Американскиот државен секретар, Ентони Блинкен, изрази уверување дека спроведувањето на прекинот на огнот во Газа ќе почне в недела, на 19 јануари. Неговите коментари дојдоа откако Израел го одложи владиното гласање за договорот и го обвини Хамас дека поставува нови услови.

„Уверен сум и целосно очекувам дека имплементацијата ќе започне, како што рековме, в недела (19 јануари)“, рече Блинкен на последната прес-конференција пред промената на американската администрација.

Државниот секретар изјави дека тој и други претставници од администрацијата на претседателот Џо Бајден, чиј мандат завршува на 20 јануари, биле на телефон за да се обидат да ги решат прашањата околу прекинот на огнот. Договорот беше објавен на 15 јануари преку посредникот Катар, пренесе „Франс прес“.

„Воопшто не е изненадувачки што во преговарачкиот процес, кој беше толку тежок и непредвидлив, може да има некоја незавршена работа“, рече Блинкен, додавајќи: „Се обидуваме да ги разработиме тие детали и сега“.

Според Ал Џезира, израелскиот премиер Бенјамин Нетанјаху им рекол на семејствата на заложниците на Хамас дека во следните фази од примирјето во Газа, неговата земја ќе добие подобри услови, бидејќи Доналд Трамп ќе биде во Белата куќа.

Исто така, медиумите ја дефинираат втората фаза како голем предизвик за траен мир.

Првата фаза од примирјето договорено во Катар треба да започне со прекин на огнот оваа недела, при што Хамас треба да ослободи 33 заложници, главно жени, деца и постари лица.

Оваа прва фаза ќе трае 42 дена, а Израел треба да ги ослободи палестинските затвореници додека 600 камиони хуманитарна помош дневно предвидено е да влезат во Газа.

Следните две фази ќе влијаат на израелското воено присуство во коридорот Филаделфија меѓу Газа и Египет, како и ослободување на повеќе заложници на Хамас.

Според Ал Џезира, дали прекинот на огнот ќе биде траен ќе зависи и од овие претстојни преговори.

Израел нема да објави официјален крај на непријателствата во Појасот Газа додека Хамас не ги повлече условите наметнати во последен миг.

Ова го соопшти портпаролот на израелскиот премиер Бенјамин Нетанјаху и додаде дека кабинетот на Тел Авив нема да го одобри договорот што го постигнаа преговарачите во Доха.

Портпаролот рече дека израелските претставници остануваат во Катар.

„Вчера мислевме дека имаме договор, денеска Хамас направи измени на овој договор, дури и откако беше финализиран. Сега посредниците се обидуваат да побараат дополнителни компромиси од Израел. Токму вчера премиерот цврсто нагласи дека Хамас мора да го повлече последното барање за промена во распоредувањето на израелските сили во коридорот Филаделфија“, објави портпаролот на Бенјамин Нетанјаху. Според Би-Би-Си, Хамас побарал дополнително ослободување на двајца негови високи членови кои се наоѓаат во израелските затвори.

Официјално, палестинското движење тврди дека се придржува до договорот.

Според информациите за договорот кои беа објавени во јавноста, во првата фаза се очекува постепено повлекување на израелските сили од Појасот, како и ослободување на 33 заложници кои ги држи Хамас, во замена за палестински затвореници.

Вчера Катар и Соединетите држави објавија дека преговарачите во Доха се договориле примирјето да почне в недела, но неколку часа потоа Израел продолжи со нападите врз енклавата.

Данската премиерка Мете Фредериксен му кажа на Доналд Трамп дека Гренланд има право да одлучува за својата иднина, пренесува Би-Би-Си, oткако новоизбраниот американски претседател предизвика бура во Копенхаген минатата недела кога навести дека САД сакаат да го купат арктичкиот остров лоциран на данска територија.

За време на 45-минутниот телефонски разговор, Фредериксен вчера му кажала на Трамп дека Данска е подготвена да ја зголеми својата одговорност за безбедноста на Арктикот. Таа ги повторила и изјавите на гренландскиот премиер Муте Егеде, кој неодамна јасно стави до знаење дека Гренланд не е на продажба.

Трамп не одговори јавно, но тој повторно ја објави анкетата од 2019 година на неговата платформа „Трут соушал“ која покажува дека 68 отсто од Гренланѓаните ја поддржуваат независноста од Данска. Се очекува да се одржи референдум за независност, а Данска веќе соопшти дека ќе го почитува секој резултат.

Трамп ја изрази својата желба да го купи Гренланд уште во 2019 година. Откако Фредериксен го нарече предлогот апсурден, Трамп нагло ја откажа посетата на Данска. Во телефонскиот разговор Фредериксен нагласила и дека данските компании придонесуваат за растот и работните места во САД и дека е во интерес на Европската унија и САД да ја зајакнат трговијата.

Минатата недела Трамп и се закани на Данска со високи царини доколку не се откаже од Гренланд, што предизвика загриженост кај данските бизнисмени. САД се вториот најголем извозен пазар во Данска, така што целните царини би имале значително влијание врз нивната економија.

Денес, Фредериксен ќе одржи, како што го нарекуваат данските медиуми, кризен состанок со бизнис лидерите, вклучително и директорите на пивскиот гигант Карлсберг и фармацевтската компанија Ново Нордиск, позната по лековите за дебелина и дијабетес кои се популарни во САД. Предвиден е и вонреден состанок на Советот за надворешна политика, на кој ќе присуствуваат претставници од целиот парламент.

Пратеничката на Гренландскиот парламент Аја Кемниц рече дека го поддржува ставот на премиерот дека одлуката за Гренланд треба да ја донесат Гренланѓаните. „Имам голема доверба во премиерот, како и во гренландскиот премиер Егеде. Мислам дека е важно тие да соработуваат тесно“, рече таа. Егеде претходно оваа недела изјави дека неговата влада е подготвена да започне дијалог со претстојната администрација на Трамп.

Коментарите на Трамп и посетата на неговиот син на Гренланд минатата недела предизвикаа голема загриженост во Данска. Соочена со можноста за заострување на односите со нејзиниот близок сојузник, Фредериксен внимателно ги избираше зборовите, притоа нагласувајќи го правото на Гренланд на самоопределување. Ханс Редер, политички уредник на ТВ2, истакна дека фактот што на Трамп му биле потребни 45 минути за да разговара со Фредериксен е знак дека прашањето на Гренланд е навистина нешто што Трамп сериозно го разгледува, а не само минлива мисла.