Македонија
Груевски: Владата ќе биде отворена за соработка со новинарите
Премиерот Никола Груевски го поздрави договорот за декриминализација на клеветата што во средата го постигнаа Здружението на новинарите и Владата.
Тој во писмениот став до медиумите му се заблагодарува на ЗНМ за конструктивниот и одговорен пристап, но и на Европската комисија за својот пристап и сугестии и поддршка на процесот.
„Во овој договор, колку и некој да сака несовесно да го проблематизира, се внесени најдобрите практики од земјите во регионот, а како база се користени и најдобрите меѓународни практики, како и советите на специјалните советници од Советот на Европа. Оттука, треба да сме охрабрени и горди на постигнувањето на еден ваков значаен договор, кој јас го гледам само како едно ново светло врз позитивните процеси во државата, не само на домашен туку и на меѓународен план, посебно по серијата на полемики кои се појавија во врска со слободата на медиумите, и ова треба да не мотивира дополнително за да продолжиме понатаму. Дијалогот секако мора да продолжи и за сите останати прашања кои ги засегаат новинарите, и ние како и досега сме отворени и подготвени за тоа“ стои во писмениот став на премиерот.
Во својот став тој се осврнува и на одлуката за одземање на дозволата за работа на телевизијата А2, која ја донесе Советот за радиодифузија
„Разбирајќи ги чувствата на лицата кои досега функционирале во телевизијата, и свесен за обврската на членовите на Советот за радиодифузија за дословно почитување на законските норми, би истакнал дека законските одредби треба да се почитуваат од секого, без исклучок, и без внимание на било каква припадност, без разлика во сферата или пак дејноста на која се однесуваат, а телата кои одлучуваат за почитувањето на законот тоа треба да го прават врз основа на правни и законски аргументи, и тоа секако да го прават неселективно и врз основа на закон и принципи“ се вели во писмената изјава на Груевски.
Тој апелира до засегнатите страни да не се обидуваат со политизација и свесно погрешно толкување да се руши имиџот на државата и да ги искористат сите правни мерки и механизми и да ги презентираат сопствените ставови пред надлежните институции низ соодветната законска процедура и предвидените прописи.
„Сакам јасно и недвосмислено да потенцирам дека Владата на Република Македонија и во идниот период ќе биде отворена за соработка со претставниците на новинарската фела, со Здружението на новинари на Македонија, со синдикатите, и со сите новинари, во насока на подобрување и унапредување на процесите кои ќе значат подобри услови за вршење на дејност, изразување и работа. Посветени сме да ги ислушаме сите предлози за нов квалитет во сферата, и тоа во сите области од интерес на новинарите во врска со правата од работен однос, можностите и ресурсите за работа, и останати прашања кои би биле истакнати“ се вели во соопштението./крај/со/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Левицата: Изборниот систем сите нас нè краде, скратени сме за најмалку два мандата
„Донтовиот изборен модел, поделен во шест изборни единици, заедно со неколкукратно спроведуваниот геримандеринг на нивните граници, уште еднаш ги сруши темелите на демократијата и еднаквоста како уставни категории. Ваквиот изборен модел овозможи легална изборна манипулација со гласачкото тело, што се покажува како најголем непријател за гласот на граѓаните и на штета на Левица“, реагираат од оваа партија.
Појаснуваат дека согласно логиката на овој неправеден изборен модел, 23.725 гласови односно 34.55% од добиените гласови на Левица, не се валоризирани во пратенички мандати.
„Овој изборен модел го поништил секој трет глас за Левица! Па така, за Левица да добие еден пратеник биле потребни околу 11.000 гласови, додека за еден пратеник на ДПМНЕ или ДУИ било потребно нешто над 7000 гласови.
Доколку гласовите беа вреднувани еднакво, Левица во овој пратенички состав ќе имаше најмалку 2 пратеника повеќе во овој парламентарен состав.
Ако се земе предвид и ваквиот дефицит од претходните парламентарни избори, во текот на овие осум години, со овој изборен модел, на партијата ù се скратени најмалку 5 пратеници што е еднакво на парламентарна група“, истакнуваат од партијата.
