Интервју: Љубомир Фрчкоски, претседателски кандидат поддржан од СДСМ и НСДП

Разговарал: Атанас КИРОВСКИ Фото: Андон ДАВЧЕВФорум: Вашиот противкандидат Ве обвини дека не го сакате македонскиот народ, а провладините медиуми постојано Ве обвинуваат дека имате земено пари од Грција и дека сте нивниот Тројански коњ во оваа претседателска трка, чија улога би била капитулација на македонските национални интереси пред барањата на Грците.Љубомир Фрчкоски: Тука има два типа обвинувања, стари исто колку и мојата активност во политиката всушност, само се сега заострени. Првиот тип обвинувања се од ендемски корен и тоа е обвинувања од луѓе кои немаат кариера кон луѓе кои имаат голема кариера. Чувството на инфериорност на овие дечки во ВМРО-ДПМНЕ кои се префрлени од СДСМ или ДА. Второто, зошто ги прават овие напади врз мене е актуелната позиција на Владата, посебно после Букурешт, каде што Владата на Груевски комплетно игра грчко сиртаки. Груевски е единствен политичар во историјата на Македонија кој беше сведок против својата држава во судот во Лондон за своите грчки газди. Врз основа на неговото сведочење, Македонија беше казнета 17,5 милиони евра во спорот Хеленик петролеум – Мамидакис кој потоа е платен кон ОКТА. Единствен во историјата кому може директно да му се каже дека служел на грчките газди е Никола Груевски како министер за економија, дефинирано и докажано со пресудата на лондонскиот суд. Според тоа, тој кога се зборува за грчко-македонските односи, нема кредибилитет да зине. А посебно не на оние што ја создавале оваа држава. Зошто себеси се сметате за македонски патриот, а власта ја обвинувате за аматеризам? Нивниот квазипатриотизам помогна да се урне нашата позиција на меѓународен план тотално во овие 2 години, а да се издигне грчката позиција. Ако ги прашате Грците која е најдобра влада во Македонија, тоа е оваа влада на Груевски, која Грците би сакале да владее колку може повеќе. Грците во меѓувреме од негативни момци станаа позитивни, а ние станавме негативците за 2 години. Исконската омраза со Грција доведе до штета за сопствената држава. Сметаа дека со антиквизацијата ќе ги насекираме Грците, всушност си дадовме автогол, ги насекиравме нашите пријатели кои се шокираа од таа тема и сметаат дека е таа не само детска и смешна, туку и автодеструктивна. Како изгледа народ кој после 20 години државност и јасно дефиниран идентитет, почнува наново да се преиспитува кој е и што е. Тоа дополнително придонесе грчката позиција да се прикаже како рационална наспроти една лунатик позиција на Македонија. Откако ги прекинавме релациите после Букурешт со Нимиц и со преговорите воопшто, се отвори темата и на идентитетот. Ние немавме проблем со идентитетот до Букурешт. Сега гледате, во писмото на Бакојани се вели дека идентитетот треба да се изведе од името. Бугарите, во меѓувреме, кога видоа ваква ослабната позиција на Македонија, ги подигнаа своите очекувања. Нивната теза беше дека сакаат да ја видат Македонија во ЕУ и НАТО, но дека имаат разбирање за Грција. Сега таа теза се смени, дека Македонија пред НАТО и ЕУ треба да ги реши сите спорови со соседите, значи не само оној со Грција. Како ќе ве видат слаби и на колена легнати со оваа влада која нè води од пораз во пораз на меѓународен план, така позициите на соседите се засилуваат и стануваат поамбициозни кон нас. Го обвинувате Вашиот противкандидат дека само реторички се залага за влез на Македонија во НАТО, а дека, всушност, нема концепт како тоа да го направи, за разлика од Вашата агенда за брз прием во НАТО. Јас не го обвинувам, јас дефинирам дека е тоа така. Ако ја видите неговата програма, тоа е програмата на ВМРО-ДПМНЕ, само со други датуми, бидејќи ја утнаа работата со визната либерализација и сл. Другиот дел од програмата се глупости, затоа што тој не мисли сериозно да биде претседател, туку прифатил да биде восочна фигура. Ѓорге и Грујо