Македонија
Започна изградба на лабораторија за мебел
Камен-темелник за изградба на Лабораторија за испитување на мебел, градежна столарија и други дрвни и недрвни материјали во склоп на Шумарскиот
Камен-темелник за изградба на Лабораторија за испитување на мебел, градежна столарија и други дрвни и недрвни материјали во склоп на Шумарскиот факултет беше поставен денеска.
Лабораторијата, која ќе го испитува квалитетот на мебелот, ќе издава и сертификати за квалитет, кои се потребни при извоз на мебел за задоволување на европските стандарди и критериуми, а истовремено ќе биде и заштита за потрошувачите во Македонија од увезениот неквалитетен мебел. Tаа ќе ги зголеми можностите на професорите од Шумарскиот факултет во нивната научно-истражувачка работа, а исто така, ќе можат да ја користат и студентите.
Лабораторијата за испитување на мебелот, ќе биде опремена со специјални уреди за тестирање на мебел, прозорци, врати, душеци, паркет и други дрвни и недрвни материјали.
Проектот за лабораторијата е изработен од страна на Шумарскиот факултет и одобрен од страна на Владата на Република Македонија, а нејзината изградба се очекува да заврши кон крајот на септември, оваа година.
Камен-темелникот го поставија министерот за образование и наука Перо Стојановски, ректорот на универзитетот „Св. Кирил и Методиј“ проф. д-р Велимир Стојковски и деканот на Шумарски факултет, проф. д-р Бранко Рабаџиски./крај/со/мп
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити на средба со словенечкиот амбасадор Прескер: Словенија за нас е пример во делот на заштитата на природата, инвестирањето во зелена економија и зелениот развој
Првиот заменик-претседател на Владата и министер за животна средина и просторно планирање, Изет Меџити, денеска, оствари средба со амбасадорот на Република Словенија Грегор Прескер.
На средбата се разговараше за досегашната соработка меѓу двете држави, кои имаат потпишано спогодба за развојна соработка помеѓу владите на Република Северна Македонија и Република Словенија и имаат формирано заедничка мешовита комисија за билатерална соработка.
Вицепремиерот Меџити истакна дека Словенија за нас е пример во делот на заштитата на природата, инвестирањето во зелена економија и зелениот развој.
Амбасадорот Прескер ја потврди подготвеноста на Словенија да ја поддржи нашата држава на патот кон ЕУ-интеграцијата и на имплементација на активностите со кои ќе се забрза зелениот развој на државата.
Меѓу другото, Меџити и Прескер разговараа и за тековните политички прашања.
Македонија
Муцунски до Столтенберг: Вашата значајна улога во турбулентните години го зајакна и модернизира НАТО
Министерот за надворешни работи и надворешна трговија, Тимчо Муцунски, во рамките на работната посета на Брисел се сретна со генералниот секретар на НАТО, Јенс Столтенберг, кој набргу ќе замине од оваа позиција. По тој повод, министерот му врачи на Столтенберг благодарница и плакета за извонредни достигнувања и придонес за евро-атлантската безбедност.
Изразвувајќи благодарност за неговото лидерство и водењето на организацијата, истовремено нагласувајќи ја важната поддршка за нашето членство во алијансата, министерот Муцунски го истакна значењето на личните напори на Столтенберг за зачувување на заедничките вредности и одржување на мирот и стабилноста во Западен Балкан, регион од стратешко значење за НАТО, известува МНР.
Воедно, тој ја потенцира и посветеноста кон политиката на отворени врати на алијансата како клучен фактор за зачувување на регионалната стабилност.
„Вашата значајна улога во турбулентните години го зајакна и модернизира НАТО правејќи ја алијансата покредибилна и поподготвена за зачувување на мирот и стабилноста во евро-атлантската област“, нагласи Муцунски на средбата.
Македонија
Трипуновски: МЗШВ и ФАО проблемот на повеќе од 2.000 земјоделци во Пелагонија го надминуваат со почнување активности за реализација на проектот
Министерот за земјоделство, шумарство и водостопанство, Цветан Трипуновски денеска присуствуваше во рамките на работилницата на проектот поддржан од ФАО.
Министерот се заблагодари на сите присутни што се дел од овој настан кој го означува почетокот на иницијатива што е од големо значење за земјоделскиот развој во Пелагонија, кој е еден од најважните земјоделски региони во Македонија.
„Денеска заедно со претставниците од ФАО сме во општина Битола, на расправа каде што се поканети и земјоделците, настанот означува отпочнување на проектот за решавање на децениски проблем кој што го имаат преку 2.000 земјоделци од овој регион“, истакна министерот Трипуновски.
Тој додаде дека досега земјоделците не беа во можност да го користат земјиштето за земјоделско производство заради сосопственост со државата. Но, со овој проект би се овозможило негово максимално користење.
„Министерството и ФАО ќе ги спроведат потребните активности за забрзано решавање на овој проблем кој што за жал долги години стоел како отворена ситуација“, појасни министерот Трипуновски.