Политика
Груевски: Доста молчевме, време е да одговориме!
Нашите реакции досега беа молчење, но доста беше, Македонија е време да одговори, порача во понеделник вечер премиерот Никола Груевски, во обраќањето на народниот собир што се одржа пред републичкото Собрание.
Тој додаде дека државата во последните три и пол месеци е под жесток напад, но дека е дојдено времето да се одговори на тој напад.
На почетокот Груевски побара да им се оддаде почит на осумте загинати бранители во акцијата во Куманово.
„Нашите зборови, зборовите на политичарите, ќе поминат, но нивната битка ќе се памети“, рече Груевски, додавајќи дека тоа е примерот како се сака државата.
Понатаму во обраќањето, премиерот појасни дека ова што сега се случува е всушност диктатура на политичкото малцинство врз власта.
„Нема повлекување, нема потегнување, нема предавање. Македонија е силна, Македонија е одлучна, Македонија пак победува“, порача Груевски.
Рече дека нема да дозволат македонскиот народ да се закрви меѓу себе, посочувајќи го претседателот на СДСМ Зоран Заев како предводник на нечесна игра.
„Овој човек, не само што нема да биде премиер, тој повеќе никогаш нема да ја добие довербата во Струмица“, рече Груевски, при тоа додавајќи дека на Македонија не и е потребна владејачка гарнитура што им се става на располагање нас странски служби.
„Македонија не сака да ја предводи човек што им се заканува на неистомислениците со аудио снимки“, додаде уште премиерот и претседател на ВМРО-ДПМНЕ.
Груевски натаму подвлече дека за време на деветгодишното работење имаат направено грешки, но дека токму од грешките учат и излегуваат посилни и како луѓе и како партија.
„Не може во девет години да нема грешки и пропусти. Сите ние сме обични луѓе и никој не е безгрешен. Свесен сум за сопствените грешки…Овие креирани материјали ќе бидат поука за нас, да ги поправиме грешките. Сакајќи да ни нанесе зло, тој ќе нè направи посилни. Овој народ ќе нè зајакне и зацврсти“, порача Груевски.
Тој најави пакет на мерки и промени во неколку сфери, но СДСМ, како што рече, има други цели.
„Ние сакаме да ја зајакнеме државата, а тие да дојдат на власт по секоја цена“, истакна премиерот.
Тој посочи дека во време кога Европската комисија ја изнела прогнозата за економскиот раст во 2015 и 2016 година, во која Македонија е лидер во Европа, се случил терористичкиот напад во Куманово.
„Сака да нè втурнат во меѓусебен конфликт, но не им успеа“, рече Груевски, при тоа додавајќи дека постои реален план за надминување на кризата и дека нема да му се дозволи на Заев да го урне економскиот напредок.
„Се јави вознемиреност кај странските инвеститори, но јас им порачувам на сите, Македонија нема потенцијал за конфликт и дестабилизација. Народот не го сака тоа. Тоа се покажа из а време на терористичкиот напад. Тоа беше пресметка со криминално-терористичка банда“, подвлече Груевски, додавајќи дека некои медиуми, финансирани и управувани од надворешни центри на моќ, се обиделе со пласирање на разни дезинформации за убиени цивили, да ја втурнат земјата во меѓуетнички конфликт.
ВМРО-ДПМНЕ нема да дозволи какво и да е решение и каков и да е компромис за спорот кој го наметна Грција, кој би бил прифатен од поединци, Владата или Парламентот, без претходно да се изјаснат за него граѓаните на референдум, порача премиерот и лидер на ВМРО-ДПМНЕ, Никола Груевски.
„ВМРО-ДПМНЕ ќе ги продолжи разговорите со Грција со јасно изградени позиции, овој став е доволно добро дизајниран за да се најде компромис кој би бил прифатлив за двете страни, вклучувајќи ги и граѓаните на Република Македонија.Членството во НАТО и ЕУ остануваат највисок приоритет, независно од шпекулациите, иднината на Македонија е како членка на ЕУ и НАТО, и тоа досега ќе беше завшена работа доколку не беше блокадата од Грција“, изјави Груевски.
