгради потребниот капацитет и е спремна да започне преговори за членство во ЕУ”, посочува Спасеновски.
Исто така, тој во писмото наведува и дека Македонија беше единствената земја од поранешна Југославија која ја прогласи својата независност на мирен начин.
„Имајќи мирни и силни добрососедски односи, Република Македонија е единствената земја во регионот која го признава и не го оспорува суверенитетот на сите соседни земји. Во духот на добрососедските односи, Македонија го смени својот Устав и го измени своето државно знаме, за да излезе во пресрет на барањата наметнати од страна на Република Грција, но останува подготвена и целосно активна во наоѓање на заедничко и взаемно прифатливо решение за билатералното прашање“, наведува Спасеновски.
Во текот на сите овие години, почнувајќи од првата година на својата независност до денес ,Спасеновски вели дека земјата ја задржа својата целосна политичка заложба за евроатланскиот процес и покрај неизвесното политичко и регионално опкружување.
„Истовремено, земјата игра многу конструктивна и активна улога во сите позитивни регионални и европски иницијативи” – заклучува Спасеновски.
Истакнувајќи ја важноста на писмото, Спасеновски се заблагодарува за континуираната поддршка и соработка на европратениците во процесот на пристапување на Македонија во Европската Унија, со уверување дека успешните резултати ќе продолжат и во иднина како и досега, со цел за целосно спроведување на секоја задача која ќе води кон просперитетна иднина за сите граѓани./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
РСБСП Апелира: Возете внимателно и одговорно во зимски услови!
Според прогнозите во наредните денови се најавени снежни врнежи и значителен пад на температурите, РСБСП потсетува на потребата од внимателно и одговорно управување со моторните возила, како и задолжително правилно користење на зимска опрема. Пред поаѓање на пат, неопходно е возилото соодветно да се подготви за управување во зимски услови.
„Направете проверка на возилото која вообичаено опфаќа: проверка антифриз, нивото на гориво, состојба на бришачите и течноста за ветробранското стакло, состојбата на акумулаторот и состојбата и притисокот на пневматиците“.
РСБСП апелира возачите да ги почитуваат сообраќајните правила и прописи и поставената сообраќајна сигнализација, навреме да се информираат за состојбата на патиштата и нивната проодност, да ја прилагодат брзината на движење според условите и состојбата на патот, да одржуваат безбедно растојание меѓу возилата – со цел зголемување на безбедноста на сите учесници во сообраќајот. Истражувањата покажуваат дека неповолните временски услови бараат од возачот поголемо внимание за време на управување со возилото.
Затоа, РСБСП упатува јасен апел: Само со одговорно однесување во сообраќајот сите заедно можеме да придонесеме за побезбеден сообраќај на патиштата – секој живот е важен.
Македонија
Променливо облачно со сончеви периоди, кон крајот на денот дожд и снег
Времето денеска ќе биде променливо облачно со сончеви периоди. Кон крајот на денот и во текот на ноќта во северозападните делови ќе има повремени врнежи од дожд, на планините од снег. Ќе дува слаб до умерен ветер од јужен правец. Минималната температура ќе биде во интервал од -9 до -2, а максималната ќе достигне од 3 до 9 степени.
Во Скопје, променливо облачно со сончеви периоди. Ќе дува слаб променлив ветер. Минималната температура ќе се спушти до -6, а максималната ќе достигне до 4 степени.
Времето во наредните денови
Во сабота ќе има локални врнежи, на планините и на повисоките места од снег, а во пониските од дожд и снег. Врнежите ќе бидат пообилни во западните делови, а висината на снежната покривка дополнително ќе се зголеми.
Во недела и понеделник ќе дува умерен до засилен северен ветер (над 60 km/h) и ќе има повремени локални врнежи од снег. Температурата ќе биде во опаѓање, а наместа дневната ќе остане под нула степени. Од вторник следува период на стабилно и суво време.
Македонија
Делови од Центар и Зелениково денеска без вода
Од ЈП Водовод и Канализација известуваат дека денеска поради дефект на затварач од ф – 100 мм на ул. 5 бр. 47 во село Моране, во периодот од 08.30 часот па се до отстранување на дефектот без вода ќе останат дел од корисниците од село Моране, општина Зелениково.
Од ЈП Водовод и Канализација исто така информираат дека поради уличен дефект на ул. Васил Ѓорѓов б.б – пред ОУ Киро Глигоров, во периодот од 09.00 часот па се до отстранување на дефектот без вода ќе останат корисниците од улиците Васил Ѓорѓов, Адам Мицкиевиќ, дел од корисниците од улиците Киро Глигоров и Козара, како и објектот на заводот за физикална медицина и рехабилитација, општина Центар.

