Турскиот обвинител побара 2.000 години затвор за градоначалникот на Истанбул, Екрем Имамоглу — главниот политички противник на претседателот Реџеп Таип Ердоган. Според обвинението во кое имал увид „Ројтерс“, Имамоглу се товари за создавање криминална организација, поткуп, измама и местење јавни набавки.

Главниот истанбулски обвинител Акин Ѓурлек соопшти дека случајот опфаќа 402 осомничени и дека државата претрпела штета од 160 милијарди турски лири (околу 3,8 милијарди долари). Адвокатот на опозициската Републиканска народна партија (CHP) изјави дека обвиненијата се неосновани и политички мотивирани.

Имамоглу од март е во притвор и чека судење за корупција, а претходно доби и одделна казна затвор поради навреди кон градски обвинител.

Истанбулското обвинителство истовремено побара и забрана за опозициската CHP, обвинувајќи ја дека се финансирала незаконски. Партијата тврди дека станува збор за политички прогон, додека владата го негира тоа.

Од неуспешниот пуч во 2016 година, Турција има приведено повеќе од 390.000 лица под обвиненија поврзани со тероризам, а над 113.000 се во затвор, објави агенцијата „Анадолија“.

Кина ја обвини американската влада дека хакирала биткоин-новчаници и украла криптовалути вредни 13 милијарди долари.

Локална безбедносна фирма тврди дека нападот бил државно организиран, но според анализата на CryptoSlate и документите на американското Министерство за правда, станува збор за искористување безбедносна ранливост во софтвер, а не за државен хакерски напад.

Во декември 2020 година од новчаници поврзани со кинескиот рударски базен LuBian исчезнале 127.000 биткоини. Подоцна, истите средства се појавиле во новчаници под контрола на американските власти, кои тврдат дека тоа е дел од истрага за перење пари поврзана со кинескиот бизнисмен Чен Жи и Prince Group.

Аналитичарите наведуваат три можни сценарија: криминална група ја искористила ранливоста; средствата биле внатрешно префрлени во мрежата на Prince Group; или, како што тврди Пекинг, САД го извеле нападот и го прикажале како законска заплена – теза за која нема технички докази.

Германскиот канцелар Фридрих Мерц се соочува со обвинувања од економските институти и централната банка дека пренасочува милијарди евра од новиот државен долг, наменет за инвестиции во одбраната и инфраструктурата, за финансирање на поголем социјален буџет и тековни расходи, што, според нив, ризикува „поткопување на конкурентноста на Германија“ наместо да го стимулира растот на БДП.

„Бундесбанк“ и два економски институти предупредија дека значителен дел од планираното дополнително владино задолжување веројатно ќе се искористи за области што треба да се финансираат од редовниот буџет, вклучувајќи даночни олеснувања и субвенции, според „Фајненшл тајмс“.

По победата на федералните избори во февруари, Мерц постигна договор со социјалдемократите и Зелените за ублажување на уставното ограничување за задолжување, познато како „кочница за долг“, за инвестирање во инфраструктура и одбрана.

Новите одредби отворија можност за дополнителни инвестиции до 1.000 милијарди евра во овие две области во текот на следната деценија, што, според очекувањата, треба да го стимулира растот на бруто домашниот производ (БДП) по четири години стагнација, анализираат медиумите.

Институтот за економија од Келн, кој е финансиран од здруженија на работодавачи, изрази загриженост, наведувајќи дека најмалку 40 проценти од планираниот дополнителен долг до 2029 година ќе се користи за покривање на дефицитот во редовниот буџет.

Коалицијата на канцеларот Мерц користи „цела низа механизми за заобиколување“ за да ги заобиколи правилата што диктираат дека дополнителниот долг мора да биде насочен кон нови инвестиции во одбраната и инфраструктурата, според соопштението.

„Оваа буџетска игра ризикува да ја поткопа идната конкурентност на Германија“, рече економистот Тобијас Хенс.

„Бундесбанк“ претходно предупреди дека дополнителното задолжување „се користи во значителна мера за создавање фискален простор“, што значи дека долгот ќе расте „без соодветно зголемување на одбранбениот капацитет и инфраструктурата“.

Централната банка прогнозира дека буџетскиот дефицит на Германија ќе се зголеми на 3,5 проценти од БДП следната година, а потоа ќе достигне околу 4 проценти, од приближно 2 проценти во 2025 година.

Министерот за финансии на покраината Баден-Виртемберг, Дањал Бајац (Зелените), оцени дека Берлин „во голема мера ги надминува политички договорените ограничувања“ на новите правила за задолжување, нарекувајќи го тоа „дрзок потег“ што ги намалува очекуваните позитивни ефекти врз економскиот раст.

„Голем дел од парите одат на мерки што не ја зајакнуваат нашата инфраструктура или конкурентност“, рече Бајац.

На барање за коментар, федералното Министерство за финансии објави дека сите буџети до 2029 година ќе бидат во согласност со правилата дефинирани со уставниот амандман, според кои најмалку 10 проценти од основниот буџет мора да се користат за инвестиции, пренесува Танјуг.

Фото: принтскрин