Тој додаде дека колку и да биле зли намерите на лидерот на опозициската СДСМ, Зоран Заев преку последниот сет од објавени прислушувани телефонски разговори, тие покажале дека од страна на владините претставници во преговорите со Грција се бараат цврсти гаранции за македонскиот идентитет.
„Членството во НАТО и Европската унија(ЕУ) останува наш врвен приоритет.Иднината на државата е во ЕУ и НАТО“, нагласи Груевски, негирајќи ги шпекулациите дека земјата се врти во друг правец.
На крајот Груевски се осврна и на преговорите што ги водат партиите за надминување на политичката криза, порачувајќи му на поранешниот претседател на СДСМ Бранко Црвенковски да се тргне од политиката.
„Нема да дозволиме решенија спротивни на изборната волја на граѓаните. Ако дозволиме, што ќе ни се тогаш избори“, рече Груевски, при тоа додавајќи дека тогаш секој може да си купи опрема за прислушување и да ги уценува опонентите.
На народниот собир беа прочитани и декларации од повеќе европски политичари, кои му дадоа поддршка на Груевски и побара од опозицијата да се врати во Собранието. /крај/мф/ст
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски од Чаир: На Македонија ѝ треба обединување и единство, а не поделби, владата на ВМРО-ДПМНЕ ќе вложи 1 милијарда евра за проекти во сите општини
Се чувствува победничка атмосфера и енергија, тоа е важно за сите нас и ни дава мотив да продолжиме посилно да се бориме. Овие денови кои ни преостануваат треба максимално да се мобилизираме, а најновите анкети кои ги добив утрово велат дека ќе биде голема победата и на 24 април и на 8 мај, изјави претседателот на ВМРО-ДПМНЕ, Христијан Мицкоски на митингот во Чаир.
Мицкоски истакна дека сега во Македонија имаме политичка гарнитура која повеќе од две децении е на власт, тоа се ДУИ чија суштина се поделби и грабеж на народот.
– Кога ќе анализирате која е суштината на ДУИ, Али Ахмети и Артан Груби, Бујар Османи, Талат Џафери и останатите, кај нив нема ништо посебно тие само го делат народот по етничка основа и така опстојуваат. Дали некој може да се сети некоја добра работа која Али Ахмети и Артан Груби ја имаат направено, но можам да кажам десетици лоши работи, рече Мицкоски.
Мицкоски нагласи дека сега ДУИ сериозно ќе бидат изненадени на овие избори, а им се познава нервозата затоа што после 8 мај треба да одговараат за сето она што му го направија на народот, за целиот грабеж.
Мицкоски се осврна на проектите кои ги планира идната влада од ВМРО-ДПМНЕ и посочи дека се планира да се инвестира 250 милиони евра секоја година во општините, 1 милијарда во 4 годишен мандат.
– Во Чаир ќе има висока сума, еден од проектите е проширување на булеварското решение на влезот од Бит Пазар кон Чаир и тоа мора да се направи и го повикувам градоначалникот да се пријави со повеќе проекти. Тоа ќе додаде вредност во квалитетот на живеење. На Македонија и треба обединување и единство не поделба, потенцираше Мицкоски.
Мицкоски додаде дека идната влада на ВМРО-ДПМНЕ планира да отвори нови 55.000 работни места, да функционира со владеење на правото на целата територија и нема да има територии каде ќе владејат шерифи.
Да обезбедиме пристојни услови за поголем инвестициски бран и од странство и од домашни инвеститори за да може децата да останат тука. Мораме и тие кои си отидоа да ги вратиме назад. Да обезбедиме надеж. Ве повикувам на 24 април сите да се обединиме околу број 2 и да гласаме за Гордана Силјановска Давкова, а потоа да се обединиме и заедно на 8 мај да испишеме историја за коалицијата Твоја Македонија предводена од ВМРО-ДПМНЕ, изјави Мицкоски.
