Меѓународната кризна група (МКГ) во својот извештај посветен на спорот меѓу Македонија и Грција околу името оценува дека двете држави споделуваат одговорност за влошените односи и дека од клучно значење за стабилизацијата и европската интеграција на целиот Балкан е да биде најдено решени

Односите меѓу двете држави  се најспротиставени од почетокот на 90-тите, стои во документот насловен Името на Македонија – да се надмине ќор-сокакот.  МКГ оценува дека и натаму е важно да се најде решение, наведувајќи дека грчката одлука да го блокира членството на Македонија во НАТО и натамошниот напредок во интеграцијата во Европската Унија ја минира стратегијата на двете организации за стабилизација на Западниот Балкан преку проширување. И Владата на Никола Груевски сноси дел од одговорноста, смета МКГ, според која Грците на преименувањето на скопскиот аеродром во Александар Велики и на редица други потези гледаат како на офанзивно присвојување на нивното хеленистичко наследство и директна провокација.  “Загрижени сме дека, доколку не уследи некакво придвижување во правец на решение, би можеле да дојдеме во ситуација во која сегашните алтернативи повеќе нема да бидат на располагање”, изјави заменик-претседателот на МКГ за политика Доналд Стајнберг, додавајќи дека е важно за двете држави и за меѓународната заедница да ја земат предвид цената што ќе се плати доколку не биде постигнато решение.    МКГ смета дека прв чекор за решение на спорот е повторното градење доверба. “Напорите да се приближат двете страни до спогодба би вклучиле и поголема подготвеност меѓу членките на НАТО и ЕУ да извршат притисок врз Атина да усвои поконструктивен приод и да одговори на отстапките од Скопје со суштински отстапки од своја страна”, стои во извештајот.  Групата повикува двете страни да ја реафирмираат заложбата кон Привремената спогодба од 1995 г.  додека не биде постигнато решение, Скопје да ја користи референцата ПЈРМ во меѓународни форуми, а Атина да ја почитува Спогодбата и да го тргне ветото врз членството на Македонија во НАТО и ЕУ. Потоа, македонската влада да искаже јавна подготвеност да го прифати последниот предлог на посредникот на ОН Метју Нимиц – „Република Северна Македонија”, а Грција за возврат да го прифати македонскиот идентитет и јазик, со тоа што двете страни би се согласиле дека тоа не имплицира ексклузивно право на користење на терминот “македонски” и не го доведува во прашање користењето на истата придавка кога станува збор за жителите на грчката покраина Македонија. МКГ дури предлага и основање заедничка комисија составена од историчари која би го испитала третманот на заедничката историја на регионот, а со цел да се постигне основно разбирање и да се избегнат референците во образовните програми што се навредливи за националниот сензибилитет на двете држави. Ова е вторпат Меѓународната кризна група да дава директни препораки до една власт во Република Македонија за прашања кои тешко можат брзо да бидат решени од политички аспект. И повторно тоа се прави во особено чувствителен аспект за целиот регион, како што беше со препораките пред конфликтот во 2001 г., кој МКГ го навести наводно анализирајќи го организираниот криминал на Балканот и македонскиот удел во него.