Додаваат дека ваквиот демократски дефицит кој го создава овој изборен модел не смее да продолжи.
Според нив, гласот на граѓаните мора еднакво да биде вреднуван.
„Заради тоа, услов на Левица, за било каква идна влада, ќе биде промена на изборниот модел, воведување на една изборна единица и императивен мандат на пратениците“, се истакнува во соопштението на Левица.
Македонија
Запленети 4,8 килограми злато при влез на автобус на ГП Богородица: сообраќал на линијата Истанбул – Гостивар
Царински службеници запленија 4,8 килограми златен накит со проценета вредност од 20,4 милиони денари по контрола на автобус на граничниот премин Богородица при влез во државата.
Имено, царинските службеници на граничниот премин Богородица селектираа автобус што сообраќал на линија Истанбул – Гостивар, при што е извршен детален претрес.
Во пределот за багаж е пронајдена црна торба, во која во 9 пакетчиња обвиени со најлон е откриено злато со тежина од 4,8 килограми. Возачот, кој првично изјавил дека нема ништо за пријавување, по откривање на златото, потврдил дека торбата е негова.
„Нашите царински службеници се грижат за забрзан транспорт на легална трговија, но истовремено ги штитат приходите на државата спречувајќи шверц и криминал. Во случајот е спречено избегнување плаќање увозни давачки во износ од 5 милиони денари“, велат од Царинската управа.
Случајот е преземен од страна на инспекторите од Одделението за истраги при Секторот за контрола и истраги, при што против возачот ќе биде поднесена кривична пријава до Основното јавно обвинителство Гевгелија. Златото во согласност со законот ќе биде предадено во Народната банка.
Македонија
Зајкова: Забрзана ЕУ-интеграција е клучот за иднината на Македонија
Придобивките од членството во ЕУ значително ги надминуваат сегашните предизвици, а промоцијата на либералните вредности и на демократските стандарди останува врвен приоритет за партијата, рече претседателката на Либерално-демократската партија, Моника Зајкова, во рамките на панел-дискусијата „ЕУ-интеграции – Кој е следниот чекор?“, организирана од Либералниот институт – Скопје.
Покрај Зајкова, говорник на панел-дискусијата беше и Бо Мандеруп Јенсен од Данска, искусен политичар со работа во институциите на ЕУ, а моментно е претседател на бордот на директори на данската програма за либерална демократија.
Зајкова во своето излагање посочи дека ЛДП е континуиран поддржувач на забрзаната европска интеграција на Македонија. Таа истакна дека државата е веќе длабоко вкоренета во процесот на приближување кон ЕУ.
„Соочени сме со многубројни предизвици вклучувајќи ја и потребата за значителни реформи во јавната администрација и правосудството, а државата треба да се фокусира и на имплементација на 40 препораки од ОБСЕ и ЕУ, кои новата влада треба да ги усвои и спроведе“, рече Зајкова.
Како што посочи, соработката со либералите во ЕУ е клучна за напредокот на Македонија.
Мандеруп Јенсен во својот говор сподели детали од историјата на Данска и нејзините дебати во врска со членството во ЕУ, кои траеле долги 15 години.
„Процесот на интеграција во ЕУ е сложен и бара исполнување 35 поглавја, но тоа е предизвик што носи многу придобивки за вашата земја“, истакна тој.
Според него, инвестирањето во ЕУ-членство носи многу повеќе корист отколку загуба, објаснувајќи дека иако Данска не е дел од еврозоната и сè уште ја користи својата валута, таа има солидна монетарна независност.
ЛДП е активен член на АЛДЕ од своето основање и е препозната во Европскиот парламент, што е голема предност во лобирањето за исполнување на стратешките интереси.
Заклучокот од оваа панел-дискусија е тоа што придобивките од членството во ЕУ значително ги надминуваат сегашните предизвици, а промоцијата на либералните вредности и демократските стандарди останува врвен приоритет за партијата.
Овој настан јасно покажува дека политичките и економските лидери се подготвени да ги водат своите земји кон подлабока европска интеграција, со што се обезбедува стабилност, напредок и унапредување на демократските вредности на Балканот.