Македонија
Милошоски допатува Крф

Македонскиот министер за надворешни точно напладне со владиниот авион пристигна на грчкиот остров Крф каде што ќе учествува на неформалниот министерски состанок на државите членки на ОБСЕ, кој викендов се одржува во организација на грчкото Претседателство, јави известувачот на МИА
Ова ќе биде прв состанок од ваков тип во рамките на ОБСЕ и на него се очекува шефовите на дипломатиите и другите претставници на 56-те држави-членки да дискутираат за прашања поврзани со современите безбедносни притисоци со кои се соочува Европа, потребата од зајакнување и унапредување на постоечките европски безбедносни аранжмани и структури и изнаоѓање начини и механизми за брз и ефикасен заеднички одговор на можните закани по мирот и стабилноста на државите од Европскиот континент. Предвидено е најголем дел од дискусиите да се водат на вториот ден од состанокот на кој ќе се дискутира за сеопфатна безбедност, потврда на постигнувањата и разгледување на перспективите за обновување и зајакнување на меѓусебната доверба и разбирање. Состанокот на ОБСЕ ќе започне со неформална вечера непосредно по средбата на министерскиот Совет на шефовите на 28-те членки на НАТО, кој исто така се одржува денеска на Крф, на тема „Русија – НАТО“. Беше предвидено оваа средба да се одржи на 20 мај во Брисел, но Русија одби да дојде во знак на протест поради маневрите на НАТО во Грузија. Покрај учеството на работните сесии на состанокот и предвиденото обраќање, министерот Милошоски на маргините ќе оствари повеќе билатерални средби со своите колеги. Засега нема одговор од официјална Атина на барањето на македонското Министерство за надворешни работи на состанокот на Крф да се реализира одвоена средба меѓу македонскиот министер Антонио Милошоски и неговата грчка колешка Дора Бакојани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.