Македонија
Доц. д-р Бобан Карапејовски: Ќе обезбедиме вработување на најдобрите 200 студенти, како и стипендии од 500 евра месечно
Носителот на листата на кандидати за пратеници во ИЕ 1, Бобан Карапејовски на денешната прес конференција рече дека во програмата на Движењето ЗНАМ – За наша Македонија за парламентарните избори, наречена „Проглас за достоинствена Македонија“ еден од приоритетите се образованието и науката, кои се суштински за градењето силна и просперитетна држава.
„Во Прогласот за достоинствена Македонија на Движењето ЗНАМ – За наша Македонија, предвидовме два сегменти: зголемување на достоинството на вработените во образованието и во науката и поставување нов систем, со кој овој сектор ќе се врати во фокусот и ќе помогне во создавањето функционално писмен и високообучен кадар, како и продлабочување на
научните истражувања“, рече Карапејовски и додаде: „Во однос на првиот постулат, достоинството на вработените во образовниот сектор, е предвидено платите на наставниците и на професорите да се зголемат до 100 % од актуелните. И, тоа е најмалку што можеме да направиме за да му го вратиме угледот на учителот и да ги привлечеме најдобрите да бидат
даскали на нашите деца“.
Тој потенцира дека за најдобрите студенти ќе се обезбедат стипендии во износ од 500 евра месечно, а за најдобрите двесте студенти вработување во научните и во институциите на системот.
„Партиските вработувања мора да запрат! Не смее партиската книшка да биде услов за вработување. На универзитетите и во државните институции треба да работат најдобрите за најдоброто за сите нас. Ни треба научен подмладок веднаш, како и
ревизија на условите и зголемување на квалитетот на акредитираните универзитети, кои се множат на секој чекор, а не даваат квалитет“, рече тој.
Карапејовски рече дека наставните програми и планови ќе се усогласат со модерните технологии и достигнувања и појасни дека ќе се изгради систем што ќе поттикнува креативно, аналитичко и логичко размислување кај учениците, но и ќе поттикнува креативност во областа на бизнисот и на финансиската едукација. Учебниците ќе бидат усогласени со новите наставни планови и програми и напишани од најдобрите автори, навреме доставени до учениците.
Тој исто така рече дека издвојувањата од буџетот за науката ќе се зголемат, а ќе има и посебни стимулации за оние што успеваат да објавуваат во најпрестижните списанија и да соработуваат со колегите од најдобрите светски универзитети, како и посебни субвенции за таканаречните национални дисциплини.
Македонија
Пендаровски: Ги знам нивните лажни анкети, ги знам и реалните анкети и реално ви кажувам дека на 8 мај победуваме!
На само неколку дена пред првиот круг на гласање, од Скопје кандидатот за претседател Стево Пендаровски искажа верување дека по повеќе од три децении независност, македонските граѓани многу добро знаат да препознаат чија програма е реална, а која е во расчекор со времето во кое живееме.
„Овој претседател и оваа политичка гарнитура никогаш не давале лажни надежи и ветувања за брза реализација на стратешките цели на државата. И денес пред вас, не велам дека Македонија за само неколку години ќе биде најразвиената држава во Европа, не ветувам дека целиот тој процес ќе трае само неколку месеци, но, говорам и повторувам секаде дека најголемиот ризик е ако на изборите им дадеме шанса на оние за кои претходно веќе видовме како владеат со луѓето цели 11 години“, истакна Пендаровски.
Пендаровски денеска повика на масовна излезност на 24 април и на 8 мај, за како што рече, да не се враќаме во режим.
„Ги знам нивните лажни анкети, ги знам и реалните анкети и реално ви кажувам дека победуваме на 8 мај. Со заокружување на бројот 1 продолжуваме кон Европа и кон развиениот свет и дефинитивно не се враќаме назад во режим и заробена држава“, рече Пендаровски.