функционираат како Тито и Јованка. Овој одлучил да биде Јованка. Да нема никаква улога, да се глупира само со протокол и да раздава некои плакети, да се бави со духовни работи, да се држиме за рака и да повикуваме духови, таков тип на програма има, и тоа тој го прифатил, и не се буни против тоа. Истовремено, глуми некаква едноставност до простост, демек како нормален човек од народот. Ама тука има 2 милиона нормални луѓе. Тоа не е референца за претседател ако во гимназија сте продавале пиперки и патлиџани во Прилеп. Треба да решите проблеми во мандатот претседателски. Јас дефинирам дека неговата позиција е составена од две концепции кои не се случајни и едно големо отсуство на што било. Неговиот единствен политички ангажман е последната фаза на одумирачкиот комунизам кога тој беше ситен комуњар во Сојузот на социјалистичката младина на Македонија. Тој ја преспа независноста на Македонија заедно со неговиот ментор Шкариќ кој го работеше реформираниот Устав на југословенската федерација кога ние го правевме македонскиот Устав. Вториот тип активност му беше кога беше против Охридскиот договор, заедно со Шкариќ повторно. Организираа семинари и издадоа книга. Тие глумеа научен напад врз Договорот. Дека, наводно, со тоа се прави федерализација на државата, консоцијална демократија и блокада на системот преку Бадентеровиот принцип и на крај беа против пропорционалната застапеност. Кога видоа дека ја утнаа, немаа доблест да го признаат тоа. Е сега, тој вели дека тоа го зборувал како научник. Но, хомо дуплекс, едно зборувам како научник, а друго како политичар – нема. Јас од моите колумни не се откажувам, иако сум ги напишал како слободен интелектуалец. Тоа албанофобство му стои, и сметам дека тоа е многу опасно, колку и да се обидат да го перат. И втора работа е неговата јасна анти-НАТО позиција. Тие две работи кај него се поклопуваат. Анти-НАТО позицијата која разбирливо не може да биде отворено кажана, но неговиот ментор е отворено анти-НАТО активист. Тие имаа теза дека штом се распадна Варшавскиот пакт, нема потреба и од НАТО. Тоа е видливо во вокабуларот кој зборува за европска Македонија, но не и за НАТО. Мислам дека Иванов рече дека НАТО ќе стане поблизок за Македонија кога ќе се реформира и нема да решава по принцип на консензус, туку по принципот -1? Брус Џексон, кој е експерт во таа област, му одговори дека 10 години се расправа околу тоа, и дека најверојатно ќе се расправа уште 25 години додека не се промени во одлучувањето. Тоа зборува само за наивноста, неискуството и барање оправдување за напуштањето на НАТО-агендата. Но, ова е познато. Во Македонија има еден антиамериканизам кој се крие зад тоа. Старите комунистички структури се скрија зад тоа и сега, демек, зборуваат за Европа, а не за НАТО, и тој антимериканизам беше својствен за сите транзициски земји. А, овде во нашава провинциска, селска приказна, ќе ја видите зад тезата дека Нимиц е истрошен и дека Американците треба да бидат надвор од процесот на преговорите. Тоа е јасна локална теза. Не може заменик-министерот за надворешни работи да искажува свое стручно мислење. Тој не е експерт, туку е државен службеник. Откако настана скандал, почнаа да го ублажуваат. Во основа, тие мислат дека Американците ни пречат бидејќи притискаат кон договор, а ако се ослободиме од нив, знаат дека во наредните 10 години со Грците ништо нема да се направи. Ние воопшто не можеме да влеземе во билатерала со нив. Ѓорге развива теза дека ќе направел детант на врвот?! Еве што се случува: кај комисијата за некакви безвезни расправи за историските книги добија шлаканица – јавно. И тоа со дополнителни 4 страници образложение зошто мислат дека е тоа глупаво и зошто немаат намера да губат време со Милошоски како таков. Таа ароганција на Грција, ако останеме сами, само ќе се зголемува во однос со нас. Нашата позиција ќе слабее и ќе ни лицитираат нови и нови барања. Оваа слаба Влада мисли дека е тоа некаков патриотизам, а тоа е копање дупка за самиот себеси и влегување во таа дупка сè подлабоко и подлабоко. После 5 години не е идеја да раскажуваме: ова беше нашиот Милошевиќ, видете што ни направи. Тоа е доцна. Ние сега мора да ги поразиме на 5 април и да го зададеме првиот удар. Велите дека има можност брзо да се надмине спорот со Грција преку име за меѓународна употреба кое ќе ја замени референцата ФИРОМ. Може ли да ги вратиме позициите што ги имавме пред Букурешт? Ние после Букурешт имавме уште подобри позиции. Имавме едно решение што го нудеше Нимиц, а во основа тоа е она што сега го напаѓа Бакојани, а тоа се гаранции за нашиот национален идентитет и јазик како македонски. Тогаш дојдоа експлицитните изјави од Нимиц и Даниел Фрид дека за нив не е спорно постоењето македонски јазик и нација. Тој момент беше дел на дилот тоа да се гарантира. Имаше понуда, ако ние прифатиме, а Грците не, тогаш тоа да се стави во резолуција на Советот за безбедност на ОН која ќе ја замени Резолуцијата 847 со која сме примени во ОН. Но, нашиве не преговараа и воопшто не се испита таа можност. Со експлицитни гаранции на нашиот идентитет ќе дојдеше име за меѓународна употреба кое ќе беше подобро од она што го прифатија вмровците пред Букурешт, Република Македонија – Скопје. Таа понуда беше подобра бидејќи имаше имиња кои имаа историска референца за нас, како што нè викале Римјаните во првиот век по Христа. Имаше некаква основа, не беше лабораториски изум, меѓународното име кое ќе го замени ПЈРМ. Сега, таму има детали, во која широчина ќе важи меѓународното име, дали ќе има нов договор меѓу нас и нив, има еден куп детали. Пиларот на договорот беше готов во октомври, но Американците немаа партнер од наша страна. Нашиве од незнаење, како мали деца, направија глупост. Имаше по Букурешт едно чувство на грижа на совест кај меѓународната заедница за неправдата што ни е направена, една таква енергија и сакаа брзо да нè завршат. И тој момент, кој во теоријата се вика виндоус оф опортјунити, нашиве тотални аматери не го разбраа и не го фатија. Потоа прекина сè. Сега не постои тој процес, можат тие сега да назначат и принцеза да преговара, но процес не постои. Лупаа нешто ко “Максими по дивизија” за некаква двојна формула, а всушност нема ништо, и нема да има ништо. Со овие позицијата ќе се заострува. Ако случајно ја заокружат власта, странците ќе се однесуваат кон нив како кон племе дојдено од Азија. Со жесток притисок, уцени и ароганција кон нас. Ако ја заокружат власта, не дај Боже, тоа ќе ни се случи. Ете зошто тие играат грчко сиртаки. Никој друг во државава не игра и не е попогоден за грчката влада отколку Груевски. Жесток сте во вашиот вокабулар. Некои експерти обвинија дека како последица на жестоката реторика во кампањата ни се случи и оној тежок инцидент на плоштадот. Како да не, тоа било поради вокабуларот. Тоа е гола пропаганда. Насилството е поттикнато од владеењето кое е насилно. Ние имаме оценка во сите извештаи дека Македонија е демократија која назадува, по сите основи. Како транзицијата треба да заврши според концептот на Владата? Со диктатура? Тоа ли е завршување на транзицијата и транзиционите политичари? Дали транзицијата завршува со стапови и лопати? Тие ја завршуваат транзицијата како “инцидент” од влада и премиер, овде го користам терминот на Брус Џексон. Ние завршуваме како авторитарен систем, со судење новинари, имаме притисок врз слободата на собирање. Ние ова никогаш не сме го имале, независно дали биле влади на Љубчо или Бранко. Да се разбереме, во Уставот пишува дека има слобода на собирање и без пријавување. Што е тоа 24, 48 часа? Сега ние да отидеме со 1.000 луѓе да протестираме, имаме право. Не смеат тоа да го забранат – тоа е уставна одредба. Што сега измислуваат забрани и пријави, како причина за судирот. Тоа не е основа за судирот.